1Mi ben lobi Israel di a ben de wan pikin ete.
Fu Egipte Mi kari Mi manpikin kon.
2O moro yu e kari den,
o moro den go den eigi pasi.
Den ben e tyari ofrandi gi Baal.
Den ben e bron wierook leki ofrandi
gi den ston nanga udu popki fu kruktu gado.
3Mi leri Efraim waka.
Mi ben opo en na tapu Mi anu.
Ma den no ben ferstan
taki na Mi ben e dresi den.
4Safrisafri Mi ben e tyari den,
nanga lobi Mi ben e tyari den na wan titei.
Na Mi ben puru a hebi na den tapu,
èn boigi fu gi den nyanyan.
5Den sa drai go baka na Egipte.
A kownu fu Asur sa tiri den,
fu di den no wani drai den libi.
6Den o kiri den sma ini den foto fu den nanga deigri,
broko den greni fu den bigi doro fu a foto,
fu den sani san den ben e sidon prakseri.
7Iya, Mi folku e tan drai den baka gi Mi.
Dat' meki awinsi fa den e kari A Wan na loktu,
A no sa meki sani kon moro lekti gi den.
8Ma fa Mi sa man libi yu fu sani miti yu, Efraim?
Fa Mi bo man libi yu fu yu go, Israel?
Fa Mi bo man libi yu fu a srefi sani miti yu leki Adma,
fu yu dede gwe leki Seboim?
Mi ati bo priti,
sari-ati no bo meki Mi du dati.
9Mi no sa puru Mi atibron na un tapu.
Mi no sa broko Efraim go moro fara.
Bika Mi na Gado,
Mi a no libisma.
Mi na a Santa Wan na un mindri.
Mi ati no sa bron na un tapu.
10Den sa waka na MASRA baka,
èn A sa bari leki wan lew.
Te A bari, den manpikin sa drai kon beifibeifi
fu abra watra.
11Beifibeifi leki wan fowru
den o drai kon fu Egipte,
leki wan doifi den o kmoto ini Asur.
Dan Mi o meki den tan na ini eigi oso.
Na so MASRA taki.
