Roma 4

₁San wi leki Dyusma mus taki fu wi afo Abraham dan? ₂Efu Abraham ben du wan sani fu kon bun ini Gado ai, dan a ben kan meki bigi. Ma na Gado a no ben abi no wan sani fu a ben kan meki bigi. ₃Bika a skrifi ini a Santa Buku taki: “Fu di Abraham bribi Gado, meki Gado si en leki wan sma di bun ini En ai.” ₄Wan sma di wroko e kisi pai fu di a wroko fu en. Den no e pai en fu di den wani sori en den bun-ati. ₅Ma efu wan sma poti en fertrow tapu Gado di e meki sondusma kon bun nanga En, dan Gado e si sowan sma leki wan sma di bun ini En ai. Bika a sma dati no du noti nanga en eigi krakti. ₆David srefi ben taki tak' a sma di Gado e si leki wan sma di bun ini En ai, sondro fu a sma wroko fu en, na wan blesi sma. ₇A skrifi taki: “Den sma di kisi pardon fu den ogri di den du, nanga den sma di Gado no e luku den sondu fu den moro na blesi sma. ₈A sma fu san MASRA no e teri den sondu fu en moro, na wan blesi sma.” ₉Un taigi mi now: Gi suma a blesi disi de? Soso gi den sma di besnei, noso gi den sma di no besnei tu? Bika wi e taki fu Abraham tak' fu di a bribi meki Gado si en leki wan sma di bun ini En ai. ₁₀Ma oten a sani disi psa? Fosi Abraham besnei, noso bakaten? A psa fosi a ben besnei. ₁₁Abraham ben kisi a kotimarki disi bakaten leki wan stampu tak' a kon bun ini Gado ai, fu di a ben bribi Gado di a no ben abi a kotimarki ete. Tapu a fasi disi Abraham tron a afo fu ala sma di e bribi, awinsi den no besnei. Dan Gado e si den leki sma di bun ini En ai. ₁₂Abraham tron a afo tu fu ala sma di besnei. Ma den no mus besnei wawan, den mus abi a srefi bribi tu di wi afo Abraham ben abi fosi a ben besnei.

₁₃A no fu di Abraham ben hori a wèt meki Gado pramisi en nanga den bakapikin fu en taki den o kisi a grontapu disi. Ma fu di a ben bribi meki Gado si en leki wan sma di bun ini En ai. ₁₄Bika efu wi kan kisi wan sani fu Gado nomo fu di wi e hori a wèt, dan bribi no abi warti, èn dan a pramisi na wan soso sani. ₁₅Bika a wèt e tyari a atibron fu Gado kon. Ma pe wèt no de, un no kan broko en tu. ₁₆Dat' meki fu di wi e bribi, meki Gado gi wi a pramisi fu sori wi En bun-ati, èn a pramisi e teri gi ala den bakapikin tu. A no de gi den sma wawan di e hori a wèt, ma a de gi den sma tu di e bribi leki fa Abraham ben e bribi. Bika Abraham na a p'pa fu wi alamala. ₁₇Bika a skrifi taki: “Mi meki yu tron a p'pa fu furu folku.” Ini a ai fu Gado, Abraham de dati tu, èn ini a Gado disi a ben e bribi. Gado na a Wan di e meki dedewan kon baka na libi, èn na En e meki san no ben de, kon de. ₁₈Gado ben taigi Abraham taki a ben o kisi furu bakapikin, èn aladi ala sani ben e sori kba taki a no ben o man tron a p'pa fu furu folku, a tan bribi èn a no lasi howpu. ₁₉Abraham ben si taki a owru tumsi fu kisi wan pikin, bika a ben e suku fu tapu wan hondro yari kba. Sara srefi no ben o man kisi pikin moro. Ma Abraham no ben kon swaki na ini en bribi. ₂₀Noiti a lasi bribi ini a pramisi fu Gado, èn a bribi fu en ben kon moro tranga. Nanga dati a ben gi Gado grani. ₂₁A ben sabi krinkrin taki Gado abi a makti fu du san A ben pramisi. ₂₂Na a bribi dati meki taki Gado si en leki wan sma di bun ini En ai. ₂₃A skrifi taki Gado si Abraham leki wan sma di bun ini En ai. Ma un mus sabi taki a sani disi no e teri gi Abraham wawan. ₂₄A e teri gi wi tu, te wi poti wi bribi na ini Gado di meki Yesus, wi Masra, opo baka na dede. ₂₅Yesus ben dede fu wi sondu ede, èn A opo baka fu wi kan kon bun nanga Gado.