Hebrewsma 10

₁A wèt no de den trutru sani srefi, ma a e meki wi tesi pikinso fu den bun sani di de fu kon. Dat' meki noiti a wèt ben man meki den sma di ben e tyari den srefi ofrandi kon na Gado ala yari, kon de leki fa den mus de. ₂Efu a ben de so, dan den ben o tapu fu tyari ofrandi. Bika den sma di e anbegi Gado ben o krin, èn den konsensi no ben o krutu den fu den sondu. ₃Ma ala yari den ofrandi ben e meki den prakseri den sondu baka. ₄Bika noiti a brudu fu bulu nanga bokoboko ben man puru sondu.

₅Dat' meki di Kristus kon na grontapu, A taki:

₁₁Ala dei ala den priester e du den wroko. Ala leisi den e tyari den srefi ofrandi di noiti no man puru wi sondu. ₁₂Ma Kristus dati tyari wan enkri ofrandi nomo gi sondu, dan baka dati A teki presi fu têgo na a let'anu sei fu Gado. ₁₃Drape A e wakti te leki Gado poti den feyanti fu En leki wan futubangi ondro En futu. ₁₄Bika a wan enkri ofrandi di A tyari, meki den sma di e kon santa, kon de fu têgo leki fa a mus de. ₁₅A Santa Yeye srefi e taigi wi taki na so a de. A taki fosi: ₁₆Masra e taki: “Disi na a ferbontu san Mi o meki nanga den baka den dei dati: Mi o poti den wèt fu Mi ini den ati èn Mi o skrifi den ini den prakseri.” ₁₇Dan A taki: “Mi no sa memre den sondu nanga den ogri di den du moro.” ₁₈Efu un kisi pardon fu den sani disi, dan a no de fanowdu moro fu un tyari ofrandi gi sondu.

₁₉Brada nanga sisa, a brudu fu Yesus e gi wi dek'ati now fu go ini a santa presi. ₂₀A opo wan nyun pasi gi wi di o tyari wi go na a libi. A pasi disi e psa doro a garden fu a santa tenti, dati na En skin. ₂₁Dan fu di wi abi wan granpriester ini a oso fu Gado, ₂₂meki wi kon moro krosbei na Gado nanga wan krin ati èn nanga tranga bribi. A nat'nati wi ati fu wi konsensi no fon wi moro, èn A wasi wi skin nanga krin watra. ₂₃Meki wi tan hori na a howpu di wi e taki tak' wi abi, sondro fu degedege. Bika a Wan di meki den pramisi, de fu fertrow. ₂₄Èn meki wi prakseri fa wi kan yepi makandra fu lobi trawan èn fu du bun sani. ₂₅Meki wi no tapu fu go na den konmakandra fu wi, leki fa son sma gwenti fu du. Ma wi mus gi makandra dek'ati fu hori doro, spesrutu now di un e si taki a bigi dei e kon moro krosbei.

₂₆Bika efu wi e sondu espresi baka di wi kon sabi den tru sani, dan no wan ofrandi de moro di kan krin wi fu wi sondu. ₂₇San libi na fu frede a krutu di e wakti unu, nanga a bigi faya di o bron den feyanti fu Gado. ₂₈Efu wan sma ben poti a wèt fu Moses na wan sei, den ben e kiri en sondro fu gi en pardon efu tu noso dri sma ben taki tak' a du en trutru. ₂₉O hebi un denki taki a strafu o de gi a sma di trapu a Manpikin fu Gado nanga en futu, di si a brudu fu a ferbontu di meki a kon santa leki noti, èn di broko a Yeye saka di abi bun-ati? ₃₀Bika wi sabi suma ben taki: “Mi na a wan di o strafu, na Mi o pai baka.” A ben taki tu taki: “Masra sa krutu En pipel.” ₃₁Wan moro takru sani no kan miti yu, dan fu fadon ini anu fu a libilibi Gado.

₃₂Prakseri fa a ben de fosi, baka di un ai ben kon opo. Un ben nyan someni pina, ma un ben hori doro. ₃₃Son leisi den ben broko un saka na ala sma fesi èn den ben pina unu. Son leisi un ben de makandra nanga trawan di ben e psa den srefi sani. ₃₄Un ben e firi gi den sma di den poti na straf'oso, èn un ben e breiti te den ben e teki un sani tyari gwe, fu di un sabi taki un abi moro betre sani di noiti no e lasi gwe. ₃₅Fu dat'ede un no mus lasi a fertrow san un abi, bika wan bigi paiman e wakti unu. ₃₆A de fanowdu fu un hori doro fu un kan du a wani fu Gado èn kisi san A ben pramisi. ₃₇“Bika a no tumsi langa moro dan a Wan di mus kon, o kon. A no o draidrai moro. ₃₈Dan a sma di bun ini Mi ai sa libi fu di a bribi. Ma Mi no sa abi prisiri nanga a sma di drai baka.” ₃₉Wi a no sma di e drai baka dan wi e go lasi. Wi na sma di e bribi, èn dati e meki tak' Gado o ferlusu wi.