A begi fu wan sma di e siki tranga
1Wan psalm fu David. Fu Gado kan memre.
2MASRA, no strafu mi ini Yu atibron,
no fon mi ini a hebi atibron fu Yu.
3Bika den peiri fu Yu go dipi ini mi skin,
Yu e strafu mi hebi.
4A hebi atibron fu Yu meki taki noti no bun moro na mi skin,
den sondu fu mi meki taki ala den bonyo fu mi broko.
5Bika den kruktudu fu mi gro psa mi ede,
den de leki wan hebi lai,
di mi no man tyari moro langa.
6Den soro fu mi e tingi,
den e puru doti watra
fu a don libi di mi ben libi.
7Te mi e waka mi abi fu beni mi baka,
mi abi fu beni mi baka bun dipi,
mi e sari heri dei,
leki wan sma di e low.
8Korsu e priti mi skin,
noti no bun moro ini mi skin.
9Mi weri, mi e firi leki mi broko pis'pisi,
Mi no sabi san mi mus du, a e gi mi fu bari.
10MASRA, Yu sabi san mi ati e angri,
a soktu fu mi no kibri gi Yu.
11Mi ati e naki moro esi, mi krakti gwe libi mi,
srefi si mi no e si bun moro.
12Den mati fu mi nanga sma di sabi mi
no e kon krosbei fu mi moro,
srefi mi famiri e tan fara fu mi.
13Den sma di wani kiri mi,
e seti ogri fu miti mi,
den di wani meki bigi ogri miti mi,
e taki fa den o du en,
heri dei den e waka e gi mi pori nen.
14Ma mi e meki leki mi dofu, mi no e yere den,
mi e meki leki mi babaw, mi no e piki den.
15Mi e meki leki wan sma di dofu,
èn mi no e hari taki nanga den srefsrefi.
16Bika MASRA, tapu Yu mi e howpu,
Masra, mi Gado, na Yu sa piki den.
17Mi e begi Yu nomo fu den no prisiri fu mi ede,
fu den no lafu te mi e misi futu.
18Mi e si leki a libi fu mi e kon na wan kba,
mi skin e nyan mi nomonomo.
19Mi e taigi Gado den kruktudu fu mi,
den sondu fu mi e meki mi e frede.
20Ma den feyanti fu mi e libi, den tranga,
èn den furu sote,
den di no man si mi na ai srefsrefi
sondro taki mi du den wan sani.
21Den e pai mi ogri fu bun,
èn den e feti mi, aladi na bun mi e du.
22MASRA, no gwe libi mi,
mi Gado, no tan fara fu mi!
23Kon esi kon yepi mi,
Masra, na Yu e ferlusu mi.
