Markus 8

₁Wan tra leisi wan bigi grupu sma ben kon agen na Yesus. Di Yesus si taki den sma no ben abi noti moro fu nyan, A kari den man di ben e teki leri fu En kon dan A taigi den taki: ₂“Mi e sari den sma, bika na dri dei kba den de dya nanga Mi, èn den no abi noti fu nyan. ₃Efu Mi seni den gwe nanga angribere na oso, den kan flaw na pasi, bika sonwan fu den kmopo fu farawe kon dyaso.” ₄Dan den man piki En taki: “Fa un o feni nyanyan gi den sma? Bika sma no e libi ini a birti dya.” ₅Ne Yesus aksi den taki: “Omeni brede un abi?” Den taki: “Un abi seibi brede.” ₆Dan Yesus taigi ala den sma fu go sidon na gron. A teki den seibi brede, dan A taki Gado tangi. A broko den brede, dan A gi den man di ben e teki leri fu En fu den prati gi den sma. ₇Den ben abi wantu fisi tu. Baka di Yesus blesi den, A taigi den man di ben e teki leri fu En fu prati den fisi gi den sma tu. ₈Den alamala nyan te den bere furu. Dan di den piki den pis'pisi di ben libi ete, den furu seibi baskita. ₉Na wan fo dusun sma so ben drape. Dan Yesus seni den sma gwe.

₁₀Wantron baka dati Yesus nanga den man di ben e teki leri fu En go ini a boto dan den go na a kontren fu Dalmanuta.

₁₁Den Fariseiman kon na Yesus, kon krutu nanga En. Den ben wani fu A sori den wan marki di kmopo fu Gado, nomo fu tesi En. ₁₂Yesus dyeme, dan A taki: “Fu sanede unu fu a ten disi wani si wan marki? Fu tru Mi e taigi un taki: Un no o kisi no wan enkri marki fu si.” ₁₃Dan Yesus waka gwe libi den. A go baka ini a boto, dan A koti go na abrasei.

₁₄Now den man ben fergiti fu tyari brede. Den ben abi wan brede nomo ini a boto. ₁₅Yesus taigi den taki: “Un mus luku bun nanga a dyesi fu den Fariseiman, nanga a di fu Herodes.” ₁₆Dan den man bigin taki a tori nanga makandra. Den taki: “Na fu di un no abi brede meki A taki so.” ₁₇Ma Yesus ben sabi san den e taki, dat' meki A aksi den: “Fu sanede un e taki tak' brede no de? Na ferstan un no man ferstan ete? Na breni un breni? _18-19Un abi ai, ma un no e si. Un abi yesi, ma un no e yere. Baka di Mi broko den feifi brede prati gi feifi dusun sma, omeni baskita nanga brede ben libi? Un kan memre ete?”

Den man piki taki: “Iya, na twarfu baskita ben libi.” ₂₀“Èn baka di Mi broko den seibi brede prati gi den fo dusun sma, omeni baskita nanga brede ben libi?” Den man piki taki: “Seibi baskita ben libi.” ₂₁Dan Yesus taki: “Dan fa un ai no opo ete?”

₂₂Na so den kon doro na Betsaida. Den sma tyari wan breniman kon na Yesus, dan den begi En fu A fasi a man fu a kan si baka. ₂₃Yesus hori a man na en anu dan A tyari en go na dorosei fu a dorpu. A spiti ini a man ai, èn A poti En anu na den tapu. Dan Yesus aksi en taki: “Yu e si wan sani?” ₂₄A man piki taki: “Mi e si libisma, ma den gersi bon di e waka.” ₂₅Dan Yesus poti En anu ete wan leisi tapu den ai fu a man, dan a ben man si krin. Den ai fu en ben kon bun baka. Bigin fu a ten dati a man bigin si ala sani krin. ₂₆Dan Yesus seni a man go na oso, ma A taigi en taki: “Yu no mus drai go baka ini a dorpu.”

₂₇Dan Yesus go nanga den man di ben e teki leri fu En na den dorpu ini a birti fu Sesarea Filipi. Di den de na pasi, A aksi den man di ben e teki leri fu En taki: “Suma den sma e taki tak' Mi de?” ₂₈Den man piki taki: “Son sma e taki: Yu na Yohanes a Dopuman. Tra sma e taki: Yu na Elia. Trawan baka e taki: Yu na wan fu den profeiti.” ₂₉Dan Yesus aksi den taki: “Ma unu, suma unu e taki tak' Mi de?” Petrus piki En taki: “Yu na a Mesias.” ₃₀Dan Yesus warskow den taki den no mus taigi no wan sma a sani disi.

₃₁Dan now Yesus bigin leri den man di ben e teki leri fu En taki a Manpikin fu Libisma o abi fu nyan furu pina. Den fesiman fu a folku, den prenspari priester, nanga den sabiman fu Gado wèt o poti En na wan sei. Sma o kiri En, ma baka dri dei A o kon baka na libi. ₃₂Na so Yesus taigi den krin san o psa nanga En. Ma Petrus kari Yesus go na wan sei, dan a taigi En taki A no mus taki sowan sani. ₃₃Yesus drai luku den tra man fu En, dan A bari Petrus taki: “Kmopo na Mi tapu, Satan! Bika yu no e prakseri den sani fu Gado, ma na libisma sani yu e prakseri.”

₃₄Dan Yesus kari a bigi grupu sma nanga den man di ben e teki leri fu En kon na En. A taigi den taki: “Efu wan sma wani waka na Mi baka, a mus poti en eigi wani na wan sei. A mus de klar'klari fu nyan pina, èn a mus kon nanga Mi. ₃₅Bika a sma di wani tan libi fa a wani, o lasi en libi. Ma a sma di e poti en libi na wan sei fu Mi ede nanga fu a bun nyunsu ede, sa kisi a libi fu têgo. ₃₆Bika san yu e wini efu yu kisi ala sani fu grontapu, ma yu lasi a libi fu têgo? ₃₇Èn san wan sma o man gi fu kisi a libi fu têgo? ₃₈Mi e taigi un taki: Den sma fu a ten disi no wani sabi not'noti fu Gado, èn den e tan du sondu. Efu wan fu den sa taki tak' a no sabi Mi, noso den sani san Mi e leri, dan te a Manpikin fu Libisma o drai kon baka nanga den santa engel èn nanga a bigi makti fu En P'pa, dan En srefi o taki tu tak' A no sabi a sma dati.”