Nehemia 5

₁Now den Dyusma di ben e libi na den dorpu, man makandra nanga den uma, bigin krutu trangatranga abra den gudu kondreman fu den. ₂Sowan fu den taki: “Den manpikin nanga den umapikin fu unu furu, wi abi karu fanowdu fu tan na libi.” ₃Trawan fu den taki: “Angri ben e kiri un sote ini a angriten, tak' un ben abi fu panti un pranigron, un droifidyari nanga un oso.” ₄Wan tra grupu tak' baka taki: “Un dati na moni un leni tapu un pranigron nanga un droifidyari fu ben kan pai kownu a moni di un ferplekti fu pai. ₅Ma wi nanga den gudu kondreman na fu a srefi folku. Den manpikin fu unu no e du ondro gi den di fu den. Ma now unu mus gi den un manpikin nanga un umapikin leki panti, èn den e teki sowan fu den umapikin fu unu leki srafu kba. Not'noti un man du, bika sowan fu den abi un pranigron nanga un droifidyari kba.”

₆Di mi yere den kragi disi, èn di mi si tak' den sani tru, mi atibron sote. ₇Dan mi wegi a heri tori go, mi wegi en kon. Ne mi piri ai gi den heihei sma nanga den tiriman. Mi sori den tak' den no kan teki panti fu den eigi kondreman. Dan fu tyari wan kba kon na a tori, mi kari wan bigi konmakandra. ₈Mi taigi den drape taki: “Nanga ala san un ben abi un bai den kondreman fu un baka di ben seri gi dorosei folku. Ma unu, iya unu, e dwengi den fu den seri densrefi baka.” Den tan tiri, den no ben man piki noti. ₉Mi taigi den moro fara taki: “San un e du no bun. A mus de fu si tak' un e lespeki Gado, bika na so wawan un man tapu den folku di no lobi wi, fu no teki un e meki spotu. ₁₀Misrefi, den brada nanga den man fu mi, leni den sma moni nanga karu. Ma meki un tyari wan kba kon now na a pai di den mus pai un baka. ₁₁Tidetide un mus gi den den pranigron baka, sosrefi den droifidyari, den dyari nanga den oleifbon èn owktu den oso. Èn un mus gi den a wan prosenti baka di den ben pai unu tapu a moni, a karu, a win nanga a oleif-oli di un ben leni den.” ₁₂Den man piki taki: “Un sa du san yu taki. Un sa gi den ala den sani fu den baka, èn den no abi fu pai un noti moro.” Ne mi kari den priester, dan mi meki den heihei sma nanga den tiriman fu a foto sweri na den priester fesi tak' den o du san den pramisi. ₁₃Dan mi seki mi dyakti tu, èn mi taki: “Na so Gado o seki ala sani puru fu a sma di no hori en na a pramisi disi. Gado o puru en oso nanga ala en tra sani na en anu; ala sani Gado o puru na en anu.” Ala sma di ben drape taki: “Iya, meki a psa so.” Dan den gi MASRA grani, èn ala den sma hori den na a pramisi.

₁₄Ma mi du moro. Kownu Artaksasta ben poti mi twarfu yari langa leki komsarsi fu Yuda. Dati ben de di a ben de tutenti yari na makti te leki di a ben de dritenti-na-tu yari na makti. Ini den twarfu yari dati, mi nanga den brada fu mi no ben wani taki a pipel ben mus sorgu gi unu, aladi a ben de den plekti fu du dati gi mi leki komsarsi. ₁₅Den komsarsi di waka na mi fesi, no ben meki en makriki gi a pipel. Aladei den sma ben mus sorgu taki den abi brede nanga win, ma owktu fotenti solfru moni. Srefi den wrokoman fu den ben wani prei basi gi a pipel. Ma fu di mi ben e frede Gado, no wan fu den sani dati mi du. ₁₆Misrefi ben e yepi fu meki a skotu baka; ma un no teki no wan pisi gron gi unsrefi. Ala den man fu mi ben drape tu tapu a wroko. ₁₇Doro mi ben e kari den heihei Dyusma, nanga den edeman, wan hondro feifitenti man makandra, fu kon nyan nanga mi. Den sma srefi fu den kondre na wi lontu, di ben kon tapu fisiti, ben e nyan nanga mi. ₁₈Ala dei, mi ben e sorgu gi wan kaw, siksi fu den moro bun skapu nanga bus'fowru. Baka ibri tin dei, a win maksin fu mi ben mus lai baka. Ma awinsi fa mi ben e du den sani dati, toku mi no ben wani tak' a pipel ben mus sorgu gi mi leki komsarsi, bika mi ben sabi tak' a libi no ben makriki gi den. ₁₉Mi Gado, memre ala a bun di mi du gi a pipel disi.