A feti nanga den Midyanitisma
1MASRA taigi Moses taki: 2“Yu mus pai den Midyanitisma baka fu san den ben du nanga den Israelitisma. Baka dati yu sa dede go na den afo fu yu.” 3Ne Moses taigi a folku taki: “Meki afu fu den mansma meki densrefi klari fu hari go na feti. MASRA wani taki den pai den Midyanitisma baka fu san den ben du. 4Fu ibri lo fu Israel yu sa seni wan dusun man go na feti.” 5So den teki dusun man fu ibri lo fu Israel. Twarfu dusun man ben meki densrefi klari fu go feti. 6Dan Moses seni den go feti. Wan dusun fu ibri lo. A seni Pinekas, a manpikin fu priester Eleasar, go nanga den. Pinekas ben abi den santa wrokosani nanga den trompet na en. 7Dan den hari go feti nanga Midyan soleki fa MASRA ben komanderi Moses fu du èn den kiri ala mansma. 8Den kiri Ewi, Rekem, Sur, Hur nanga Reba, den feifi kownu fu Midyan tu. Den kiri Bileam, a manpikin fu Beor tu. 9Den Israelitisma teki den uma fu Midyan nanga den pikin fu den leki srafu. Den teki ala den kaw, den tra meti nanga den gudu fu den tyari gwe. 10Den bron ala den foto nanga den kampu, pe den Midyanitisma ben e libi na ini tenti, nanga faya. 11Baka dati den teki ala sani di den wini ini a feti, den libisma nanga den meti. 12Den tyari den sma di den teki leki srafu nanga ala den sani di den wini ini a feti go gi Moses, priester Eleasar nanga ala den tra Israelitisma, di ben de ini a kampu ini den bigi opo wei fu Moab, na a Yordanliba, krosbei fu a Yeriko.
13Dan Moses, priester Eleasar nanga ala den edeman fu a folku hari go miti den dorosei fu a kampu. 14Ma Moses kisi atibron gi den edeman fu a legre, den ofisiri di ben e tiri dusun srudati, nanga den ofisiri di ben e tiri wan hondro srudati, di ben e drai kon baka. 15A taigi den taki: “Fu sanede un meki ala den umasma tan na libi? 16Luku, na den ben teki a rai fu Bileam, dan den meki den Israelitisma drai den baka gi MASRA, fu go waka baka peor, meki wan siki broko ondro a heri folku fu MASRA. 17Fu dat'ede un mus kiri ala den pikin boi. Kiri ala umasma tu di go na bedi kba nanga wan mansma. 18Den umapikin di no sribi nanga wan man ete un mus hori na libi gi unsrefi. 19Unsrefi sa tan seibi dei na dorosei fu a kampu. Ibriwan fu unu di kiri wan sma noso di fasi a skin fu wan sma di un kiri. Un mus krin unsrefi tapu a di fu dri nanga a di fu seibi dei. Unu nanga den sma di un teki leki srafu sa du dati. 20Un mus krin ibri krosi nanga tra sani tu di meki fu leer noso krabitawiwiri nanga ibri sani di meki fu udu.”
21Dan priester Eleasar taigi den srudati di ben hari go na feti taki: “Disi na wan sani di MASRA komanderi Moses taki un mus tan du. 22Ala sani fu gowtu, solfru, kopro, isri, blik noso loto 23ala sani di no e bron ini faya, un mus poti ini faya fu a kon krin. Baka dati a mus krin nanga spesrutu watra. Ala sani di no man go na ini faya, un sa poti ini a watra fu a kon krin. 24Tapu a di fu seibi dei un sa wasi un krosi dan un sa de krin baka. Te un du dati, un kan kon ini a kampu baka.”
25MASRA taigi Moses taki: 26“Yu, priester Eleasar nanga den famiri-edeman fu a folku, mus teri luku omeni sani un tyari kmoto fu a feti. Un mus teri libisma nanga meti. 27Dan un mus prati en na tu. Afu na gi den man di ben hari go feti nanga a tra afu na fu a folku. 28Yu mus meki den man di ben hari go feti pai wan sani. Fu ala feifi hondro libisma, kaw, buriki, skapu nanga krabita, den sa gi wan na MASRA. 29Yu sa teki den puru fu den sani di den man o kisi di ben go feti. 30Ma fu a tra afu di den Israelitisma ben o kisi, drape yu sa puru wan fu ala feifitenti libisma, kaw, buriki, skapu noso krabita. Yu sa gi den na den Lefitiman di e sorgu gi a santa tenti fu MASRA.”
31Dan Moses nanga priester Eleasar du soleki fa MASRA ben komanderi Moses fu du. 32Boiti den tra sani di den srudati ben wini ini a feti den ben teki siksi hondro seibitenti-na-feifi dusun skapu. 33seibitenti-na-tu dusun kaw, 34nanga siksitenti-na-wan dusun buriki. 35Moro fara dritenti-na-tu dusun libisma. Dati na umasma di no ben sribi nanga wan man ete. 36Afu ben de gi den man di ben go feti a feti. Den ben kisi: dri hondro dritenti-na-seibi dusun nanga feifi hondro skapu. 37Fu den skapu disi den ben gi siksi hondro seibitenti-na-feifi leki pai na MASRA. 38Moro fara den ben kisi: dritenti-na-siksi dusun kaw. Fu den kaw den ben gi seibitenti-na-tu leki pai na MASRA. 39Dritenti dusun nanga feifi hondro buriki. Fu den buriki den gi siksitenti-na-wan leki pai na MASRA. 40Tin-na-siksi dusun libisma. Fu den libisma den gi dritenti-na-tu leki pai na MASRA. 41Dan Moses teki ala sani san den sma ben gi leki pai, a spesrutu ofrandi di den ben gi na MASRA, dan a langa en gi priester Eleasar, soleki fa MASRA ben taigi en fu du. 42A tra afu Moses ben de gi na den Israelitisma di no ben go feti. 43A afu dati ben de dri hondro dritenti-na-seibi dusun nanga feifi hondro skapu, 44dritenti-na-siksi dusun kaw, 45dritenti dusun nanga feifi hondro buriki 46nanga tin-na-siksi dusun libisma. 47Den sma disi ben de gi den Israelitisma di no ben go feti. Dan Moses teki wan fu ibri feifitenti fu den sma disi nanga wan fu ibri feifitenti fu den meti, dan a gi den na den Lefitiman di ben e sorgu gi a santa tenti fu MASRA. A du disi soleki fa MASRA ben taigi en fu du.
48Dan den edeman fu a legre kon na Moses. Den ofisiri di ben e tiri dusun srudati nanga den wan di ben e tiri wan hondro srudati. Den taigi Moses taki: 49“Den knekti fu yu teri den srudati di den e tiri. No wan no e mankeri. 50Now ibriwan fu wi kon fu tyari wan ofrandi gi MASRA fu den gowtu sani di wi feni ini a feti: futuketi, bui, fingalinga, yesilinga nanga keti. Wi e du disi fu meki en bun baka nanga MASRA.” 51Dan Moses nanga priester Eleasar teki den gowtu sani na den anu. 52Ala a gowtu fu a pai gi MASRA, di den ben teki na anu fu den ofisiri di ben e tiri dusun srudati nanga den wan di ben e tiri wan hondro srudati, ben de tin-na-siksi dusun seibi hondro nanga feifitenti gowtu moni. 53San den srudati ben wini ini a feti den ben e hori gi densrefi. 54Baka di Moses nanga priester Eleasar ben teki a gowtu na a anu fu den edeman di ben e tiri dusun srudati nanga den wan di ben e tiri wan hondro srudati, den tyari en go na a tenti pe yu kan miti nanga Gado. Drape a ben o de na MASRA fesi fu memre den Israelitisma.
