Un mus drai un libi
1A srefi ten dati wantu sma kon taigi Yesus fa granman Pilatus kiri wantu man fu Galilea, èn fa a meki a brudu fu den moksi nanga a ofrandi san den ben e tyari gi Gado. 2Yesus piki den taki: “Un no mus prakseri taki fu di den man disi dede sowan fasi, taki den ben abi moro sondu moro den tra sma fu Galilea. 3Nono. A no de so kwet'kweti. Ma efu un no drai un libi, un alamala o dede leki den! 4Èn di a hei wakti-oso na Siloam fadon kiri tin-na-aiti sma, un prakseri taki den sma dati ben abi moro sondu moro den tra sma di e libi ini Yerusalem? 5Nono. A no de so kwet'kweti. Ma efu un no drai un libi, un alamala o dede leki den!”
A figabon di no ben e gi froktu
6Dan Yesus gi wan agersitori. A taki: “Wan man ben abi wan figabon san a ben prani na ini en droifidyari. A man ben go fu piki froktu na a bon, ma a bon no ben abi froktu. 7Dan a taigi a man di e luku a droifidyari taki: ‘Luku, na dri yari kba mi e kon fu piki froktu na a figabon disi. Ma mi no e feni. Kapu en puru! Na fu soso a de dya e mangri a gron.’ 8Ma a man piki en taki: ‘Masra, libi a bon ete wan yari. Mi o diki lontu a bon, dan mi o krabu doti poti gi en. 9Efu a yari san e kon a gi froktu, dan a bun. Ma efu a no gi, dan yu kan kapu en trowe.’ ”
Yesus dresi wan sma tapu a sabatdei
10Tapu wan sabatdei Yesus ben e gi leri na ini wan fu den kerki. 11Dan now wan uma ben drape. Tin-na-aiti yari kba wan takruyeye ben meki en skin kon swaki. A uma disi ben kron, a no ben man tnapu let'opu srefsrefi. 12Di Yesus si en, A kari en kon, dan A taigi en taki: “Uma, yu kon fri fu a sani san e swaki yu skin.” 13Yesus poti En anu na en tapu, dan wantron a tnapu let'opu, èn a bigin gi Gado grani. 14Ma a edeman fu a kerki ben mandi di Yesus dresi wan sma tapu a sabatdei. Dan a taigi ala den sma drape taki: “Siksi dei de ini wan wiki fu wroko. Un kon tapu wan fu den dei dati fu den dresi unu, ma no kon tapu a sabatdei.” 15Ma Masra piki en taki: “Un hoigriman! Tapu a sabatdei un alamala e lusu un kaw nanga un buriki puru ini a pen fu tyari den go dringi. 16We, a uma disi na wan bakapikin fu Abraham. Luku, tin-na-aiti yari langa Satan ben tai en hori. So a fiti fu lusu a banti disi tapu a sabatdei.” 17Di Yesus taki so, ala den sma firi syen di no ben agri nanga san A ben du. Ma ala den tra sma ben breiti nanga ala den bigi sani san Yesus ben du.
Agersitori fu a tiri fu Gado
18Dan Yesus taki: “San Mi kan teki fu sori unu fa Gado e tiri libisma? Leki san un kan si en? 19A de leki wan mosterdsiri san wan sma prani ini en dyari. A gro tron wan bon, èn den pikinfowru meki den nesi na ini.” 20Yesus taki moro fara: “San Mi kan teki fu sori unu fa Gado e tiri libisma? 21A de leki dyesi di wan uma e teki poti ini bun furu blon. Dan a dyesi e meki ala a blon kon sweri.”
A smara doro
22Yesus ben de na pasi e go na Yerusalem. A ben e waka psa ini den foto nanga den dorpu e gi den sma leri. 23Dan wan sma aksi En taki: “Masra, na wantu sma nomo Gado o ferlusu?” 24Yesus piki en taki: “Meki ala muiti fu psa ini a smara doro. Bika Mi e taigi un taki: Furu sma o pruberi fu psa, ma den no o man. 25Te a man di abi a oso, opo go sroto a doro, dan un o tnapu na dorosei. Un o naki tapu a doro e taki: ‘Masra, opo a doro gi unu!’ Ma A o piki un taki: ‘Mi no sabi unu. Pe un kmopo?’ 26Dan un o taki: ‘Un ben nyan, dringi makandra nanga Yu, èn Yu ben gi leri na tapu den strati fu unu.’ 27Ma A o piki un taki: ‘Un kmopo na mi fesi, un ogri-ati sma. Mi no sabi unu. Pe un kmopo?’ 28Dan un o krei èn kaw un tifi te un si Abraham, Isak, Yakob, nanga ala den profeiti na mindri den sma di Gado e tiri. Ma unu den o fringi poti na dorosei. 29Sma o kmopo na ala sei fu grontapu fu sidon nyan makandra nanga den sma di Gado e tiri. 30Arki. Sonwan fu den lastewan o tron fosiwan, èn sonwan fu den fosiwan o tron lastewan.”
Yesus mus dede na Yerusalem
31A srefi pisten dati, wantu Fariseiman kon na Yesus. Den taigi En taki: “Yu mus kmopo fu dyaso go na wan tra presi, bika Herodes wani kiri Yu.” 32Yesus piki den taki: “Un go taigi a awari dati gi Mi taki: Luku, tide nanga tamara Mi o yagi takruyeye puru na sma tapu, èn Mi o dresi sma. Tapu a di fu dri dei, Mi klari nanga Mi wroko. 33Ma tide, tamara nanga tra tamara Mi mus waka go moro fara. Bika a no fiti fu den kiri wan profeiti dorosei fu Yerusalem. 34Ai, Yerusalem, Yerusalem, yu di e kiri den profeiti èn di e ston den sma kiri di Gado seni kon na yu! Mi kari den pikin fu yu someni leisi fu kon na Mi, soleki fa wan m'mafowru e kari en pikin kon ondro en frei. Ma un no ben wani. 35Luku, a oso fu unu o tan leigileigi na baka. Mi e taigi un taki: Un no o si Mi moro te leki a dei di un taki: A Wan di e kon ini a nen fu Masra na wan blesi sma.”
