Yohanes 11

₁Wan man Lasarus ben e siki. A ben de fu a dorpu Betania, pe Maria nanga en sisa Marta ben e libi. ₂A Maria disi na a uma di ben kanti a switismeri-oli tapu Yesus, dan a drei den futu fu En nanga en edewiwiri. Na en brada Lasarus ben e siki. ₃So den tu s'sa seni boskopu gi Yesus taki: “Masra, a wan di Yu lobi so, e siki.” ₄Di Yesus kisi a boskopu, A taki: “Dede no sa de a kba fu a siki disi, ma a psa fu Gado nanga En Manpikin kisi grani.” ₅Yesus ben lobi Marta, nanga en s'sa, nanga Lasarus. ₆Ma di A yere taki Lasarus e siki, A tan ete tu dei na a presi pe A ben de. ₇Baka den tu dei, A taigi den man di ben e teki leri fu En taki: “Kon meki un drai go baka na Yudea.” ₈Ne den man di ben e teki leri fu En taki: “Ma Meister, a no langa di den Dyusma ben wani ston Yu kiri. Dan Yu wani drai go drape baka?” ₉Yesus piki den taki: “Twarfu yuru fu wan dei na deiten. Efu wan sma e waka deiten, a no e stotu en futu, bika a e si pe a e go. ₁₀Ma efu a e waka neti yuru, a e stotu en futu, bika ensrefi no abi faya.” ₁₁Baka di Yesus taki a sani disi, A taigi den moro fara taki: “Un mati Lasarus e sribi, ma Mi e go wiki en.” ₁₂Dan den man di ben e teki leri fu En taigi En taki: “Ma Masra, efu na sribi a e sribi, a o kon betre baka.” ₁₃San Yesus ben wani taki, na taki Lasarus dede. Ma den man di ben e teki leri fu En ben ferstan taki na sribi Lasarus e sribi. ₁₄Ne A taigi den krin taki: “Lasarus dede. ₁₅Ma Mi breiti gi unu taki Mi no ben drape, bika now a bribi fu unu kan kon moro tranga. Kon meki un go na en.” ₁₆Wan fu den man di ben e teki leri fu Yesus di ben nen Tomas, ma den ben e kari en Didimus tu, taigi den trawan taki: “Kon meki un go, dan un dede nanga En.”

₁₇Di Yesus doro, A kisi fu yere taki Lasarus ben beri fo dei kba. ₁₈Betania ben de krosbei fu Yerusalem, a no ben doro dri kilometer srefi. ₁₉Furu fu den Dyusma ben kon na Marta nanga Maria fu trowstu den fu di den lasi den brada. ₂₀Di Marta yere taki Yesus e kon, a waka go miti En. Ma Maria tan sidon na oso. ₂₁Dan Marta taigi Yesus taki: “Masra, efu Yu ben dya, mi brada no ben o dede. ₂₂Ma aladi a dede kba, mi sabi taki Gado o gi Yu ala san Yu e aksi En.” ₂₃Dan Yesus taigi en taki: “Yu brada o kon na libi baka.” ₂₄Marta piki taki: “Mi sabi taki a o kon na libi baka tapu a laste dei, te ala dedesma o opo baka.” ₂₅Yesus taki: “Na Mi e wiki dede èn na Mi e gi libi. A sma di e bribi na ini Mi sa libi, awinsi a dede. ₂₆Èn iniwan sma di e libi èn di e bribi na ini Mi, no sa dede noiti moro. Yu e bribi dati?” ₂₇Marta piki En taki: “Iya Masra, mi e bribi taki Yu na a Mesias, a Manpikin fu Gado di ben o kon na grontapu.”

₂₈Di Marta taki disi, a drai go kari en s'sa Maria, dan a taigi en safrisafri taki: “A Meister doro. A seni kari yu.” ₂₉Di Maria yere dati, a opo wantron go na Yesus. ₃₀Yesus no ben doro ini a dorpu ete. A ben tnapu ete pe Marta ben miti En. ₃₁Den Dyusma di ben de nanga Maria ini a oso fu trowstu en, si fa a opo es'esi go na dorosei, dan den waka go na en baka. Den ben prakseri taki na krei a e go krei na a grebi.

₃₂Di Maria doro pe Yesus ben de èn a si En, a fadon tapu en kindi na En futu, dan a taki: “Masra, efu Yu ben dya, mi brada no ben o dede.” ₃₃Di Yesus si fa Maria nanga den Dyusma di kon nanga en e krei, A soktu dipi. Dan nanga dipi sari ₃₄A aksi den taki: “Pe un beri en?” Den piki En taki: “Masra, kon meki un sori Yu.” ₃₅Dan Yesus krei. ₃₆Ne den Dyusma taki: “Tye, yu kan si taki A ben lobi en.” ₃₇Ma sonwan fu den taki: “Efu a Man disi ben man meki a breniman si baka, fa A no ben kan meki a man disi no dede?” ₃₈Yesus soktu baka dan A waka go na a grebi. A ben de wan bergi-olo èn a mofo fu en ben tapu nanga wan ston. ₃₉Dan Yesus taki: “Un puru a ston!” Ma Marta, a s'sa fu a wan di dede, taki: “Masra, a musu e smeri, bika na fo dei a dede kba.” ₄₀Ma Yesus taigi en taki: “Mi no taigi yu tak' efu yu e bribi, yu o si a glori fu Gado?” ₄₁So den puru a ston. Dan Yesus opo En ai go na loktu, A taki: “Mi P'pa, Mi e taki Yu tangi taki Yu piki Mi begi. ₄₂Mi sabi taki ala leisi Yu e piki Mi begi. Ma Mi e taki so fu den sma ede di tnapu lontu Mi, fu den bribi taki na Yu seni Mi kon.” ₄₃Baka di Yesus begi, A bari taki: “Lasarus, kon na dorosei!” ₄₄Dan a man di ben dede kon na dorosei. En anu nanga en futu ben domru nanga dedekrosi èn en ede ben domru nanga wan duku. Dan Yesus taigi den taki: “Un puru den sani na en skin, dan un meki a go.”

₄₅Furu fu den Dyusma di ben kon na Maria, bribi ini Yesus di den si san A du. ₄₆Ma wantu fu den go ferteri den Fariseiman san Yesus du. ₄₇Dan den prenspari priester nanga den Fariseiman kari a grankrutu fu den Dyusma kon na wan. Den aksi den taki: “San wi o du nanga a man disi, bika A e sori den sma someni marki. ₄₈Efu wi libi En meki A du san A wani, ala sma o bribi ini En. Dan den Romeinisma o kon broko a presi disi èn den o yagi a pipel.” ₄₉Wan fu den man ben nen Kayafas. Na en ben de granpriester a yari dati. A taigi den taki: “Un no sabi noti! ₅₀Na ferstan un no man ferstan taki a moro bun gi unu taki wan man nomo dede gi a pipel, prefu ala sma dede?” ₅₁Kayafas no ben taki a sani disi fu ensrefi, ma leki granpriester fu a yari dati, a ben e taki na fesi taki Yesus ben o dede gi a pipel fu Israel. ₅₂Ma a no gi den wawan. A ben o dede tu gi den tra pikin fu Gado di panya na grontapu, fu tyari den kon na wan. ₅₃Bigin fu a dei dati den bigin kruderi fa den ben o man kiri Yesus.

₅₄Dat' meki Yesus no ben e waka fri moro na mindri den Dyusma. A go na a foto Efraim, san de ini wan kontren krosbei fu a dreisabana. Dan A tan drape nanga den man di ben e teki leri fu En.

₅₅A Paskafesa fu den Dyusma ben de krosbei. Dat' meki furu sma ben e hari kmopo fu den boiti presi go na Yerusalem, fu meki densrefi klari gi a Paskafesa fosi a bigin. ₅₆Den sma ben e luku efu den ben o si Yesus. Di den ben de ini a tempel, a wan ben e aksi a trawan taki: “Yu prakseri taki Yesus o kon na a fesa?” ₅₇Bika den prenspari priester nanga den Fariseiman ben taigi den sma taki efu den sabi pe Yesus de, dan den mus fu kon taigi den, fu den kan grabu En.