Boskopuman 15

₁Wantu man di kmopo fu Yudea bigin leri den bribisma taki: “Gado no o ferlusu unu efu un no besnei leki fa a wèt fu Moses e taki.” ₂Ma Paulus nanga Barnabas no ben agri nanga den srefsrefi. A sani disi tyari sowan dyugudyugu tak' den sma fu a gemeente taigi Paulus nanga Barnabas fu go makandra nanga wantu tra sma na Yerusalem, fu taki a tori disi nanga den boskopuman fu Yesus nanga den fesiman fu a gemeente drape. ₃So a gemeente seni den go èn den psa ini Fenisia nanga Samaria. Drape den ferteri den bribisma fa den sma di no de Dyu teki bribi na ini Masra Yesus. Di den bribisma yere a sani dati, den ben breiti srefsrefi. ₄Di den doro ini Yerusalem, den bribisma, den boskopuman fu Yesus nanga den fesiman fu a gemeente, bari den wan odi. Dan Paulus nanga Barnabas ferteri den ala sani san Gado ben meki den du. ₅Ma wantu Fariseiman di ben teki bribi, opo tnapu dan den taki: “Den sma di no de Dyu musu besnei, èn sma mus leri den fu hori a wèt fu Moses.”

₆So den boskopuman fu Yesus nanga den fesiman fu a gemeente kon makandra fu taki a tori disi. ₇Ma den no ben man feni densrefi. Ne Petrus opo dan a taki: “Brada, un sabi taki langa ten kba Gado ben teki mi puru na un mindri, fu go ferteri a bun nyunsu na den sma di no de Dyu fu den teki bribi. ₈Dan Gado, di sabi ala sma ati, gi den a Santa Yeye leki fa A ben gi unu, fu sori taki sma di no de Dyu kan tron En sma tu. ₉Gi Gado, Dyusma nanga sma di no de Dyu na a srefi. Bika di den kon na bribi, A krin den ati fu ala sondu tu. ₁₀Dan fu sanede un wani tesi Gado, fu poti wan hebi lai tapu den bribisma san wi nanga den afo fu wi no ben man tyari? ₁₁Ma wi e bribi taki a bun-ati fu Masra Yesus ferlusu wi tapu a srefi fasi leki fa A ferlusu den.” ₁₂Dan ala den sma tan tiri fu arki fa Barnabas nanga Paulus e ferteri fu ala den marki nanga den wondru di Gado meki den du mindri den sma di no de Dyu. ₁₃Di den kba, Yakobus taki: “Brada, un arki mi. ₁₄Simeon sori wi tak' sensi na a bigin Gado ben abi den sma di no de Dyu ini En prakseri, fu A kan puru sma na den mindri meki wan pipel gi Ensrefi. ₁₅A sani disi e akruderi tu nanga san den profeiti skrifi. Den ben skrifi taki: ₁₆‘Bakaten Mi sa drai kon baka, dan Mi sa bow a oso fu kownu David di ben broko. San fadon broko, Mi sa meki bun, èn Mi sa meki a oso opo tnapu baka. ₁₇Dan ala tra sma sa suku Masra, sosrefi den sma di no de Dyu di de Mi eigi pipel. ₁₈Na so Masra taki, di e du den sani disi di A ben taki langa na fesi kba.’

₁₉Dan Yakobus taki moro fara taki: Fu dat'ede mi feni taki un no mus trobi den sma di no de Dyu te den drai kon na Gado. ₂₀Ma un mus skrifi den tak' den no mus fasi noti san kon doti fu di sma ben gi en na tra gado, den no mus gi densrefi abra na takru lostu, den no mus nyan meti di kiri sondro tak' a brudu ben lon kmopo, èn den no mus nyan brudu. ₂₁Bika someni langa kba den e leisi èn preiki a wèt fu Moses tapu a sabatdei ini den kerki fu ibri foto.”

₂₂Dan den boskopuman fu Yesus nanga den fesiman fu a gemeente, makandra nanga ala den bribisma, teki a besroiti fu teki wantu man na den mindri, dan den seni den makandra nanga Paulus nanga Barnabas go na Antiokia. Dan den teki Yudas di den sma ben e kari Barsabas tu, nanga Silas. Den sma fu a gemeente ben abi bigi lespeki gi den tu man disi. ₂₃Den seni a brifi disi go nanga den:

“Gi den brada di no de Dyu ini Antiokia, Siria nanga Silisia.

Disi na wan brifi fu den boskopuman fu Yesus nanga den fesiman fu a gemeente. Leki brada wi e seni taki un odi. ₂₄Wi yere taki wantu sma fu wi kon taki wantu sani drape. A sani disi tyari wan bruya kon na un mindri èn un no sabi san un mus prakseri now. Ma a no wi ben seni den. ₂₅So wi teki a besroiti leki wan man fu teki wantu man seni kon na unu, makandra nanga Barnabas nanga Paulus, den lobi brada fu wi, ₂₆di no ben abi trobi fu lasi den libi fu a nen fu wi Masra Yesus Kristus. ₂₇Wi e seni Yudas nanga Silas kon. Den sa taigi unu den srefi sani di wi skrifi. ₂₈A Santa Yeye nanga wi ben feni en bun fu no poti wan moro hebi lai na un tapu leki den sani disi di de fanowdu: ₂₉Un no mus nyan noti di ben gi leki ofrandi na tra gado, un no mus nyan brudu, un no mus nyan meti di kiri sondro fu a brudu lon kmopo, èn un no mus gi unsrefi abra na takru lostu. A o bun efu un no du den sani disi. Un tan bun.”

₃₀Di den kmopo fu drape, den go na Antiokia. Drape den kari ala bribisma kon na wan, dan den gi den a brifi. ₃₁Di den leisi a brifi den alamala ben breiti, bika san skrifi ben de wan trowstu gi den. ₃₂Yudas nanga Silas, di ben de profeiti tu, taigi den sma furu sani di trowstu den èn di gi den dek'ati. ₃₃Baka di den tan wan heri pisten drape, den bribisma ben wani seni Yudas nanga Silas go baka na den sma di ben seni den kon, èn den winsi den tak' ala sani sa go bun nanga den. ₃₄Ma Silas teki a besroiti fu tan drape. ₃₅Paulus nanga Barnabas tan na Antiokia, èn makandra nanga furu trawan den ben e preiki èn leri den sma a wortu fu Masra.

₃₆Baka wan pisten Paulus taigi Barnabas taki: “Kon meki un drai go baka na ibri foto pe un ben ferteri a wortu fu Masra, fu si fa a e go nanga den bribisma.” ₃₇Dan Barnabas ben wani teki Yohanes tu, di den sma e kari Markus. ₃₈Ma Paulus no ben feni en bun, bika a ben gwe libi den di den ben de ini Pamfilia èn a no ben yepi den moro fara nanga a wroko. ₃₉Di den no ben man feni densrefi kwet'kweti, den prati pasi. So Barnabas teki Markus, dan den teki wan sipi go na Siprus. ₄₀Ma Paulus teki Silas fu go nanga en. Dan baka di den bribisma poti den ini Masra anu fu A yepi den, den gwe. ₄₁Dan Paulus go na Siria nanga Silisia pe a meki den gemeente kon tranga ini a bribi.