Deuteronomium 31

₁Dan Moses taigi heri Israel den sani disi tu. ₂A taigi den taki: “Now mi abi wan hondro nanga tutenti yari. Mi no man du ala sani moro. MASRA taigi mi tu taki: ‘Yu no sa koti a Yordanliba abra.’ ₃MASRA srefi sa go na un fesi fu koti a liba. Ensrefi sa yagi èn kiri den folku di de na un fesi, fu un kan teki a kondre fu den abra. Yosua sa go na un fesi te un e koti abra, leki fa MASRA, taki. ₄MASRA sa du a srefi sani nanga den leki fa A du nanga Sikon nanga Og, den Amoritikownu, di A kiri. A sa du a srefi tu nanga a kondre fu den. ₅MASRA sa gi den abra na unu èn un mus du ala sani nanga den, leki fa mi komanderi un. ₆Un teki dek'ati èn un mus dyadya. No frede gi den èn un no lasi ati. Bika MASRA, un Gado, srefi san go nanga unu. A no sa drai En baka gi unu, A no sa libi unu.”

₇Dan Moses kari Yosua. A taigi na en heri Israel fesi taki: “Teki dek'ati. Yu mus de wan dyadya man. Bika yu sa tyari a folku disi go ini a kondre di MASRA sweri gi den afo fu den taki A o gi en na den. Na yu o meki den teki en. ₈MASRA srefi sa go na yu fesi. Ensrefi sa de nanga yu. A no sa drai En baka gi yu. A no sa gwe libi yu. No frede. No meki noti tapu skreki gi yu.”

₉Baka di Moses skrifi a wèt, a langa en gi den priester, den manpikin fu Lefi, di ben e tyari a kisi fu a ferbontu fu MASRA, nanga gi den fesiman fu Israel. ₁₀Moses taigi den taki: “Baka ibri seibi yari, ini a yari pe un mus taigi den sma taki den no abi fu pai un baka, te a fesa doro fu memre taki un ben e libi wan pisten ini kampu, ₁₁èn heri Israel e hari go na a presi di MASRA, un Gado, sa sori unu fu un kon na En fesi, un mus leisi a wèt disi meki heri Israel yere. ₁₂Un mus kari ala sma kon na wan. Mansma, umasma, pikin, nanga den doroseisma di e tan ini den foto fu unu, fu den arki. Dan den sa leri lespeki MASRA, un Gado èn hori densrefi trutru na ala den pisi fu a wèt disi. ₁₃Dan den pikin fu den di no sabi noti fu den sani disi, sa yere fu den, èn den sa leri fu lespeki MASRA, un Gado. Un mus du disi so langa un e libi ini a kondre di un o teki abra baka te un koti a Yordanliba abra.”

₁₄Dan MASRA taigi Moses taki: “Luku a ten e doro fu yu dede. Kari Yosua kon dan yu e go nanga en ini a tenti pe yu kan miti nanga Gado, fu Mi poti en leki a sma di o teki abra fu yu.” So Moses nanga Yosua go tnapu ini a tenti pe yu kan miti nanga Gado. ₁₅Dan MASRA sori Ensrefi leki wan wolku di ben gersi wan bigi postu. A wolku ben tan tnapu na mofodoro fu a tenti. ₁₆Dan MASRA taigi Moses taki: “Arki, te yu o go dede go na den afo fu yu, a folku disi no o de fu fertrow moro. Den o waka baka den gado di den no sabi fu a kondre pe un o go. Den o drai den baka gi Mi èn den o broko a ferbontu fu Mi, di Mi ben meki nanga den. ₁₇Ma te dati psa Mi ati sa bron na den tapu. Mi sa drai Mi baka gi den èn Mi no o luku den srefsrefi moro meki den dede èn ala sortu bigi nowtu nanga benawtu miti den. Dan den o taki: ‘Den bigi nowtu disi miti wi fu di Gado no de na un mindri.’ ₁₈Ma a pisten dati Mi no o luku den srefsrefi na wan ai fu ala den hogri di den du. Sobun, fu di den drai go dini tra gado.

₁₉Dat' meki yu mus skrifi a singi disi dan yu e leri den sma fu Israel a singi. Den mus sabi en ini den ede. Bika Mi o teki a singi disi leki wan ketoigi fu taigi den sma fu Israel san den du. ₂₀Leki fa Mi sweri gi den afo fu den, Mi o tyari den go na a kondre pe a gron bun èn pe ala sani e gro. Den sa nyan den bere furu èn den o kon fatu. Dan den sa drai go dini tra gado. Den o si mi fu noti èn den o broko a ferbontu fu Mi. ₂₁Te den bigi nowtu nanga den benawtu miti den, dan a singi disi o de leki wan ketoigi fu taigi den san den du. Bika den bakapikin fu den sa tan singi en. Mi sabi tide kba san de ini den ati. Mi sabi en fosi Mi tyari den go na a kondre di Mi sweri taki Mi o gi en na den.”

₂₂Ne Moses skrifi a singi disi dan a leri en na den sma fu Israel. ₂₃A taigi Yosua taki: “Teki dek'ati. Yu mus de wan dyadya man. Bika yu sa tyari den sma fu Israel go ini a kondre di Mi sweri taki Mi o gi en na den. Mi o de nanga yu.”

₂₄Di Moses ben kba fu skrifi ala den pisi fu a heri wèt, ₂₅a taigi den Lefitiman di ben e tyari a kisi fu a ferbontu fu MASRA taki: ₂₆“Un teki a buku disi nanga a wèt. Un poti en sei a kisi fu a ferbontu fu MASRA, un Gado. A sa de drape leki wan ketoigi fu taigi den sma san den du. ₂₇Bika Mi sabi fa un e kaka un futu èn fa un yesi tranga. Efu un ben kaka un futu gi MASRA now di mi de na libi ete, dan un o du en moro ete baka te mi dede. ₂₈Kari ala den edeman fu den lo nanga den skrifiman, dan mi sa taki meki den yere èn mi sa teki heimel nanga grontapu leki ketoigi fu san mi o taki. ₂₉Bika mi sabi taki baka te mi dede un o du sani di no bun srefsrefi. Un o kmoto fu a pasi di mi sori unu. Fu dat'ede un o kon ini bigi nowtu te un du sani di no bun ini MASRA ai èn te un wiki a atibron fu En nanga den gado di unsrefi meki.”

₃₀Dan Moses singi a heri singi disi te na a kba, meki heri Israel yere.