Wan singi fu gi tangi
1Gi a tiriman fu a singigrupu fu a tempel. Fu David. Wan psalm.
2Fayafaya mi ben ferwakti MASRA,
dan A poti yesi arki
èn A yere fa mi e bari suku yepi.
3Dan A hari mi puru na ini a grebi-olo,
A hari mi puru na ini a tokotoko,
na ini a morsu ini san mi ben de.
A poti mi tnapu na tapu wan bigi ston,
A meki mi tnapu tranga baka na tapu mi futu.
4A leri mi wan nyun singi,
wan singi fu gi a Gado fu wi grani.
Furu sma sa si san MASRA du,
dan den sa lespeki En,
èn poti den fertrow na En tapu.
5A sma di poti en fertrow tapu MASRA,
na wan blesi sma,
a sma di no e suku yepi na den sma nanga heimemre,
èn di no e moksi nanga sma di e dini kruktu gado.
6MASRA, mi Gado, Yu du furu wondru,
Yu abi furu bun prakseri abra wi tu.
No wan sma de fu marki nanga Yu!
Efu mi wani taki fu den sani disi,
efu mi ben wani ferteri fu den,
den bo furu tumsi gi mi fu kari.
7Den meti di wi e srakti leki ofrandi gi Yu,
nanga den graan-ofrandi fu wi,
no e gi Yu prisiri.
Den meti di wi e bron leki ofrandi
nanga den ofrandi fu kisi pardon fu sondu,
Yu no abi fanowdu tu,
ma Yu opo den yesi fu mi fu mi kan yere Yu.
8Na dat' meki mi taki: “Luku, dyaso mi de,
leki fa a skrifi fu mi ini den buku.”
9Mi e angri fu du a wani fu Yu mi Gado,
mi lobi a wèt fu Yu nanga mi heri ati.
10Te a pipel fu Yu kon makandra
mi e taki fa Yu e du sani nanga leti.
mi no e hori mi mofo,
Yu sabi dati MASRA.
11Mi no e kibri en taki Yu bun,
ma mi e taki fu a bow di sma kan bow na Yu tapu,
nanga a ferlusu di Yu e ferlusu.
Mi e taki fu a bigi lobi fu Yu pe a pipel de makandra,
nanga fa Yu de fu fertrow.
12MASRA, no tapu fu sori mi a sari-ati fu Yu.
Tan sori mi a bigi lobi fu Yu
èn taki Yu de fu fertrow dorodoro.
13Bika furu problema lontu mi,
den kruktudu fu mi e suku den pai,
èn mi no sabi moro san fu du.
Den kruktudu fu mi furu moro den wiwiri tapu mi ede,
mi lasi ati.
14Tye, MASRA, ferlusu mi,
MASRA, kon esi kon yepi mi.
15Meki den alamala di e suku fu kiri mi, kisi syen,
den no mus man opo den ede fu syen
meki den di angri fu bigi ogri miti mi hari go nanga baka,
meki den tron spot'popki.
16Meki den fesi fadon,
den di e bari lafu fu mi ede.
17Meki ala sma di e suku Yu
breiti èn abi prisiri,
meki den wan di e angri fu Yu ferlusu den
tak' dorodoro taki: “MASRA bigi.”
18MASRA, mi na wan mofinawan èn mi pôti,
ma memre mi.
Yu na mi Yepiman nanga mi Ferlusuman,
tye, mi Gado, no draidrai fu yepi mi.
