Roma 11

₁Now mi wani aksi: Na poti Gado poti En folku na wan sei? Kwet'kweti! Bika mi srefi na wan sma fu Israel. Mi na wan bakapikin fu Abraham, èn mi na fu a lo fu Benyamin. ₂Gado no poti En folku di A ben sabi na fesi kba, na wan sei. Un sabi a tori fu Elia ini a Santa Buku. Elia ben krutu den sma fu Israel na Gado taki: ₃“Masra, den kiri den profeiti fu Yu, èn den naki den altari fu Yu broko. Mi wawan tan abra, èn den wani kiri mi tu.” ₄Ma san Gado piki en? Gado taigi en taki: “Mi meki seibi dusun man tan na libi, di no boigi den kindi gi Baal.” ₅A de a srefi ini a ten disi. Wan pikin grupu de di Gado teki gi Ensrefi fu sori En bun-ati. ₆A teki den fu di A ben wani sori En bun-ati, a no fu di wan fu den du wan sani fu en. Bika efu na fu di wan fu den du wan sani fu en, dan a bun-ati san Gado sori no ben o de trutru bun-ati.

₇Dan fa dan? Israel leki folku no feni a sani san a e suku. A pikin grupu wawan di Gado ben teki, feni en. Ma Gado ben meki den trawan tranga den ati. ₈A de soleki fa a skrifi taki: “Gado meki den go ini wan dipi sribi. A gi den ai di no man si, nanga yesi di no man yere, te leki a dei fu tide.” ₉Èn David taki: “Meki den fesa tron wan krafana fu kisi den, meki den fadon èn kisi strafu. ₁₀Dungru den ai fu den no si, èn meki den bokru den baka fu têgo.” ₁₁Now mi wani aksi taki: Na fadon den Dyusma fadon fu no opo moro? Kwet'kweti! Ma fu di den psa Gado mofo, meki Gado ferlusu den sma di no de Dyu. Dati psa fu meki den Dyusma dyarusu na den tapu. ₁₂Efu a psa di den Dyusma psa Gado mofo tyari bigi blesi gi grontapu, èn efu a lasi san den lasi meki taki den sma di no de Dyu kon gudu, dan a blesi o moro bigi te ala den Dyusma drai kon baka na Gado.

₁₃Now mi abi wan sani fu taigi unu di no de Dyu. Sensi a de so taki mi na wan boskopuman gi den sma di no de Dyu, mi e suku fu du mi wroko so bun leki mi man. ₁₄Kande tapu a fasi disi mi kan meki den Dyusma leki misrefi kon dyarusu na un tapu, fu Gado kan ferlusu wantu fu den. ₁₅Di Gado poti den na wan sei, A ben meki den tra sma fu grontapu kon bun baka nanga En. Fa a sa de dan te Gado teki den baka? A o de leki wan dede di kon baka na libi. ₁₆Arki, efu yu gi Gado a fosi pisi fu a blon, dan a heri blon santa. Èn efu a rutu fu wan bon santa, dan ala den taki santa tu. ₁₇Gado broko wantu fu den taki fu a oleifbon puru, dan A teki unu di de leki taki fu wan werder oleifbon, poti na ini den presi. So un e feni tu fu a bun nyanyan san a rutu e gi a bon. ₁₈Ma dati no mus meki yu firi yusrefi moro hei leki den taki di kmopo. Bika efu yu e firi yusrefi moro hei, dan yu mus memre taki: A no yu e tyari a rutu, ma na a rutu e tyari yu. ₁₉Dan yu o wani taigi mi taki: “Iya, ma Gado broko den taki puru fu A ben kan poti mi na ini den presi.” ₂₀Dati tru. Ma Gado puru den fu di den no ben e bribi, èn A poti yu fu di yu e bribi. Luku bun taki yu no kisi heimemre. A moro betre yu frede. ₂₁Bika efu Gado no ben sari den trutru taki, A no o sari yu tu. ₂₂Dat' meki yu no mus luku nomo o bun Gado de, ma yu mus luku tu taki A no e meki spotu. A no meki spotu nanga den wan di fadon, ma A bun gi yu, solanga yu e tan fertrow ini En bunfasi. Efu yu no du dati, A o kapu yu puru tu. ₂₃Ma efu den Dyusma bigin bribi, dan Gado o fasi den baka na a bon, bika Gado abi a makti fu du dati. ₂₄Soleki fa yu de, dan yu na fu wan werder oleifbon. Ma Gado ben koti yu puru dan A fasi yu na a bun oleifbon, aladi yu a no fu a bon dati. So a sa moro makriki gi En fu poti den taki baka di ben de fu a bon srefi.

₂₅Brada nanga sisa, fu di mi no wani meki un koni na ini un eigi ai, meki mi o ferteri unu a kibritori disi: Afu fu den sma fu Israel tranga den ati fu wan pisten, te leki ala den sma di no de Dyu èn di ben mus kon na Gado, kon na En. ₂₆Na so Gado o ferlusu heri Israel, soleki fa a skrifi taki: “A Ferlusuman sa kmopo fu Sion. A sa puru ala den sondu fu den bakapikin fu Yakob. ₂₇Èn disi na a ferbontu san Mi o meki nanga den te Mi puru den sondu.” ₂₈Den Dyusma na feyanti fu Gado fu di den no wani bribi a bun nyunsu, èn dati tron un wini. Ma Gado lobi den fu di A ben teki den gi Ensrefi. Na so a ben pramisi den afo fu den. ₂₉Bika a no e hati Gado te A gi wan sma wan presenti, noso te A kari wan sma. ₃₀Fosi un ben tranga un yesi gi Gado. Ma now A sori unu sari-ati, fu di den Dyusma tranga den yesi. ₃₁A de a srefi nanga den. A trangayesi fu den sa meki Gado sori den a srefi sari-ati san A sori unu. ₃₂Bika Gado gi ala sma abra na a trangayesi fu den, fu A kan sori ala sma En sari-ati.

₃₃A gudu, a koni nanga a sabi fu Gado no de fu marki! Un no man ferstan den besroiti fu En! Un no man sabi fa A e du sani! ₃₄“Bika suma sabi den prakseri fu Masra? Suma kan gi En rai? ₃₅Suma gi Gado wan sani tak' Gado mus pai en baka?” ₃₆Bika ala sani e kmopo fu Gado. Na En meki ala sani, èn ala sani de gi En. Na En mus kisi grani fu têgo! Amen.