Yob e taki abra koni
1“Yu abi presi pe sma e diki solfru
nanga presi pe sma e bron gowtu puru ala a doti.
2Sma e puru isri tu ini a gron
èn bron ston puru a kopro di de na ini.
3Te den e go diki ondro a gron,
den e tyari faya,
den e diki te pe den kan go
fu ondrosuku den ston ini a dipi dungru.
4Farawe fu pe sma e libi
den e meki olo ini a gron,
nanga titei den e saka go ini a olo,
den e firifiri pe den kan poti den futu,
sma no e psa drape srefsrefi.
5Tapusei a karu e gro fu en,
ma ondro a gron, faya e bron leki not'noti.
6Bika na drape abi a diri ston safier,
èn gowtu fasi na den diri ston dati leki puiri.
7No wan aka sabi a pasi di e go drape,
no wan tingifowru man si en tu.
8Tranga bus'meti no e go na en tapu,
lew srefi no e waka drape.
9Libisma e naki a tranga ston broko,
den e diki go te na den fundamenti fu den bergi.
10Den e kapu pasi ini den bergiston fu watra kan lon,
den e luku fin'fini fu kan si ibri diri ston drape.
11Den e tapu a watra fu pe a e kmopo ini a gron,
èn den e tyari den gudu kon na krin di kibri drape.
12Ma koni, pe a de fu feni?
Pe a tanpresi fu ferstan de?
13Libisma no sabi a warti fu en,
èn a no de fu feni tu na grontapu pe den e libi.
14Den watra di de dipi ondro a gron e taki:
‘A no de ini mi,’
a se e taki:
‘A no de na mi.’
15Koni no de fu bai nanga gowtu,
yu no kan pai fu en nanga solfru.
16A diri moro a fini gowtu fu Ofir,
èn moro leki difrenti diri ston.
17Gowtu nanga grasi srefi no diri leki en,
a no de fu kenki tu gi skarki fu lala gowtu.
18Koraal nanga kristal no man tnapu na en sei tu,
koni diri moro redi koraal.
19A no de fu marki nanga a diri ston topaas fu Etiopia,
noso nanga lala gowtu.
20A koni disi, pe a kmopo dan?
Pe a tanpresi fu ferstan de?
21A kibri gi a ai fu ala libisani,
srefi den fowru di e frei na loktu no man si en.
22Dedekondre nanga dede e taki:
‘Na yere nomo den yesi fu wi yere fu en.’
23Na Gado wawan sabi a pasi fu go na en,
na En wawan sabi pe a de fu feni.
24Bika Gado e si go te na a kba pisi fu grontapu,
ala sani ondro a heimel A e si.
25Di Gado poti o hebi a winti mus de,
o bigi a se mus de,
26di A meki wan wèt gi a alen,
nanga wan pasi gi a faya fu a dondru,
27dan A luku koni bun,
A luku en go, A luku en kon,
dan A poti en leki wan sani di bun.
28Ma libisma A taigi taki:
‘Un arki, lespeki MASRA, dati na koni,
fu libi a ogri, dati na ferstan.’ ”
