A siki fu Hiskia
1A ten dati Hiskia kon siki te fu dede. Dan a profeiti Yesaya, a manpikin fu Amos, go taigi en taki: “Na disi MASRA e taki: Seti ala sani, bika yu o dede, yu no o kon betre moro.” 2Hiskia drai en fesi go na a seiplanga, dan a begi MASRA taki: 3“Tye MASRA, mi e begi Yu, memre fa mi libi na Yu fesi leki wan sma di de fu fertrow, fa mi du Yu wani nanga mi heri ati èn du san bun ini Yu ai.” 4Dan Hiskia bari krei. Ne MASRA taigi Yesaya taki: 5“Go na Hiskia, dan yu taigi en taki: ‘Na disi MASRA, a Gado fu yu afo David taki: Mi yere yu begi èn Mi si yu watra-ai. Yere, Mi o meki yu libi tin-na-feifi yari ete, 6èn Mi o ferlusu yu nanga a foto disi fu a makti fu a kownu fu Asur. Mi o kibri a foto disi. 7Disi sa de a marki di MASRA o gi yu, fu yu kan si taki MASRA o du san A taki: 8Yere, mi o meki a schaduw tapu a trapu fu Akas, di e sori o hei a son de, saka tin tree.’ ” Dan a son saka tin tree go baka.
Hiskia gi Gado tangi
9Di kownu Hiskia fu Yuda ben kon betre fu a siki, a skrifi disi:
10“Mi ben prakseri kba taki:
Ini den moro bun yari fu mi libi mi abi fu gwe,
mi abi fu psa den doro fu dedekondre,
pe mi o abi fu tan den yari di libi.
11Mi ben taki:
Mi no o si MASRA moro ini a kondre fu den libiwan.
Libisma dati mi no o si srefsrefi moro,
drape pe ala sani e kon na en kba.
12Den broko mi tanpresi puru tyari gwe,
leki a tenti fu wan skapuman.
Mi ben lolo a libi fu mi kba,
leki fa wan sma di e meki tentiduku e lolo a duku te a kba.
A koti a titei fu mi na a lolo.
Dei nanga neti Yu e suku fu tyari wan kba kon na mi libi.
13Heri neti mi ben didon e prakseri,
leki wan lew Yu e broko ala den bonyo fu mi.
Dei nanga neti Yu e suku fu tyari wan kba kon na mi libi.
14Mi sten ben kon gersi di fu wan pikinfowru,
mi ben e dyeme leki wan doifi.
Mi ai ben weri fu e luku go na loktu.
Tye Masra, mi de ini bigi benawtu,
du wan sani fu yepi mi.
15San mi kan taki now!
A taki nanga mi, èn A du san mi aksi En.
Baka a bita pina di mi pina,
mi sa libi go moro fara ala den yari di de na mi fesi.
16Masra, den sani disi e meki wan sma libi,
iya, mi yeye feni libi ini ala den sani disi.
Yu dresi mi èn meki mi tan na libi.
17Yere, a bita tesi tron mi ferlusu.
Na Yu, Yu hori a libi fu mi fu a no go ini a grebi fu pori,
bika ala den sondu fu mi Yu trowe na Yu baka.
18Dedekondre no man gi Yu tangi.
Dede no man gi Yu grani.
Den di saka go ini a grebi no man howpu na Yu tapu moro,
taki Yu de fu fertrow.
19Ma na a wan di de na libi, a wan di de na libi,
na en e prijse Yu, soleki fa mi e du tide.
Wan p'pa e meki den pikin fu en sabi
taki Yu de fu fertrow.
20MASRA langa wan anu gi mi.
Meki un prei tapu den instrumenti fu unu di abi snaar,
ala dei fu un libi ini a oso fu MASRA.”
21Dan Yesaya taki: “Un masi wantu figa tron wan papa dan un poti en tapu a butsweri, dan a o betre.” 22Hiskia ben aksi taki: “Sortu marki mi o kisi taki mi o man go baka na a oso fu MASRA?”
