1MASRA taki nanga mi. A taigi mi taki: “Efu wan man prati nanga en uma dan a uma trow nanga wan tra man, a fosi masra fu en no kan teki en baka. So wan sani sa pori a heri kondre. Ma yu, Israel, huru nanga someni man, dan fa yu wani drai kon baka na Mi? Na so MASRA taki.
2Opo yu ede luku den pikin bergi
pe sani no e gro moro.
Tapu sortu wan fu den yu no huru?
Yu ben sidon wakti den man fu yu sei a pasi,
neleki fa abani e sidon wakti sma
di e hari psa ini a dreisabana.
Yu pori a kondre nanga a takru huru di yu huru.
3Na dat' meki alen no fadon,
no ini a pikin alenten,
no ini a bigi alenten.
Ma yu tan poti yu fesi leki di fu wan huru,
sondro wan enkri syen.
4Dan yu e taki now taki:
‘Yu na mi P'pa,
Yu ben lobi mi sensi di mi ben yongu.
5A atibron fu Yu o saka wan ten,
Yu no o tan mandi na mi tapu fu têgo.’
Ma yere, dati na san yu e taki,
ma yu du ogri èn yu no wani fu tapu nanga en.”
Israel nanga en sisa Yuda
6A pisten di kownu Yosia ben de na makti, MASRA taigi mi taki: “Yu si fa Israel drai en baka gi Mi? A huru gi Mi tapu ibri hei bergi nanga ondro ibri bon di lai wiwiri. 7Dan Mi prakseri taki: Te a du te a sari en, a sa drai kon baka na Mi. Ma a no drai kon. Yuda, a s'sa fu en di no de fu fertrow, si dati. 8Ma Mi si dati di Mi yagi Israel, di drai en baka gi Mi, èn di Mi gi en a brifi di e sori taki a trow broko, dati Yuda, a s'sa fu en di no de fu fertrow, no skreki srefsrefi, ma a gwe go huru fu en tu. 9A huru di a e huru so makriki nanga gado di meki fu ston nanga udu, pori a kondre. 10Baka dati Yuda, a s'sa di no de fu fertrow, drai kon na Mi. Ma a no du en nanga en heri ati, a du en fu kori sma. Na so MASRA taki.” 11MASRA taigi mi moro fara taki: “Israel di drai en baka gi Mi, bun moro Yuda di no de fu fertrow.
12We, go, dan yu e bari taigi den di e libi na noordsei taki:
Israel, yu di drai yu baka gi Mi,
drai kon baka! Na so MASRA taki.
Mi no sa luku yu nanga atibron,
bika Mi abi sari-ati,
na so MASRA taki.
Mi ati no sa bron fu têgo.
13Wan sani nomo yu mus du.
Yu mus ferstan taki yu no du bun,
dati yu ben gwe fu MASRA,
a Gado fu yu,
dati yu ben gwe na baka tra gado
na ondro ibri bon nanga furu wiwiri,
èn dati yu no ben arki san Mi ben taki.
Na so MASRA taki.
14Un drai kon baka, pikin di drai den baka gi Mi, na so MASRA taki, bika unu na fu Mi. Mi o teki unu, wán fu ibri foto nanga tu fu ibri famiri, dan Mi o tyari un kon baka na Sion. 15Mi o gi un tiriman di Misrefi teki, fu luku unu. Den o tiri unu nanga sabi èn nanga ferstan. 16Dan te un kon moro furu a ten dati, te libisma o furu a kondre baka, na so MASRA taki, a no o de fanowdu moro fu sma taki fu a santa kisi fu a ferbontu fu MASRA. No wan sma o prakseri en moro, no wan sma o taki fu en moro, no wan sma o suku fu en moro, èn no wan nyun wan o meki moro. 17A ten dati sma o kari Yerusalem: A Kownusturu fu MASRA. Dan ala folku sa hari kon drape ini Yerusalem fu gi Mi, MASRA, grani. Èn den o tapu fu du san a takru ati fu den ben e gi den nomonomo fu den du. 18Ini a ten dati tu den sma fu Yuda sa go moksi nanga den sma fu Israel, èn makandra den o kmopo fu a kondre na noordsei kon na a kondre di Mi ben gi den afo fu den taki na fu densrefi.
19Israel, Mi ben prakseri taki:
Mi o gi yu wan hei presi na mindri den tra folku,
Mi o gi yu wan bun èn switi kondre,
wan kondre di moi moro ala trawan na grontapu,
wan kondre di o de fu yusrefi.
Dan Mi prakseri taki yu o kari Mi: ‘Mi P'pa’,
èn dati yu no ben o gwe libi Mi.
20Ma, sma fu Israel,
leki fa wan uma e bedrigi en masra,
na so yu bedrigi Mi.
Na so MASRA taki.
21Wan babari de fu yere tapu den pikin bergi pe sani no e gro:
na a pipel fu Israel e krei èn begi gi sari-ati.
Den libi wan sondu libi fu di den fergiti MASRA,
a Gado fu den.
22Un drai kon baka,
pikin di drai den baka gi Mi.
Dan Mi sa dresi unu fu a wakawaka libi.
Dan un sa taki:
‘Luku, dyaso wi de,
wi e drai kon baka na Yu,
bika Yu na MASRA, a Gado fu wi.
23A tru, na kori wi ben kori wisrefi
na tapu den pikin bergi,
a babari di wi ben meki tapu den bergi
no du noti.
A tru, na MASRA, a Gado fu wi, a ferlusu fu Israel de.
24Iya, bun langa kba, Baal, a gado fu ala syen,
swari den sani fu wi afo
gi san den wroko so tranga:
den skapu, den kaw, den manpikin nanga den umapikin.
25Meki wi trowe wisrefi na gron, fu soso syen,
meki syen naki unu.
Bika wi nanga den afo fu wi sondu,
un no du san MASRA, a Gado fu wi wani,
sensi di wi yongu, te leki tide.
Wi no arki tu san MASRA, a Gado fu wi, ben taigi wi.’
