Maleaki 2

₁“Dat' meki na disi Mi e taigi unu, priester: ₂Efu unu no wani arki, efu un no prakseri bun san Mi e taki, fu un lespeki Mi, dan Mi sa fluku unu èn Mi sa fluku ala sani nanga san Mi ben blesi unu, MASRA fu ala sani taki. Mi sa fluku un trutru bika un no teki den sani na ati. ₃Luku, Mi sa strafu den bakapikin fu unu. Mi sa teki a doti fu den meti di den tyari leki ofrandi, dan Mi fringi en gi unu na ini un fesi. Iya, den o teki un makandra nanga a doti go trowe tapu a dot'ipi. ₄Dan un sa ferstan taki na Mi meki disi psa, fu a ferbontu fu Mi nanga Lefi no broko. Na disi MASRA fu ala sani taki. ₅A ferbontu di Mi ben meki nanga en ben o tyari libi nanga freide gi en. Mi gi en disi fu a ben kan lespeki Mi èn nanga wan dipi lespeki a dini Mi. ₆Yu ben man fertrow den sani fu a wèt di a ben e leri den sma. No wan sani di no bun ben e kmoto ini en mofo. A ben e libi wan bun fasi nanga Mi èn nanga trawan. A meki furu sma drai den baka gi ogridu. ₇Bika furu sabi de ini a mofo fu a priester. Fu en mofo den sma wan leri a wèt, bika en na wan boskopuman fu MASRA fu ala sani. ₈Ma unu dati kmoto fu a pasi di Mi sori unu. Den sani fu a wèt di un leri den sma meki furu sma du sani di den no ben mus du. Un broko a ferbontu fu Mi nanga Lefi, MASRA fu ala sani taki. ₉Fu dat'ede Mi o meki taki a heri folku no e lespeki unu èn taki den e si unu fu noti. Bika un no e libi leki fa Mi wani èn un e si a wèt leki noti.”

₁₀Wi alamala abi a srefi P'pa. Na a srefi Gado meki wi alamala. Fu sanede meki wi e bedrigi makandra èn broko a ferbontu di Gado meki nanga den afo fu wi. ₁₁Yuda no ben dini Gado wawan. Ini Israel nanga Yerusalem den sma du wan bigi ogri. Bika Yuda pori a santa sani fu MASRA, a sani di A lobi, fu go trow nanga wan uma di e dini wan tra gado. ₁₂Mi e winsi tak' MASRA sa yagi a man di du a sani disi puru na mindri den Israelitisma, awinsi a e tyari ofrandi gi MASRA fu ala sani. ₁₃Moro fara un e nati a altari fu MASRA nanga watra-ai. Un e krei èn un e dyeme fu di A no e luku den ofrandi fu un moro. A no e teki den fu un anu tu fu di a no e prisiri nanga den. ₁₄Dan un e aksi unsrefi taki: Fu sanede dan? Disi e psa fu di MASRA ben de ketoigi fu a ferbontu di yu ben meki nanga yu uma di yu ben yongu. Ma yu broko a ferbontu dati aladi en na yu uma, a uma nanga san yu ben meki a ferbontu. ₁₅No wan sma di abi pikinso ferstan nomo e du sowan sani. Bika ala sma wani abi pikin nanga bakapikin di Gado lobi. Dat' meki yu mus luku yusrefi bun èn yu mus sorgu taki yu no broko a ferbontu di yu ben meki nanga yu uma di yu ben yongu. ₁₆Bika Mi no lobi en srefsrefi te sma e broko trow, MASRA, a Gado fu Israel, e taki. Efu yu du dati, yu e tyari ogri kon na yu tapu. Na dati MASRA fu ala sani taki. Fu dat'ede un mus luku bun taki un no broko trow.

₁₇Un e weri MASRA nanga den sani di un e taki. Dan un e aksi taki: “Nanga san wi e weri En?” Un e weri En ede fu di un e taki tak' ala sma di e du ogri e du san bun ini MASRA ai èn A lobi den sma disi. Ma efu dati de so dan pe a Gado de di e krutu nanga leti?