Wan begi fu Gado yepi En pipel
1Wan psalm fu Asaf.
Tye Gado, doroseisma broko kon ini a kondre fu Yu,
den pori a santa tempel fu Yu,
den broko Yerusalem te na gron.
2Den gi den dedeskin fu den knekti fu Yu
leki nyanyan na den fowru di e frei na loktu.
a skin fu den wan di tan waka na Yu baka,
na den krasimeti.
3Den meki a brudu fu den lon leki watra lontu Yerusalem,
no wan sma ben de fu beri den.
4Den kondre lontu wi e teki wi meki spotu,
den e koti odo gi wi èn den e lafu wi.
5Olanga ete MASRA?
Na fu têgo Yu ati o bron?
Na fu têgo a dyarusu o bron na ini Yu leki wan faya?
6Lusu a atibron fu Yu tapu den folku di no sabi Yu,
tapu den kondre di no e anbegi Yu.
7Bika den kiri den bakapikin fu Yakob,
den broko a kondre fu den te na gron.
8No meki wi pai gi den sondu fu den afo fu wi,
sori wi Yu sari-ati es'esi,
bika wi lasi ati fu tru.
9Yepi wi, Yu na a Gado di e ferlusu wi,
fu Yu nen kan kisi grani.
Ferlusu wi èn gi wi pardon fu den sondu fu wi
fu Yu nen ede.
10No meki den tra folku aksi taki:
“Pe a Gado fu den de?”
Meki wi si fa Yu e sori den tra folku,
taki Yu e meki den pai fu a brudu fu den knekti fu Yu.
11Yere a soktu fu den wan di feyanti tyari gwe leki strafuman,
meki a tranga anu fu Yu hori den wan na libi
di a feyanti ben wani kiri.
12Pai den folku lontu wi seibi tron so furu baka
fu a kosi di den kosi Yu, Masra.
13Dan wi, a pipel fu Yu,
den skapu di Yu e tiri,
wi sa prijse Yu fu têgo,
fu ala ten wi o taki fu a bigi nen fu Yu.
