Mateus 26

₁Di Yesus kba taki ala den sani disi, A taigi den man di ben e teki leri fu En taki: ₂“Un sabi taki tra tamara wi o nyan Paska. Dan den o gi a Manpikin fu Libisma abra na ini anu fu trawan fu den spikri En na wan kroisi.”

₃A srefi yuru dati, den prenspari priester nanga den fesiman fu a folku ben kon makandra ini a oso fu a granpriester Kayafas. ₄Drape den kruderi makandra fa den ben o man kisi Yesus nanga wan triki fu den kan kiri En. ₅Ma den taki: “Un no mus grabu En tapu den dei fu a fesa, noso a folku o meki dyugudyugu.”

₆Yesus ben de na Betania, na a oso fu wan man di den ben kari Gwasi Simon. ₇Di A ben e nyan, wan uma kon na En nanga wan albast batra di ben furu nanga wan bun diri oli. Dan a kanti a oli tapu a ede fu Yesus. ₈Di den man di ben e teki leri fu En si san a uma du, den mandi. Den taki: “Sanede a fermorsu a oli? ₉Un ben kan seri en gi furu moni èn prati a moni gi pôtisma.” ₁₀Ma Yesus ben sabi san den taki, dat' meki A taigi den taki: “Sanede un e krutu a uma disi? Na wan bun sani a du gi Mi. ₁₁Pôtisma de ala ten nanga unu, ma Mi no o de ala ten nanga unu. ₁₂Di a kanti a oli tapu Mi skin, a meki Mi skin klari fu beri. ₁₃Fu tru Mi e taigi un taki: Ala sei fu grontapu pe sma sa ferteri a bun nyunsu disi, den sma o memre a uma fu a sani san a du gi Mi.”

₁₄Dan wan fu den twarfu man, di ben nen Yudas Iskariot, go na den prenspari priester. ₁₅A aksi den taki: “Omeni un o pai mi efu mi gi Yesus abra na ini un anu?” Dan den gi en dritenti solfrumoni. ₁₆Sensi a ten dati, Yudas bigin luru wan bun okasi fu gi Yesus abra na den.

₁₇Tapu a fosi dei fu a fesa pe den e nyan brede san meki sondro dyesi, den man di ben e teki leri fu Yesus kon aksi En taki: “Pe Yu wani fu wi meki sani klari fu Yu kan nyan a Paska-nyanyan?” ₁₈Yesus piki den taki: “Un go na sowan sowan sma ini a foto, dan un taigi en taki: ‘A Meister seni taigi yu taki a ten fu En de krosbei. Na yu oso A o kon nyan Paska nanga den man di e teki leri fu En.’ ” ₁₉Den man du san Yesus taigi den, èn den meki a Paska-nyanyan klari.

₂₀Di neti tapu, Yesus nanga den twarfu man fu En teki presi sei a tafra. ₂₁Dan di den e nyan, Yesus taigi den taki: “Fu tru Mi e taigi un taki: Wan fu unu o seri Mi.” ₂₂Den man sari sote, èn wan fru wan den aksi En taki: “Masra, na mi?” ₂₃Yesus piki den taki: “A wan di dopu en brede ini a srefi komki nanga Mi, na en o seri Mi. ₂₄Bika a Manpikin fu Libisma sa dede leki fa a ben skrifi fu En kba na fesi. Ma a man di seri En mus luku bun! A ben o moro bun gi en efu noiti en m'ma ben meki en.” ₂₅Yudas, a man di seri Yesus, aksi En taki: “Meister, na mi?” Yesus piki en taki: “Na leki fa yu taki.”

₂₆Di den ben e nyan, Yesus teki wan brede, A blesi en, dan A broko en. Baka dati A gi den man di ben e teki leri fu En, dan A taki: “Un teki, dan un nyan. Disi na Mi skin.” ₂₇Dan Yesus teki wan kan nanga win, A taki Gado tangi fu en, dan A gi den man di ben e teki leri fu En. A taki: “Un alamala dringi fu a win. ₂₈Bika disi na Mi brudu san o stampu a ferbontu di Gado meki. A o lon fu meki furu sma kisi pardon fu den sondu. ₂₉Mi e taigi un taki: Mi no o dringi win moro, te leki Mi o dringi nyun win nanga unu na heimel pe Mi P'pa e rigeri.” ₃₀Baka di den singi fu gi Gado grani, den go na a Oleifbergi.

₃₁Di den ben de na pasi, Yesus taigi den man di ben e teki leri fu En taki: “Tide neti un alamala o gwe libi Mi. Bika a skrifi taki: ‘Mi o kiri a skapuman, dan ala den skapu o panya.’ ₃₂Ma te Mi kon baka na libi, Mi o go na un fesi na Galilea.” ₃₃Ma Petrus taigi Yesus taki: “Noiti mi o gwe libi Yu, awinsi ala den trawan gwe!” ₃₄Yesus piki en taki: “Fu tru Mi e taigi yu taki: Fosi kakafowru bari tide neti, yu o taki dri leisi taki yu no sabi Mi.” ₃₅Ma Petrus taki: “Awinsi mi mus dede nanga Yu, mi no o taki tak' mi no sabi Yu.” Dan ala den tra man di ben e teki leri fu En taki a srefi sani tu.

₃₆Baka dati Yesus nanga den man di ben e teki leri fu En go na wan presi di den e kari Getsemane. Drape A taigi den taki: “Un sidon dyaso. Mi o go pikinso moro fara fu go begi.” ₃₇Dan A teki Petrus, Yakobus nanga Yohanes, den tu manpikin fu Sebedeus, fu go nanga En. Ne Yesus bigin firi sari èn A ben frede. ₃₈A taigi den dri man taki: “Mi abi sowan dipi sari taki Mi no man tyari en. Un tan dya, èn un tan na ai nanga Mi.” ₃₉Dan Yesus go pikinso moro fara, A trowe Ensrefi langalanga na gron, dan A begi taki: “Mi P'pa, efu a kan, no meki Mi dringi fu a kan disi, no meki Mi nyan a pina. Ma a no san Mi wani, ma na san Yu wani musu psa!” ₄₀Dan A drai kon baka na den man di ben e teki leri fu En èn A si taki den e sribi. Ne A aksi Petrus taki: “Yu no ben man tan wan yuru na ai nanga Mi? ₄₁Un mus tan na ai, èn begi fu un no kon na ini tesi. Mi sabi taki ati wani, ma skin no abi krakti.” ₄₂Dan Yesus go begi baka. A taki: “Mi P'pa, efu Mi mus dringi fu a kan disi, efu tra fasi no de, dan meki Yu wani psa!” ₄₃Di Yesus drai kon baka den ben e sribi baka, bika sribi ben moro den. ₄₄Yesus libi den safri, dan A go begi den srefi sani fu a di fu dri leisi. ₄₅Di A kba begi, A kon na den man di ben e teki leri fu En dan A taigi den taki: “Now un kan sribi èn rostu fu unu. Luku, a yuru doro kba. Den e gi a Manpikin fu Libisma abra na ini anu fu sondusma. ₄₆Opo, kon meki un gwe. Luku, a sma di seri Mi e kon kba.”

₄₇Yesus no ben kba taki ete, di Yudas, wan fu den twarfu man fu En, doro. Den prenspari priester nanga den fesiman fu a folku ben seni en kon nanga wan heri ipi sma di ben e tyari owru nanga tiki. ₄₈Yudas ben meki mofo nanga den man taki: “Na a wan di mi o bosi, na En un mus grabu.” ₄₉Ne a waka kon na Yesus. A taigi En taki: “Meister, fa a e go nanga Yu?” Dan a bosi En. ₅₀Ma Yesus taigi en taki: “Mi mati, san yu kon fu du?” Den man waka kon na Yesus, dan den grabu En hori. ₅₁Ne wan fu den man di ben de nanga Yesus hari en owru, dan a kapu a yesi puru fu a knekti fu a granpriester. ₅₂Ma Yesus taigi en taki: “Poti a owru fu yu baka na en presi. A sma di e feti nanga owru, den o kiri nanga owru tu. ₅₃Yu no sabi taki Mi kan aksi Mi P'pa, dan wantron A sa seni moro leki twarfu legre engel kon fu yepi Mi? ₅₄Ma efu Mi du dati, dan fa den sani o kon tru di skrifi ini a Santa Buku, taki na so a musu psa?” ₅₅Dan Yesus taigi den sma taki: “Un kon nanga tiki nanga owru fu grabu Mi, neleki Mi na wan bigi ogriman. Ala dei Mi ben sidon e gi leri ini a tempel, ma un no grabu Mi. ₅₆Ma a ben musu psa so fu meki den sani di den profeiti ben skrifi kon tru.” Dan ala den man di ben e teki leri fu Yesus lon gwe libi En.

₅₇Den man di ben grabu Yesus, tyari En go na a granpriester Kayafas. Drape den sabiman fu Gado wèt nanga den fesiman fu a folku ben kon makandra. ₅₈Ma Petrus ben e waka fara na baka e kon te na a dyari fu a granpriester. Dan a go inisei go sidon mindri den waktiman fu a tempel fu si san o psa moro fara. ₅₉Den prenspari priester nanga ala den man fu a grankrutu fu den Dyusma, ben suku sma di ben wani lei gi Yesus fu den kan kiri En. ₆₀Ma den no feni noti, aladi furu sma ben go taki sani di no tru. Te fu kba, tu man go na fesi. ₆₁Den taki: “A man disi ben taki tak' A kan broko a santa presi fu Gado, dan A meki en baka ini dri dei.” ₆₂Ne a granpriester opo, dan a aksi Yesus taki: “Yu no e piki tapu san den man disi e taki fu Yu?” ₆₃Ma Yesus no piki noti. Dan a granpriester taigi En taki: “Sweri gi mi ini a nen fu a libi Gado: Taigi unu efu Yu na a Mesias, a Manpikin fu Gado?” ₆₄Yesus piki en taki: “Na leki fa yu taki. Ma Mi e taigi un taki: Bigin fu now un o si a Manpikin fu Libisma sidon na a let'anu sei fu Gado di abi Makti. Dan un o si En te A e kon baka tapu den wolku.” ₆₅Di Yesus taki a sani dati, a granpriester priti en krosi, dan a taki: “A e meki leki En na Gado! Un no abi kotoigi fanowdu moro. Luku, un srefi yere now fa A afrontu Gado. ₆₆San na un besroiti?” Den tra krutubakra piki taki: “A fiti fu A dede!” ₆₇Dan den spiti ini En fesi èn den naki En nanga kofu. Trawan baka naki En ini En fesi, ₆₈dan den taki: “Mesias, sori unu taki yu na wan profeiti. Taigi unu suma naki Yu.”

₆₉A pisten dati Petrus ben e sidon na dorosei ini a dyari. Dan wan uma di ben wroko drape kon taigi en taki: “Yu ben de nanga Yesus fu Galilea tu.” ₇₀Ma Petrus lei na ala sma fesi taki: “Mi no sabi san yu e taki!” ₇₁Dan Petrus opo waka go na a poort. Ma wan tra uma si en, dan a taigi den sma drape taki: “A man disi ben de nanga Yesus fu Nasaret.” ₇₂Ma agen Petrus lei. A taki: “Mi e sweri gi unu. Mi no sabi a man!” ₇₃Baka wan syatu pisten, den tra sma di ben e tnapu drape waka go na Petrus, dan den taigi en taki: “A tru. Yu na wan fu den man tu. Wi e yere en na a fasi fa yu e taki.” ₇₄Dan Petrus sweri baka èn a bigin fluku ensrefi taki: “Mi no sabi a man!” A srefi momenti dati wan kakafowru bari. ₇₅Dan Petrus memre fa Yesus ben taigi en taki: “Fosi kakafowru bari, yu o taki dri leisi taki yu no sabi Mi.” Dan Petrus go na dorosei, dan a bari wan krei.