Kon na krin 5

₁Baka dati mi si wan buku na ini a let'anu fu a Wan di sidon na tapu a kownusturu. Inisei nanga dorosei fu a buku ben abi skrifi, èn a ben tai nanga seibi lenti. ₂Dan mi si wan tranga engel e bari nanga tranga sten taki: “Suma warti fu lusu den lenti èn fu opo a buku?” ₃Ma no wan sma ini heimel, na grontapu noso ondro gron, ben man opo a buku fu leisi en. ₄Dan mi bigin krei tranga, fu di no wan sma ben warti fu opo a buku fu leisi en. ₅Ne wan fu den fesiman taigi mi taki: “No krei. Luku, a lew di kmopo ini a lo fu Yuda, èn di de wan bakapikin fu David, ben wini a strei. Dat' meki na En kan lusu den lenti èn opo a buku.” ₆Dan mi si wan Lam. A ben tnapu na mindri fu a kownusturu, den fo libilibi sani, nanga den fesiman. A ben gersi wan lam di den ben srakti. A ben abi seibi tutu nanga seibi ai. Disi na den seibi Yeye fu Gado di A ben seni go na heri grontapu. ₇Dan a Lam kon teki a lolo ini a let'anu fu a Wan di sidon na tapu a kownusturu. ₈Di A teki a buku, den fo libilibi sani nanga den tutenti-na-fo fesiman fadon tapu den kindi na En fesi. Den alamala ben abi wan gitara, nanga wan gowtu skarki nanga switismeri na ini. Dati na den begi fu den sma fu Gado. ₉Dan den singi wan nyun singi taki:

₁₁Dan mi si èn mi yere bun furu engel. Den ben tnapu lontu a kownusturu nanga den fo libilibi sani nanga den fesiman. Na milyun-milyun engel ben de. ₁₂Den taki nanga tranga sten taki: “A Lam di den srakti, A warti fu kisi makti nanga gudu, sabi nanga krakti, bigi nen nanga grani. Na En nen den mus opo.” ₁₃Dan mi yere ala libi sani di de ini heimel, na tapu grontapu, ondro gron, nanga ini a se taki: “A Wan di sidon na tapu a kownusturu nanga a Lam, na Den nen mus opo. Na Den mus kisi bigi nen, grani nanga krakti fu têgo èn ala ten.” ₁₄Dan den fo libilibi sani piki taki: “Amen,” èn den fesiman fadon tapu den kindi fu anbegi En.