Yesus puru takruyeye tapu wan man
1Na so den doro na a tra sei fu a meer ini a kontren fu den sma fu Gerasa. 2Fa Yesus kmopo ini a boto, wan man kmopo ini a berpe kon na En. A man disi ben abi takruyeye na en tapu 3èn a ben e tan ini a berpe. No wan sma ben man tai en hori moro, wan keti srefi no ben yepi. 4Bika furu leisi den ben tai en nanga keti, èn den ben bui en na en futu. Ma a ben koti den keti èn a ben broko den bui. A man ben tranga sote taki no wan sma no ben man nanga en. 5Dei nanga neti a ben waka lontu mindri den grebi èn tapu den bergi e meki babari e naki ensrefi nanga ston. 6Yesus ben de farawe ete di a man si En. A lon go na Yesus, dan a trowe ensrefi na En fesi. 7A bari nanga tranga sten taki: “Yesus, Manpikin fu a Moro Hei Gado, san Yu wani nanga mi? Mi e begi Yu ini a nen fu Gado: No pina mi!” 8Bika Yesus ben bari en taki: “Yu takruyeye, kmopo tapu a man!” 9Dan Yesus aksi en taki: “Fa yu nen?” A piki taki: “Mi nen na Hilahila, bika un furu.” 10Dan a begi Yesus tangitangi fu A no yagi den puru ini a birti. 11Now yu ben abi bun furu agu drape di ben e nyan tapu a bergiskin. 12Den takruyeye begi Yesus taki: “Seni un go na den agu, fu un kan go na ini den.” 13So Yesus meki den go. Den takruyeye kmopo tapu a man go na ini den agu. Dan den agu lon saka fu a bergi go ini a meer. Den ben de tu dusun agu so di dede ini a watra.
14Den man di ben luku den agu, lon gwe. Den go ini a foto nanga den presi ini a kontren fu a foto, go ferteri san ben psa. So ala den sma kon fu si san psa. 15Den go na Yesus, dan den si a man sidon drape di ben abi hilahila takruyeye na en tapu. A ben weri krosi èn a ben de ensrefi. Ne ala den sma kon frede. 16Den sma di si fa ala sani waka, ferteri den tra sma san ben psa nanga a man di ben abi den takruyeye na en tapu, nanga san ben psa nanga den agu. 17Dan den sma bigin begi Yesus tangitangi fu A kmopo ini a birti fu den. 18Di Yesus ben e go ini a boto, a man aksi En efu a kan go nanga En. 19Ma Yesus no ben wani. A taigi en taki: “Go na oso na den sma fu yu, dan yu ferteri den ala sani san Gado du gi yu, èn fa A ben abi sari-ati nanga yu.” 20So a man bigin waka ini a kontren san den ben kari Dekapolis e ferteri san Yesus du gi en. Èn ala den sma ben ferwondru.
A umapikin fu Yairus nanga a uma di fasi Yesus krosi
21Yesus drai go baka nanga a boto na abrasei. Dan wan bigi grupu sma kon na En di A ben de na a syoro fu a meer. 22Ne wan fu den edeman fu a kerki kon na En. A man disi ben nen Yairus. Di a si Yesus, a fadon tapu en kindi na En futu. 23A begi En tangitangi taki: “Masra, a umapikin fu mi de fu dede. Mi e begi Yu fu kon poti Yu anu na en tapu fu a kon betre èn tan na libi.” 24Dan Yesus go nanga en. Wan heri ipi sma ben go nanga En tu, èn moro nanga moro den ben e kon na En tapu. 25Na mindri den sma wan uma ben de di ben abi wan siki san ben meki taki a e lasi brudu twarfu yari kba. 26A uma disi miti furu sani na den someni datra pe a ben go. Ala moni san a ben abi a ben pai datra, ma noti no ben yepi. Moro nanga moro a ben go na baka. 27A uma disi ben yere fu den sani san Yesus du. Dan a waka mindri den sma, kon baka Yesus èn a fasi En krosi, 28bika a taki: “Efu mi kan fasi En krosi nomo, mi o kon betre.” 29Fa a fasi Yesus krosi, wantron a brudu tapu fu lon. A uma firi ini en skin taki a kon betre fu a siki. 30Yesus firi wantron taki krakti kmopo fu En. A drai luku den sma, dan A aksi taki: “Suma fasi Mi na mi krosi?” 31Den man fu En piki taki: “Masra, Yu srefi e si fa someni sma e kwinsi Yu fu ala sei. Dan fa Yu kan aksi suma fasi Yu?” 32Yesus luku lontu fu si suma ben fasi En. 33A uma ben sabi taki a kon betre, dat' meki a skreki te a e beifi. Dan a fadon tapu en kindi fesi Yesus èn a ferteri En ala sani san ben psa nanga en. 34Dan Yesus taigi en taki: “Mi pikin, a bribi fu yu meki yu kon betre. Yu kan go ini freide. Yu kon betre fu a siki.”
35Yesus ben e taki ete nanga a uma, di wantu sma kmopo na Yairus oso nanga a boskopu taki: “A umapikin fu yu dede. Yu no abi fu ferferi a Meister moro.” 36Ma Yesus poti san den sma taki na wan sei. A taigi Yairus taki: “No lasi ati. Bribi nomo.” 37Yesus no meki no wan sma go nanga En ini a oso fu Yairus, boiti Petrus, Yakobus nanga Yohanes, a brada fu Yakobus. 38Di den doro drape, Yesus go miti wan lo babari. Den sma ben e bari e krei. 39Yesus go na inisei dan A aksi den sma taki: “Fu sanede unu e krei e meki babari? A pikin no dede, ma na sribi a e sribi.” 40Den sma bigin lafu Yesus. Ma Yesus seni den go na dorosei, dan A teki a m'ma nanga a p'pa fu a pikin, nanga den dri man fu En go ini a kamra pe a pikin ben e didon. 41Yesus hori a pikin na en anu, dan A taigi en taki: “Talita kum!” Dati wani taki: “Pikin, Mi e taigi yu fu opo!” 42Wantron a pikin opo èn a bigin waka. A ben abi twarfu yari. Den sma di ben de ini a kamra ben ferwondru srefsrefi. 43Ma Yesus taigi den krinkrin taki den no mus taigi no wan sma san ben psa. Dan A taigi den fu den gi a pikin wan sani fu nyan.
