Boskopuman 9

₁Ma a pisten dati Saulus ben e taigi den bribisma nanga atibron ete taki a o kiri den. Dan a go na a granpriester ₂go aksi en brifi fu tyari go na den kerki fu a foto Damaskus. Den ben mus gi en primisi fu grabu man nanga uma di de fu a Nyun Pasi di a ben o feni drape, fu tyari den go sroto na Yerusalem. ₃Ma di a doro krosbei fu Damaskus, wantronso wan krin faya fadon fu heimel lontu en. ₄Ne a fadon na gron dan a yere wan sten aksi en taki: “Saul, Saul, fu sanede yu de na Mi baka fu du Mi ogri?” ₅Saulus aksi taki: “Masra, suma na Yu?” A sten piki en taki: “Mi na Yesus di yu e du ogri. ₆Ma opo tnapu, dan yu e go ini a foto. Drape yu o yere san yu mus du.” ₇Den man di ben de nanga Saulus ben tan tnapu nanga opo mofo, bika den ben yere wan sten, ma den no ben si no wan sma. ₈Di Saulus opo tnapu, a no ben man si, aladi en ai ben opo. Dan den man di ben de nanga en, hori en na en anu tyari go ini Damaskus. ₉Dri dei langa Saulus no ben man si noti. A no nyan èn a no dringi no wan sani tu.

₁₀Ini Damaskus wan bribisma ben de di ben nen Ananias. Masra sori en wan sani. A si fa Masra e taigi en taki: “Ananias.” A piki taki: “Iya, Masra, dya mi de.” ₁₁Dan Masra taigi en taki: “Opo go na a oso fu Yudas di e libi ini a strati di den e kari: Langa-strati. Drape yu mus aksi fu wan man Saulus fu a foto Tarsus. A e begi nownow. ₁₂Mi sori en wan sani: a si fa wan man di nen Ananias kon inisei, dan a poti anu na en tapu fu a ben kan si baka.” ₁₃Ma Ananias taki: “Masra, someni sma ferteri mi kba fu a man disi, fa a du den sma fu Yu na Yerusalem someni ogri. ₁₄Èn a kisi makti fu den prenspari priester fu grabu ala sma dya di e kari Yu nen.” ₁₅Ma Masra taigi Ananias taki: “Yu mus go, bika Mi teki a man disi fu wroko gi Mi. A sa meki sma kon yere fu Mi: sma di no de Dyu, den kownu fu den, nanga den sma fu Israel. ₁₆Mi o sori en omeni pina a o abi fu nyan fu Mi nen ede.” ₁₇So Ananias go na a oso. A poti en anu tapu Saulus, dan a taigi en taki: “Brada Saul, Masra Yesus di sori Ensrefi na yu na pasi, seni mi kon fu yu kan si baka, èn fu yu kon furu nanga a Santa Yeye.” ₁₈A srefi momenti dati, wan sani leki buba fadon kmopo fu Saulus en ai èn a ben man si baka. Dan a opo èn a teki dopu. ₁₉Baka dati a nyan èn a kisi krakti baka.

Saulus tan wantu dei nanga den bribisma fu Damaskus, ₂₀dan wantron a bigin ferteri ini den kerki tak' Yesus na a Manpikin fu Gado. ₂₁Ala sma di yere en, ferwondru srefsrefi. Den taki: “A no a man di ben e puru ala sma na pasi ini Yerusalem di ben kari a nen disi? A no kon a kon dya fu grabu den tyari go gi den prenspari priester?” ₂₂Ma moro nanga moro Saulus ben e sori den sma tapu wan krakti fasi tak' a tru taki Yesus na a Mesias. Den Dyusma di ben libi ini Damaskus, no ben sabi san den ben mus prakseri fu a sani disi.

₂₃Baka wan pisten den Dyu meki mofo fu kiri en. ₂₄Dei nanga neti den ben hori wakti na den doro fu a foto fu kiri en. Ma Saulus ben kisi a sani disi fu yere. ₂₅So den man di ben e teki leri fu Saulus, teki en na neti dan den saka en ini wan baskita abra a stonskotu fu a foto.

₂₆Di a doro na Yerusalem, a meki muiti fu kon mindri den bribisma, ma den ben frede fu en bika den no ben man bribi taki a tron wan bribisma tu. ₂₇Ma Barnabas go yepi Saulus. A tyari en go na den boskopuman fu Yesus, dan a ferteri den fa Saulus ben si Masra na pasi, èn fa Masra ben taki nanga en. A ferteri den moro fara fa a ben taki sondro frede ini a nen fu Yesus nanga den sma ini Damaskus. ₂₈So Saulus tan na den bribisma ini Yerusalem. A ben e waka fri èn sondro frede a ben taki ini a nen fu Masra. ₂₉A ben hari taki nanga den Dyusma di ben taki Grikitongo, ma den disi ben wani kiri en. ₃₀Di den bribisma kisi a sani disi fu yere, den tyari Saulus go na a foto Sesarea. Fu drape den seni en go na a foto Tarsus.

₃₁Dan ala den bribisma fu Yudea, Galilea nanga Samaria ben libi ini freide. A bribi fu den ben kon moro tranga èn den ben abi bigi lespeki gi Gado. A Santa Yeye ben yepi den tu tak' moro nanga moro sma teki bribi.

₃₂Di Petrus ben e waka lontu na ala presi, a doro tu na den sma fu Gado ini Lida. ₃₃Drape a miti nanga wan lanman di ben nen Eneas. Aiti yari langa a man disi ben didon na bedi kba. ₃₄Petrus taigi en taki: “Eneas, Yesus Kristus e dresi yu. Opo, dan yu srefi meki yu bedi.” Ne Eneas opo wantron. ₃₅Dan ala sma fu Lida nanga a kontren fu Saron si en èn den teki bribi ini Masra.

₃₆Ini Yopa wan bribisma ben e libi di ben nen Tabita. Ini Grikitongo a nen dati na Dorkas. A ben e du furu bun sani èn a ben e yepi pôtisma. ₃₇Ini a ten dati, a kon siki èn a dede. Baka di den wasi a dedeskin, den poti en ini wan kamra na sodro. ₃₈Yopa no ben de fara fu Lida. Di den bribisma fu Yopa yere taki Petrus de ini Lida, den seni tu man go na en. Den ben mus begi en efu a ben kan kon wantewante na den. ₃₉So Petrus opo go nanga den. Di a doro, den tyari en go na sodro na a kamra pe a dedeskin ben de. Ala den umasma di masra dede kba, ben kon tnapu lontu Petrus e krei. Den sori en ala den krosi di Dorkas ben meki di a ben de na libi ete. ₄₀Baka di Petrus seni den alamala go na dorosei, a kindi èn a begi. Dan a drai taigi a dedeskin taki: “Tabita, opo!” Ne Tabita opo en ai, èn di a si Petrus, a opo sidon. ₄₁Petrus langa en anu gi en fu yepi en opo tnapu. Dan a kari den uma di masra dede kba, makandra nanga den tra sma fu Gado, fu sori den tak' Dorkas kon na libi baka. ₄₂Heri Yopa yere fu a tori, èn furu sma teki bribi ini Masra Yesus. ₄₃Dan Petrus tan wan heri pisten ini Yopa na wan man Simon di ben e wroko meti buba tron leer.