A di fu tu leisi di Sofar taki
1Dan Sofar fu Naama bigin taki baka. A taigi Yob taki:
2“Mi mus piki yu fu di den prakseri fu mi e dangra mi.
èn a e kuku na mi inisei.
3Den sani di mi yere yu taki afrontu mi,
ma fu di mi e ferstan sani bun,
mi sabi fa fu piki yu.
4Yu mus sabi taki sensi di grontapu meki,
sensi di libisma de na grontapu,
5tak' a prisiri fu ogri-ati sma
na fu wan syatu pisten nomo,
èn di fu den sma di no wani dini Gado
na fu wan momenti nomo.
6Awinsi a heimemre fu en e doro te na heimel,
èn a ede fu en e miti den wolku,
7leki en eigi morsu a o kmopo fu têgo na pasi,
den sma di ben si en o aksi taki: ‘Pe a de?’
8A o psa gwe leki wan dren,
a no o de fu feni moro,
den e fergiti en
leki sani di sma e si na ini den sribi.
9Den ai di ben gwenti si en, no e si en moro,
a tanpresi fu en srefi no o si en moro tu.
10Den manpikin fu en
o abi fu go saka densrefi gi den pôtisma,
èn gi den ala a gudu baka
di den p'pa ben puru na den anu.
11A skin fu en kan lai krakti,
leki di fu wan yongusma,
ma a o go nanga en ini en grebi.
12Awinsi a ogri switi na ini en mofo,
awinsi a e kibri en ondro en tongo,
13tapu en drape fu kan tesi en moro langa,
kwinsi en hori na loktusei fu en mofo,
14a e drai en bere te a psa go drape,
a e tron a bita fu wan takru sneki na ini en bere.
15Sma gudu a ben swari,
ma a abi fu puru den kon na doro baka.
Gado srefi e meki a spiti den puru.
16Na a bita fu wan takru sneki a ben e soigi,
wan sneki sa beti en kiri tu.
17A no sa sabi a prisiri fu abi sani bogobogo,
fu liba fu merkilun nanga oni di e lon abra.
18Ala san a ben tyari nanga muiti kon na wan,
a abi fu gi baka, a no kan swari en,
a no o man prisiri tu nanga a moni di a meki.
19Bika a pina pôtisma,
a libi den na ini den benawtu,
teki oso abra, di a no en meki.
20Fu di a gridi fu en e meki tak' sani no e sari en,
a no man kibri no wan fu den gudu fu en.
21A e nyan ala san a abi,
dat' meki a bun ten fu en, no e tan fu langa.
22Awinsi fa a gudu, a de na ini benawtu,
ala ogri di a du sma e miti en.
23Na furu a ben e furu en bere ete,
di Gado lusu a faya atibron fu En leki alen na en tapu.
A e firi en te na ini en inisei.
24A kan lon o tranga a wani gi a isri fetisani,
ma a kopro peiri sa boro en nomonomo.
25A peiri boro a skin fu en, tak' a de fu si na a tra sei
a gari fu en e dropu na mofosei fu a peiri,
frede dede naki en.
26Bigi dungru de klar'klari e wakti en,
wan faya, di a no sma leti, e bron en,
a faya e pori ala tra sani tu di de ini en oso.
27Heimel e tyari den kruktudu fu en kon na krin,
grontapu e sori finga na en tapu.
28Tranga skwala e srepi a oso fu en tyari gwe,
den e srepi en tyari gwe tapu a dei
fu a hebi atibron Gado.
29Na den sani disi Gado kibri gi den ogri-ati sma,
a paiman di Ensrefi poti e wakti en.”
