Yeremia 1

₁Den sani di Yeremia taki. Yeremia ben de a manpikin fu Hilkia, wan priester fu a foto Anatot ini a kontren fu a lo fu Benyamin. ₂MASRA taki nanga Yeremia di kownu Yosia fu Yuda ben de tin-na-dri yari na makti. Yosia ben de a manpikin fu Amon. ₃MASRA taki nanga Yeremia tu di Yoyakim, a manpikin fu Yosia, ben de kownu fu Yuda. A taki nanga Yeremia te kon miti a di fu erfu yari di Sedekia, wan tra manpikin fu Yosia, ben de na makti. Ini a di fu feifi mun fu a yari dati feyanti tyari den sma fu Yerusalem nanga tranga gwe na wan tra kondre.

₄MASRA taki nanga mi. A taigi mi taki: ₅“Mi ben sabi yu fosi mi ben seti yu poti ini yu m'ma bere, èn Mi poti yu na wan sei fu du Mi wroko fosi yu ben gebore. Mi poti yu leki wan profeiti gi ala folku.” ₆Ma mi piki taki: “Tye Masra MASRA, luku, mi no o man taki gi Yu, bika mi yongu tumsi.” ₇Ma MASRA taigi mi taki: “Yu no mus taki dati yu yongu, bika yu o go na ibri sma di Mi o seni yu go èn yu o taki ala sani di Mi o komanderi yu fu taki. ₈Yu no abi fu frede gi no wan sma, bika Mi de nanga yu fu ferlusu yu. Na so MASRA taki.” ₉Dan MASRA langa En anu èn A fasi a mofo fu mi. Dan A taigi mi taki: “Luku, Mi e poti den wortu fu Mi ini yu mofo. ₁₀Yere, tide Mi e gi yu makti abra ala folku nanga kondre fu den kownu, fu hari den puru èn fu broko den, fu pori den èn fu masi den, fu bow den èn fu prani den.”

₁₁MASRA taki nanga mi, A aksi mi taki: “Yeremia, san yu e si?” Mi piki: “Mi e si wan amandrataki.” ₁₂Dan MASRA taki: “Yu si bun, bika Mi e luku fu si taki san mi taki e psa.”

₁₃MASRA taki baka nanga mi, A aksi mi taki: “San yu e si now?” Mi piki: “Mi e si wan patu nanga sani ini en di e kuku, èn a e kanti kon na unu fu noordsei.” ₁₄Dan MASRA taigi mi taki: “Bigi ogri o kmopo fu noordsei kon tapu ala den sma fu a kondre disi. ₁₅Bika yere, Mi e kari ala den folku fu den kondre fu den kownu fu noordsei kon. Na so MASRA taki. Den sa kon dan den o poti den kownusturu fesi den bigi doro fu Yerusalem, lontu den skotu fu en èn lontu ala den tra foto fu Yuda. ₁₆Dan Mi sa leisi strafu gi a pipel disi fu ala den ogri di a du. Bika den gwe libi Mi fu go bron wierook gi tra gado èn fu go boigi gi sani di densrefi meki. ₁₇Ma yu, Yeremia, meki yu klari. Seti yusrefi dan yu e go taigi den ala san Mi e komanderi yu. No meki den tapu skreki gi yu, noso Mi o tapu skreki gi yu leti na den fesi. ₁₈Misrefi o meki yu de leki wan tranga foto, leki wan isri postu, leki wan skotu di meki fu kopro, soso fu yu kan tnapu tranga te a heri kondre, den kownu fu Yuda, den man di e yepi en tiri a kondre, den priester nanga den sma fu a kondre, o wani feti yu. ₁₉Awinsi den o feti yu, den no o man wini yu, bika Mi de nanga yu fu ferlusu yu. Na so MASRA taki.”