Deuteronomium 7

₁MASRA, un Gado, o tyari un go ini a kondre di un o teki abra. A sa yagi furu folku puru gi unu soleki den Hetitisma, den Girgasitisma, den Amoritisma, den Kananitisma, den Perisitisma, den Hiwitisma nanga den Yebusitisma. Seibi folku di bigi èn di tranga moro unu. ₂MASRA, un Gado, o gi den abra na unu meki un wini den. Un mus kiri den alamala. Un no mus meki no wan ferbontu nanga den èn un no mus abi sari-ati nanga den. ₃Un no mus trow nanga den tu. No meki den umapikin fu unu trow den manpikin fu den. No teki den umapikin fu den gi den manpikin fu unu tu. ₄Efu dati psa, den o meki den manpikin fu unu tapu fu dini Mi. Den o go dini tra gado. Dan MASRA ati o bron na un tapu èn es'esi A bo kiri un puru na pasi. ₅Disi un mus du nanga den: un mus broko den altari fu den. Un mus naki den ston fu den gado broko di den poti tnapu. Kapu den postu fu den gado trowe dan un sutu faya gi den ston noso den udu popki fu den kruktu gado fu den. ₆Bika unu na wan folku di MASRA, un Gado, poti aparti. Na unu MASRA, un Gado, teki na mindri fu ala folku na grontapu gi ensrefi. ₇A no fu di un bigi moro den tra folku meki MASRA lobi unu. Kwet'kweti, un na a moro pikin folku di de. ₈Ma na fu di MASRA ben lobi unu èn fu di A ben wani hori Ensrefi na san A ben pramisi den Afo fu unu. Na fu dat'ede meki a ferlusu unu nanga En makti fu a katibo ini san un ben de. A puru un ini a makti fu Farao, a kownu fu Egipte. ₉A du dati fu un kan sabi taki MASRA, un Gado, na a enkri Gado. A Gado tapu san yu kan bow. A e hori Ensrefi na a ferbontu èn A e sori sari-ati dusundusun yari na den bakapikin fu den wan di lobi En, èn di e hori densrefi na den gebod fu En. ₁₀Ma den sma di no lobi En A e strafu èn A e puru den na pasi. A no e draidrai fu puru den sma na pasi di no lobi En. ₁₁Dat' meki un mus hori unsrefi na den gebod, un mus tan du den sani di un mus du èn un mus tan hori unsrefi na den sani di mi e leri un tide.

₁₂Efu un gi yesi na den sani na san un mus tan hori unsrefi èn un hori unsrefi trutru na den, dan MASRA, un Gado, sa meki un si taki A e hori Ensrefi na a ferbontu èn taki A e sori un sari-ati. A ben pramisi disi èn A ben sweri en gi den afo fu unu. ₁₃A sa lobi unu, A sa blesi unu èn A sa meki un kon furu ini a kondre di A ben pramisi èn di A ben sweri gi den afo fu unu taki A o gi en na unu. A sa blesi den bere fu den umasma, A sa blesi a nyanyan fu un gron, a karu, a win nanga a oli fu unu. A sa blesi den kaw, den krabita nanga den skapu fu unu te den meki pikin. ₁₄Gado sa blesi unu moro ala tra folku di de. No wan man, no wan uma noso wan meti sa de na un mindri di no sa abi pikin. ₁₅MASRA sa wai ala siki puru na pasi gi unu. A no sa meki un kisi no wan fu den takru siki di un sabi fu Egipte. A sa meki den sma di no lobi unu kisi den siki disi. ₁₆Un mus figi ala den folku puru na pasi di MASRA, un Gado, o gi abra ini un makti. No sari den èn no dini den gado fu den. No meki den kisi unu nanga dati.

₁₇Kande un prakseri ini unsrefi taki: “Den folku disi bigi moro unu. Fa un o man yagi den puru dan?” ₁₈Un no mus frede. Un mus tan prakseri san MASRA, un Gado, du nanga Farao nanga Egipte. ₁₉Un si a pina di a pina den, un si den wondru nanga den marki èn un si a makti nanga a krakti nanga san MASRA, un Gado, puru unu drape. Na so MASRA, un Gado, o du tu nanga ala den folku, gi san un e frede. ₂₀Ma a no dati wawan. MASRA, un Gado, o seni marbonsu na den tapu, te leki alamala dede di ben tan na libi èn di ben go kibri gi unu. ₂₁No beifi gi den, bika MASRA, un Gado, wan bigi èn tranga Gado, de na un mindri. ₂₂Safrisafri MASRA, un Gado, sa yagi den folku disi gwe. Un no mus kiri den wantron. Noso tumsi furu krasi meti o de gi unu. ₂₃Na so MASRA, un Gado, sa gi den abra na unu. A o tyari bigi bruya kon na den tapu te leki den no de moro. ₂₄A sa gi den kownu fu den abra ini un makti èn un o meki taki sma no o memre den moro. No wan sma o man kaka futu gi unu, te leki den no de moro. ₂₅Un mus sutu faya gi den ston noso udu popki fu den kruktu gado fu den. Un no mus teki a gowtu nanga a solfru fu san den ben meki. No meki bigi fu den sani disi kisi unu, bika gi MASRA, un Gado, den na wan groskin sani. ₂₆No tyari no wan fu den groskin sani disi kon ini un oso noso unsrefi o dede. Un no mus lobi den srefsrefi èn un mus fisti gi den bika a fluku fu Gado de na den tapu.