Abraham e trow baka
1Abraham trow fu a di fu tu leisi. A frow disi ben nen Ketura. 2Ketura meki siksi manpikin gi Abraham. Den ben nen: Simram, Yoksan, Medan, Midyan, Yisbak nanga Suak. 3Yoksan ben de p'pa fu Seba nanga Dedan. Den bakapikin fu Dedan na den sma fu Asur, den Letusitisma nanga den Lehumitisma. 4Den manpikin fu Midyan ben de Efa, Efer, Hanok, Abida nanga Eldaa. Den alamala ben de bakapikin fu Ketura.
5Abraham ben libi ala sani na baka gi Isak. 6Fosi a dede a prati kado gi den boi fu en di a ben abi nanga den tra frow nanga san a ben e libi tu. Baka dati a seni den boi gwe na a oostsei fu prati den nanga en manpikin Isak.
7Abraham doro a libimarki fu wan hondro seibitenti-na-feifi yari. 8A ben kon grani srefsrefi. A ben owru èn a libi te libi sari en. Dan en bro koti. A dede go na den bigisma fu en. 9Den manpikin fu en, Isak nanga Ismael, beri en ini a bergi-olo fu Makpela. A bergi-olo disi ben de tapu a gron fu Efron, a manpikin fu a Hetitiman Sogar èn a ben de na abrasei fu Mamre. 10A ben de a gron di Abraham ben bai fu den Hetitisma. Drape den beri en, pe en frow Sara ben beri tu. 11Baka di Abraham dede, Gado blesi en manpikin Isak. Isak ben tan libi na a peti Lakai-Roi.
Den bakapikin fu Ismael
12Disi na den bakapikin fu Ismael, a boi di Abraham ben kisi nanga Hagar, a umasrafu fu Sara, di ben kmoto fu Egipte. 13Disi na den nen fu den manpikin fu Ismael. A fosiwan ben nen Nebayot, baka dati yu ben abi Kedar, Adbeel, Mibsam, 14Misma, Duma, Masa, 15Hadar, Tema, Yetur, Nafis nanga Kedema. 16Den manpikin disi fu Ismael na den twarfu edeman fu den twarfu lo. Ala den dorpu nanga kampu pe den ben e tan ben kisi den nen fu den manpikin disi.
17Ismael doro a libimarki fu wan hondro dritenti-na-seibi yari. Dan en bro koti. A dede go na den bigisma fu en. 18Den bakapikin fu en ben e libi fu Hawila te kon miti Sur. Sur ben de na a oostsei fu Egipte èn a ben didon na a pasi di e go na Asur. Den ben e libi mindri den famiri, ma den ben e go den pasi.
Yakob nanga Esau
19Disi na a tori fu Isak, a manpikin fu Abraham. Abraham ben tron p'pa fu Isak. 20Isak ben abi fotenti yari, di a teki Rebeka, a sisa fu Laban, leki frow. Rebeka ben de a umapikin fu Betuel, wan man fu Aram, di ben e libi na Padan-Aram. 21Isak ben e begi gi en frow bika a no ben man kisi pikin. Dan MASRA yere a begi fu Isak èn Rebeka hori bere. 22Ma den pikin ben e pusu densrefi ini en bere. So Rebeka aksi ensrefi taki: “Na so a mus go? Fu sanede disi mus psa nanga mi?” Ne a aksi MASRA. 23MASRA piki en taki:
“Tu folku de ini yu bere
Tu folku di o go den eigi pasi kba fosi den kmoto na ini yu bere.
A wan folku o tranga moro a trawan.
A bigiwan sa dini a pikinwan.”
24Di a ten doro fu Rebeka kisi den pikin, tu pikin ben de ini en bere. 25A fosiwan di gebore ben rediredi. Wiwiri ben tapu en heri skin leki na wan dyakti a ben weri. So den gi en a nen fu Esau. 26Baka dati en brada gebore. A ben hori Esau na en baka-iri. Dat' meki den gi en a nen fu Yakob. Isak ben abi siksitenti yari di den gebore.
27Di den boi gro kon bigi, Esau tron wan bun ontiman di ben lobi fu de na busi. Yakob ben de wan tiri sma di ben lobi fu tan na oso. 28Isak ben lobi Esau fu di a ben lobi nyan bus'meti. Ma Rebeka ben lobi Yakob. 29Wan dei Esau ben kmoto kon fu busi èn a ben weri. Yakob ben e bori wan nyanyan. 30Dan Esau taigi Yakob taki: “Mi weri. Kon mi swari gawgaw pikinso fu a rediredi sani di yu e bori drape.” Fu dat'ede den e kari en Edom. 31Ma Yakob piki en taki: “Soso efu yu gi mi ala den leti di yu abi leki fosi pikin.” 32Esau piki en baka taki: “Luku, mi e suku fu dede now fu angri. Dan san mi abi na den leti leki fosi pikin?” 33Ne Yakob taigi en taki: “Sweri fosi gi mi.” So Esau sweri gi Yakob èn so a seri den leti di a ben abi leki fosi pikin. 34Ne Yakob langa brede nanga a pesi di a ben bori gi Esau. Esau nyan, a dringi dan a opo gwe. A no ben e span srefsrefi nanga den leti di a ben abi leki fosi pikin.
