Koni nanga don
1Koni bow wan oso,
a meki en nanga seibi postu.
2A srakti meti, a meki switi win,
èn a seti a tafra poti kba.
3A seni den uma knekti fu en fu go kari sma,
fu a moro hei presi ini a foto den e bari taki:
4“Sma di no sabi furu, un drai kon dyaso,”
Den wan di no abi ferstan, a e taigi taki:
5“Un kon nyan san mi meki klari gi unu,
un kon dringi a switi win di mi meki.
6Un meki muiti fu kon sabi furu now,
dan un o libi langa, èn un o kisi ferstan.”
7Efu yu warskow wan sma di e meki spotu, yu o kisi syen,
efu yu e sori wan ogri-ati sma fa a mus libi, sma o lafu yu.
8No warskow wan sma di e meki spotu, bika a no o lobi yu srefsrefi.
ma efu yu warskow wan sma di koni, a o lobi yu.
9Wan koni sma e kon moro koni efu yu warskow en
èn wan sma di bun ini Gado ai e kisi moro ferstan te yu gi en leri.
10Lespeki gi MASRA na a fundamenti fu koni,
èn fu sabi fu a santa Wan e gi ferstan.
11Na mi, e meki taki wan sma e libi moro langa,
èn taki den yari fu en e kon moro furu.
12Efu wan sma koni, a koni dati o du en bun,
ma efu wan sma e meki spotu,
a bakapisi fu dati na fu en wawan.
13Donfasi de leki wan bradyari uma,
a don èn a no sabi not'noti.
14A e sidon na a doro fu a oso fu en,
noso tapu wan sturu na a moro hei presi ini a foto.
15A e sidon drape e kari den sma di e psa,
sma di e psa go du den eigi sani.
16A e taigi den taki: “Sma di no sabi furu, un drai kon dyaso.”
Den wan di no abi ferstan, a e taigi taki:
17“A watra di yu fufuru moro switi,
brede di yu mus nyan kibrikibri e tesi moro bun.”
18Ma a sma di e drai go na en no sabi dati na dede de drape,
èn taki den sma di ben teki a kari fu en bifo de ini dedekondre.
