Nomru 36

₁Den edeman fu a famiri fu Gilead ben kon na Moses, den fesiman nanga den edeman fu den famiri. Gilead ben de a manpikin fu Makir. Makir ben de a manpikin fu Manase. Manase ben de wan manpikin fu Yosef. So den edeman disi kon dan den taki: ₂“MASRA taigi yu, mi masra, fu fringi a lot fu prati a kondre gi den Israelitisma. MASRA ben komanderi yu tu fu gi a pisi fu wi brada Selofkad na den umapikin fu en. ₃Ma efu den trow nanga wan sma fu wan fu den tra lo fu Israel, dan a gron fu den afo fu wi di den ben kisi sa abra go na a lo pe den o trow go. Tapu a fasi disi a lo fu unu o lasi a gron di a lot sori taki na fu unu. ₄Ini a jubelyari fu den Israelitisma, a gron fu den o go na den lo fu den man nanga san den trow èn a lo fu den afo fu wi sa lasi a gron.”

₅Ne MASRA komanderi Moses fu taigi den Israelitisma taki: “Den bakapikin fu Yosef abi leti. ₆Disi na san MASRA e taki fu den umapikin fu Selofkad: Den kan trow nanga suma den wani, ma a mus de wan sma fu a srefi lo fu den p'pa. ₇Bika wan gron fu wan Israelitisma no sa go fu a wan lo na a trawan. Ala Israelitisma sa sorgu taki a gron di a lo fu den kisi sa tan gi a lo dati. ₈Fu dat'ede ibri umapikin di kisi wan pisi gron fu wan fu den lo fu Israel mus trow nanga wan sma fu a lo fu en p'pa. Tapu a fasi disi ibri Israelitisma e kisi san den afo fu en ben kisi. ₉A gron di wan lo kisi, no sa go fu a wan lo na a trawan. Den Israelitisma sa sorgu taki a gron di a lo fu den ben kisi tan ini a lo dati.”

₁₀So den umapikin fu Selofkad du leki fa MASRA ben taigi Moses taki den mus du. ₁₁Den umapikin disi: Makla, Tirsa, Hogla, Milka nanga Noa trow nanga den manpikin fu den omu fu den. ₁₂Den trow nanga mansma di ben de bakapikin fu Manase, a manpikin fu Yosef, fu a gron di a lo fu p'pa ben kisi ben kan tan ini a lo dati.

₁₃Disi na den gebod nanga den sani na san den sma fu Israel ben mus tan hori densrefi. Na MASRA ben poti den sani dati taki den mus du en. A meki Moses taigi den den sani disi ini den bigi opo wei fu Moab, na a Yordanliba krosbei fu Yeriko.