Psalm 89

₂MASRA, fu têgo mi sa singi fu a lobi fu Yu,

mi sa ferteri pikin nanga bakapikin

taki Yu de fu fertrow.

₃Bika mi kon ferstan taki a bigi lobi fu Yu de fu têgo,

na ini heimel a de fu si taki Yu de fu fertrow.

₄Yu ben taki:

“Mi meki wan ferbontu nanga a wan di Misrefi teki,

Mi sweri gi Mi knekti David, taki:

₅Mi sa meki yu abi bakapikin fu têgo,

pikin nanga bakapikin fu yu sa de kownu fu têgo.” sela

₆Dat' meki heimel e prijse den wondru fu Yu, MASRA,

te den santawan kon makandra den e prijse Yu,

fa Yu de fu fertrow.

₇Bika no wan no de ini heimel leki MASRA?

Sortu gado de leki MASRA?

₈Te den santawan kon makandra

den e lespeki Gado na den mindri,

dipi lespeki fiti En,

moro ala den wan di lontu En.

₉MASRA, Gado fu ala sani,

suma tranga leki Yu, MASRA?

Ini ala sani Yu de fu fertrow.

₁₀Yu e meki a bigi se di e seki so hebi du san Yu wani.

Efu den skwala fu en e opo hei, Yu e tiri den.

₁₁Yu ben kiri Rahab èn Yu masi en pis'pisi,

nanga a tranga anu fu Yu,

Yu wini den feyanti fu Yu.

₁₂Na Yu abi heimel nanga grontapu,

na Yu ben seti grontapu poti nanga ala sani di de na en tapu.

₁₃Na Yu meki heri grontapu,

fu noordsei go te na zuidsei.

Taborbergi nanga Hermonbergi e prijse Yu.

₁₄A anu fu Yu e du bigi sani,

a anu fu Yu tranga fu tru,

opo wawan Yu abi fu opo en.

₁₅Fu du sani nanga leti èn fu du sani fa a fiti

na den fundamenti fu Yu kownusturu.

Bigi lobi nanga a fertrow di Yu de fu fertrow

e go na Yu fesi.

₁₆A pipel di sabi fa fu singi fu gi Yu grani

na wan blesi pipel,

den e libi, MASRA, ini a lobi fu Yu.

₁₇Na Yu e meki taki den kan bari fu prisiri heri dei,

a du di Yu e du sani nanga leti e opo den.

₁₈A krakti nanga a glori fu den e kon fu Yu,

Yu gi wi grani fu di Yu abi prisiri nanga wi.

₁₉Na MASRA gi wi a schild di e kibri wi,

na a Santawan fu Israel gi wi a kownu fu wi.

₂₀Langa na fesi Yu ben sori den sma di e tan waka na Yu baka wan sani,

Yu taigi den taki:

“Mi gi krakti na wan dyadya fetiman,

Mi gi wan hei presi na wan yongu boi fu a folku.

₂₁Ini David Mi feni wan knekti,

Mi salfu en nanga santa oli.

₂₂Mi o yepi en

Mi o gi en krakti.

₂₃No wan feyanti o man wini en,

no wan ogri-ati sma o man pina en.

₂₄Ma Mi o masi den feyanti fu en leti na en fesi,

den sma di no lobi en srefsrefi Mi o kiri puru na pasi.

₂₅A lobi fu Mi o de nanga en

èn a o man bow na Mi tapu,

na Mi o meki taki a kisi moro nanga moro makti.

₂₆A makti fu en o de

fu a se go te na a liba.

₂₇A sa taigi Mi taki:

‘Yu na mi P'pa,

Yu na a Gado fu mi,

Yu na a Trangawan di e ferlusu mi.’

₂₈Iya, Mi e gi en den leti di a moro owru manpikin e kisi,

Mi e meki a tron a moro bigi kownu fu grontapu.

₂₉A lobi fu Mi o de fu têgo nanga en,

èn Mi no sa broko a ferbontu di Mi meki nanga en.

₃₀Mi o meki a famiri fu en tan na makti fu têgo,

èn na bakapikin fu en o de kownu solanga leki heimel de.

₃₁Efu den bakapikin fu en no hori densrefi na den wèt fu Mi,

efu den no hori densrefi na den sani

na san den ben mus tan hori densrefi,

₃₂efu den no hori densrefi na den sani di den mus tan du

nanga den gebod fu Mi,

₃₃dan Mi o fon den fu den sondu di den du,

wipi den fu den kruktudu fu den.

₃₄Ma Mi no sa tapu fu sori en a bigi lobi fu Mi,

Mi no sa tapu fu sori en taki a kan fertrow Mi.

₃₅Mi no sa broko a ferbontu di Mi meki nanga en,

èn Mi sa hori Misrefi na den sani di Mi ben taki.

₃₆Wan leisi Mi sweri na ini Mi santa nen

taki Mi sa hori Misrefi na den sani di Mi taigi David.

₃₇Mi o meki a famiri fu en tan na makti fu têgo,

èn na bakapikin fu en o de kownu solanga leki a son de,

₃₈leki fa a munkenki de fu têgo,

èn leki fa a de fu si aladei na a heimel.” sela

₃₉Ma Yu poti en na wan sei,

Yu no ben wani sabi not'noti fu en moro,

fu di Yu ati bron tapu a wan di Yu ben salfu leki kownu.

₄₀Yu broko a ferbontu di Yu ben meki nanga Yu knekti,

Yu puru a makti di a ben abi na en anu.

₄₁Yu broko ala den skotu fu a foto trowe,

èn den tranga kibripresi fu en Yu naki broko pis'pisi.

₄₂Ala sma di ben waka psa drape

ben e fufuru sani fu en tyari gwe.

A ben tron wan sani di den kondre lontu en

ben e teki meki spotu.

₄₃Yu gi den feyanti fu den krakti fu wini den,

èn prisiri fu den ede.

₄₄Yu pori ala den fetisani fu en,

fu a no ben man tan tnapu ini a feti.

₄₅Yu meki a lasi en grani,

Yu puru a makti leki kownu na en anu.

₄₆Yu meki a kon owru fosi en ten,

Yu meki a kisi syen. sela

₄₇Olanga ete MASRA?

Na fu têgo Yu o tan kibri Yusrefi?

Na fu têgo Yu ati o bron na ini Yu leki wan faya?

₄₈Prakseri o syatu a libi fu mi de,

fa a libi fu libisma no de not'noti.

₄₉Sortu libisma de di no o dede,

di man ferlusu ensrefi fu a makti fu dedekondre? sela

₅₀Tye Masra, pe a bigi lobi fu Yu fu fosi de?

Yu ben sweri gi David taki a ben o man tan fertrow na Yu tapu.

₅₁Masra, memre a syen di wi kisi,

fa mi e tyari a syen fu ala den folku.

₅₂Tye MASRA, luku fa den feyanti fu Yu e afrontu mi,

awinsi pe a wan di Yu ben teki e go.

₅₃MASRA fiti fu kisi grani fu têgo.

Amen, iya, so a de.