Psalm 146

₁Haleluya!

Prijse MASRA, mi sili!

₂Mi sa prijse MASRA mi heri libi langa,

singi gi a Gado fu mi solanga mi de na libi.

₃No poti yu fertrow tapu sma di abi makti,

tapu wan libisma di no man ferlusu.

₄Te a bro fu en koti, na doti a e tron baka,

wan kba e kon tu na ala san a ben prakseri fu du.

₅Ma a sma di abi a Gado fu Yakob leki en yepiman,

na wan blesi sma,

a sma di e poti en howpu tapu MASRA, a Gado fu en,

₆di meki heimel nanga grontapu,

a se nanga ala san de na ini,

a Wan di de fu fertrow fu têgo.

₇A e meki den sma di trawan e pina, kisi den leti,

A e gi nyanyan na den sma di angri e kiri.

MASRA e poti den sma fri di de na strafu,

₈MASRA e opo den ai fu den breniwan,

MASRA e yepi den sma di de ini bigi problema,

MASRA lobi den sma di bun ini En ai,

₉MASRA e kibri den doroseisma,

A e sorgu gi den pikin di no abi p'pa nanga m'ma moro,

nanga den uma di masra dede kba,

ma A e meki den ogri-ati sma go lasi.

₁₀MASRA, na kownu fu têgo,

Sion, a Gado fu yu, de fu ala ten.

Haleluya!