A makti nanga a glori fu Gado
1Gi a tiriman fu a singigrupu fu a tempel. Fu David. Wan psalm. Wan singi.
2Te Gado opo fu du wan sani,
den feyanti fu En e lon panya,
den di no lobi en srefsrefi e lowe te A sori Ensrefi.
3Leki fa winti e wai smoko gwe,
na so A e wai den puru na pasi,
leki fa wan kandra e bron gwe,
na so den ogri-ati sma e dede gwe te Gado sori Ensrefi.
4Ma den sma di bun ini Gado ai e breiti,
den e prisiri na Gado fesi,
den e prisiri srefsrefi.
5Singi gi Gado, singi fu a nen fu En,
meki wan pasi gi En di e rei tapu den bigi opo wei.
MASRA na En nen,
un prisiri na En fesi.
6Na En na a p'pa fu den pikin
di no abi p'pa nanga m'ma moro,
na En e luku taki den uma di masra dede kba,
kisi den leti.
Gado ini a santa tanpresi fu En.
7Gado, e meki den sma di de den wawan,
feni wan famiri fu tan,
A e poti strafuman fri,
èn A e meki sani waka bun gi den.
Ma den sma di no wani saka densrefi gi En,
sa libi na ini wan drei kondre.
8Gado, di Yu ben e waka fesi a pipel fu Yu,
di Yu ben hari psa ini a bigi dreisabana, sela
9grontapu ben e beifi
èn watra ben e fadon kmopo na heimel
di Gado sori Ensrefi, a Gado fu Sinai,
di Gado sori Ensrefi, a Gado fu Israel.
10Gado, Yu ben meki bogobogo alen fadon,
Yu gi a kondre fu Yu nyun libi di a ben e drei gwe.
11A folku fu Yu go libi drape,
Gado, ini Yu bunfasi, Yu ben meki a kondre klari gi den mofinawan.
12Masra gi wan komanderi,
furu umasma lolo en go moro fara.
13“Den kownu e lon gi den libi,
den legre fu den e lon,
umasma e prati den sani di den libi na baka,
14ma unu e sribi na den skapupen fu unu.”
Den frei fu den doifi ben tapu nanga solfru
den langa wiwiri fu en nanga fini gowtu.
15Bika di a Wan di abi ala makti meki den kownu lon,
A meki sneeuw fadon tapu Salmonbergi.
16Basanbergi, yu bigi bergi,
Basanbergi, bergi nanga someni ede,
17bergi nanga someni ede, fu sanede yu e dyarusu,
fu sanede yu e dyarusu tapu a bergi di Gado teki fu tan?
Fu tru, MASRA o libi drape fu têgo.
18Masra hari kmopo fu Sinaibergi go na a santa presi,
A hari go nanga dusundusun fetiwagi,
so furu taki den no de fu teri.
19Yu opo go na heimel,
Yu tyari den wan di Yu wini gwe nanga Yu,
Yu teki kado fu libisma,
srefi fu den sma di no wani saka densrefi gi Yu.
Yu o libi drape MASRA, Gado.
20Prijse Masra,
dei fu dei A e tyari wi,
na En na a Gado di e ferlusu wi. sela
21Na a Gado dati na a Gado di e tyari ferlusu,
na MASRA Masra e yepi wi fu wi no dede.
22Fu tru, Gado e masi a ede fu den feyanti fu En,
den ede di lai wiwiri,
den ede fu den di e tan du kruktu sani.
23Masra taki:
“Mi e go teki den feyanti fu yu na Basan,
Mi e go puru den ini a dipi se,
24fu un waka na ini a brudu fu den.
Den dagu fu unu o leki a brudu fu un feyanti.”
25Sma si fa Yu e waka leki winiman
na fesi fu a grupu, Gado,
na fesi fu a grupu mi Gado, mi kownu,
Yu e go na a santa presi.
26Den singiman e waka na fesi,
na mindri yu abi den yongu uma di e naki tamboerijn,
na bakasei den man di prei instrumenti nanga snaar.
27Den e singi taki:
“Un prijse Gado te un kon makandra,
un prijse MASRA,
unu di kmoto fu a rutu fu Israel.”
28Benyamin, a moro yonguwan, e waka na fesi,
dan yu e kisi den edeman fu Yuda,
ini bigi grupu,
nanga den di fu Sebulon nanga Naftali.
29Meki wi si a makti fu Yu, Gado,
a makti fu Yu, Gado,
di Yu ben e sori wi fos'fosi,
30ini a tempel fu Yu ini Yerusalem.
Drape kownu e tyari kado gi Yu.
31Piri ai gi den meti di e libi ini a langa grasi sei a liba,
a grupu bulu, den yongu kaw,
masi den wan di lobi solfru,
meki den folku di lobi feti panya go na alasei.
32Heihei boskopuman e kmopo fu Egipte kon,
Etiopia e langa en anu es'esi go na Gado.
33Pipel fu den kondre fu grontapu,
un singi gi Gado!
Un singi wan singi gi Masra, sela
34gi a Wan di e rei ini a moro hei heimel,
di de bun langa kba.
Un yere, A e meki taki a makti sten fu En de fu yere.
35Un taki tak' Gado tranga:
na En na kownu ini Israel,
den wolku e sori a krakti fu En.
36Gado, te Yu e kmopo fu a santa presi fu Yu, sma e beifi,
na En, a Gado fu Israel, e gi makti,
A e gi En pipel nyun krakti.
Prijse Gado!
