Masra poti Esekiyel baka leki waktiman
1MASRA taki nanga mi, A taigi mi taki: 2“Manpikin fu libisma, opo yu mofo taigi den kondreman fu yu taki: efu Mi meki bigi feti broko ini wan kondre èn den sma fu a kondre poti wan sma leki waktiman, 3dan a waktiman o bro a tutu fu warskow a pipel fu en te a si taki feyanti e broko kon fu kiri den. 4Efu wan sma yere a babari fu a tutu ma no teki en leki wan warskow, èn feyanti kiri en ini a feti, dan na ensrefi suku en dede. 5A yere a babari fu a tutu, ma a no teki en leki wan warskow. Na ensrefi suku en dede. Efu a ben arki a warskow a ben o tan na libi. 6Ma te a waktiman si a feyanti e kon ma a no e bro a tutu fu warskow a pipel, dan a feyanti doro èn kiri wan sma, dan a sma o dede fu en eigi kruktudu ede, ma Mi o kari a waktiman kon na frantwortu fu a dede fu a sma.
7Now yu, manpikin fu libisma. Mi poti yu leki waktiman gi a pipel fu Israel. Te yu yere Mi taki wan sani, yu sa warskow den ini Mi nen. 8Te Mi taki dati a no abi misi dati so wan ogri-ati sma o dede, ma yu no e taki fu warskow a ogri-ati sma fu a fasi fa a e tyari ensrefi, dan so wan ogri-ati sma o dede fu en eigi kruktudu ede, ma Mi o kari yu kon na frantwortu fu a dede fu en. 9Ma efu yu warskow so wan ogri-ati sma fu a tapu nanga a fasi fa a e tyari ensrefi, ma a no e tapu, dan a o dede fu a eigi kruktudu fu en ede, ma yu ferlusu a libi fu yu.
10Dat' meki, manpikin fu libisma, taigi a pipel fu Israel taki: Un e taki: ‘Den kruktudu nanga den sondu fu wi di de leki wan bun hebi lai na un tapu e meki un swaki dei fu dei. Un no man libi so go moro fara.’ 11Dan yu mus taigi den taki: ‘Mi e sweri na Mi eigi libi, Masra MASRA e taki, Mi no abi a prisiri te wan ogri-ati sma e dede. Ma san e gi Mi prisiri na te wan ogri-ati sma tapu nanga a fasi fa a e tyari ensrefi èn tan na libi. Tapu, tapu nanga a ogri fasi fu yu e tyari yusrefi. Fu sanede un wan dede, pipel fu Israel?’
12Manpikin fu libisma, taigi den kondreman fu yu taki: ‘A libi fu wan sma di bun ini Gado ai no o yepi en efu a bigin du ogri. Èn ogri-ati sani di wan ogri-ati sma e du no o meki a lasi en libi efu a tapu nanga en. Wan sma di bun ini Gado ai no o man tan na libi efu a bigin sondu, awinsi o bun a ben e libi. 13Te Mi e taigi a sma di bun ini Mi ai dati a no abi misi dati a o dede, ma a e fertrow na tapu a leti fasi fa a e libi èn a e tan du ogri, dan Mi no o prakseri no wan fu den bun sani di a du, ma a o dede fu den ogri di a du. 14Te Mi e taigi a ogri-ati sma dati a no abi misi dati a o dede, ma a e tapu nanga a sondu libi èn a bigin du bun èn libi tapu wan leti fasi, 15te a gi baka san a ben teki leki panti, pai a sma di a fufuru, èn libi soleki fa den wèt e taki di e gi libi, wan sani di e meki a tapu fu du ogri, dan a no abi misi dati a o tan na libi, a no o dede. 16A no o pai moro fu no wan fu den sondu di a du. A bigin du san bun èn libi na tapu wan leti fasi. A no abi misi dati a o tan na libi.’ 17A sani disi meki den kondreman fu yu e taki: ‘A fasi dati fa MASRA e du sani no bun,’ ma na a fasi fa den e du sani no bun. 18Te wan sma di bun ini Mi ai tapu fu libi na tapu wan leti fasi èn bigin du ogri, dan na a ogri di a e du o tron en dede. 19Ma te wan ogri-ati sma tapu nanga a ogri-ati libi di a e libi èn a bigin du san bun èn libi na tapu wan leti fasi, dan dati o meki dati a tan na libi. 20Un taki fu unu nomo: ‘A fasi fa MASRA e du sani no bun,’ ma Mi o leisi strafu gi unu pipel fu Israel, iniwan na a fasi fa a tyari ensrefi.”
Esekiyel no babaw moro langa
21Ini a di fu twarfu yari di un ben de leki strafuman ini Babilon, tapu a di fu feifi dei fu a di fu tin mun, wan man di ben man lowe kmopo ini Yerusalem kon drape nanga wan boskopu taki: “A foto broko!” 22A neti na fesi a krakti fu MASRA ben de na mi tapu. Di a man doro a mamanten fu en na mi, MASRA opo mi mofo. So mi ben man taki baka, mi no ben babaw moro.
A bigi ogri kon
23MASRA taki nanga mi, A taigi mi taki: 24“Manpikin fu libisma, den sma di e libi mindri den bigi ipi broko ston ini Israel e taki: ‘Abraham ben de en wawan, toku a kisi a heri kondre. Unu de nanga furu, dat' meki na unu kisi a kondre gi unsrefi.’ 25Fu di den e taki so, taigi den taki: ‘Na disi Masra MASRA e taki: Un e nyan meti di abi brudu ete, un e dini kruktu gado, un e kiri sma, dan fa un wani taki a kondre mus de fu unu. 26Un e bow na tapu den deigri fu unu, un e du groskin sani, iniwan fu unu e go na bedi nanga tranga nanga a uma fu wan trawan. Dan fa un wani taki a kondre mus de fu unu.’ 27Taigi den taki: ‘Na disi Masra MASRA e taki: Mi e sweri na Mi eigi libi taki den wan di e libi mindri den bigi ipi broko ston, na deigri o kiri den. Den wan di e libi ini den wei, na krasi meti o nyan den, èn den wan di e libi ini den tranga kibripresi nanga ini den olo na den bergi, na takrusiki di o panya drape o kiri den. 28Mi o broko a kondre, Mi o pori en. Mi o broko a makti fu en di e meki a e opo ensrefi so. Den bergi fu Israel dati o gersi broko pranasi, no wan sma o hari psa na den moro. 29Te Mi meki a kondre tron wan presi di broko, di pori, fu ala den groskin sani di a pipel du, den sa ferstan dati Mi de MASRA.’
30Masra taigi mi taki: Manpikin fu libisma, den kondreman fu yu e taki nanga makandra fu yu, na den skotu fu a foto èn na den doro fu den oso fu den. A wan e taigi a trawan taki: ‘Kon, meki un go arki san MASRA abi fu taigi unu.’ 31Dan den kon na yu nanga bun furu sma, den e go sidon èn den e arki san yu e taki. Ma den no e du den sani di yu e taigi den fu du. Wortu fu lobi e kmopo ini den mofo, ma den e prakseri soso fa den kan meki moni tapu wan fasi di no fiti. 32Gi den yu na noti moro leki wan singiman di e singi lobisingi, wan di e singi moi èn di e prei a instrumenti bun. Den e yere san yu e taki, ma den no e du san yu e taki. 33Ma te den sani di yu taki kon tru, èn den o kon tru, dan den o ferstan taki wan profeiti ben de na den mindri.”
