A folku wani kiri Yeremia
1No langa di kownu Yoyakim, a manpikin fu Yosia, ben de na makti ini Yuda, MASRA gi Yeremia a boskopu disi: 2“Na disi MASRA e taki: Go tnapu tapu a pren fu a oso fu MASRA dan yu e taki nanga ala den sma di kmopo fu den foto fu Yuda, fu anbegi ini a oso fu MASRA. Taigi den ala san Mi e komanderi yu fu taki, no hori noti na baka. 3Kande den sa arki èn tapu nanga a ogri di den e du. Dan Mi no sa meki a bigi ogri di Mi poti e wakti den, fu den takrudu fu den, miti den moro. 4Taigi den taki: Na disi MASRA e taki: Efu un no wani arki Mi, efu un no e libi leki fa a wèt di Mi gi unu e taki, 5efu un no e arki den sani di den knekti fu Mi, den profeiti, e taigi un dorodoro, efu un e gi den dofusei, 6dan Mi o du nanga a oso disi leki fa Mi du nanga Silo èn ala folku fu grontapu o teki a nen fu a foto disi leki wan fluku.”
7Den priester, den profeiti nanga a heri pipel yere den sani di Yeremia taki ini a oso fu MASRA. 8We, di Yeremia kba taki ala san MASRA ben komanderi en fu taigi a heri folku, den priester, den profeiti nanga a heri folku grabu en. Den bari taki: 9“Un o kiri yu! Fa yu kan prefuru fu taki ini a nen fu MASRA taki a srefi sani di psa nanga Silo o psa nanga a oso disi, èn dati a foto disi o broko pis'pisi te na gron èn dati no wan sma o tan moro na ini.” A heri folku ben kon na tapu Yeremia ini a oso fu MASRA. 10Di den man di e yepi fu tiri Yuda yere san e psa, den kmoto fu a kownu-oso go na a oso fu MASRA. Den go teki presi na a Nyun poort fu a oso fu MASRA. 11Dan den priester nanga den profeiti taigi den man di e yepi tiri a kondre nanga a heri pipel taki: “A strafu di a man disi mus kisi na dati a mus dede. Unsrefi yere den sani nanga un eigi yesi di a taki dati Masra gi en fu taki abra a foto disi.” 12Ma Yeremia taigi ala den man di e tiri a kondre nanga a heri folku taki: “Na MASRA seni mi fu taki ala den sani di un yere mi taki fu a oso nanga a foto disi. 13Dat' meki a moro betre un kenki a fasi fa un e libi èn arki a sten fu MASRA, a Gado fu unu. Dan MASRA no sa meki a ogri di A taki dati o miti unu, miti un moro. 14Ma yere, mi fu mi sei de ini un anu. Un kan du nanga mi san un si dati bun. 15Ma un mus ferstan dati efu un kiri mi un o meki brudu lon fu soso èn dati unu, a foto disi nanga den sma fu en, o pai fu dati. Bika a tru dati na MASRA seni mi kon na unu fu taigi un ala den sani di mi taki.” 16Ne den man di e tiri a kondre nanga a heri pipel taigi den priester nanga den profeiti taki: “No, a man disi no fiti fu dede, bika na ini a nen fu MASRA, a Gado fu unu, a taki nanga unu.” 17Wantu fu den moro owru bigiman fu kondre srefi opo tnapu, dan den taigi a heri pipel di ben kon makandra drape taki: 18“Di kownu Hiskia fu Yuda ben de na makti, na Mika fu a foto Moreset ben de profeiti. A ben taigi a heri pipel fu Yuda taki: ‘Na disi MASRA fu ala sani e taki: Sion sa tron wan pranigron pe sma o drai a doti, Yerusalem sa tron bigi ipi broko ston èn a bergi tapu san a tempel tnapu o tron wan busi.’ 19Ma kownu Hiskia nanga den sma fu Yuda no kiri Mika fu dati. Hiskia ben e lespeki MASRA èn a meki muiti fu MASRA sori den En sari-ati. Dan MASRA no meki a ogri di A ben taki dati o miti den, miti den moro. We, efu un kiri a man disi na bigi ogri un o kari kon na un tapu.”
20Ma wan tra man ben de tu di ben e taki sani leki wan profeiti ini a nen fu MASRA. Dati ben de Uria, a manpikin fu Semaya. A man disi ben de fu a foto Kiryat-Yearim. Uria srefi ben e taki san Masra ben gi en fu taki fu a foto Yerusalem nanga fu Yuda, èn na densrefi sani a ben taki di Yeremia ben taki. 21Ma di kownu Yoyakim, den dyadya fetiman fu en, nanga den tra man di e yepi en tiri a kondre yere san a man dati ben taki, kownu ben wani kiri en. Di Uria kisi dati fu yere a kon frede dan lowe go na Egiptekondre. 22Ma kownu Yoyakim seni Elnatan, a manpikin fu Akbor, nanga wantu man go na Egipte. 23Den teki Uria tyari kon baka dan den tyari en go na kownu. Kownu meki den kiri en nanga deigri, dan a meki den fringi a dedeskin fu en pe den tra sma fu a foto ben e beri.
24Ma Akikam, a manpikin fu Safan, ben hori baka gi Yeremia. So a no kon ini a anu fu a pipel di ben wani kiri en.
