Roma 6

₁San un sa taki dan? Un sa tan sondu fu Gado sori un En bun-ati moro nanga moro? ₂Kwet'kweti! Un dede gi sondu. Fa un kan tan libi na ini sondu ete dan? ₃Na sabi un no sabi taki wi alamala di dopu ini Kristus Yesus, ben dopu ini a dede fu En? ₄Di wi dopu, wi dede èn wi beri makandra nanga En. Dan soleki fa a P'pa meki Kristus opo baka na dede nanga a bigi makti fu En, na so wi o libi wan nyun libi tu. ₅Bika efu wi tron wan nanga Kristus fu di wi dede leki En, dan so wi sa opo baka na dede neleki En. ₆Wan sani wi sabi: Di den spikri Yesus na a kroisi, a owru fasi fu wi ben spikri makandra nanga En. Dati psa fu tyari wan kba kon na a sondufasi fu wi, èn fu a sondu no man basi wi moro langa. ₇Bika sondu no abi makti moro tapu wan sma di dede. ₈So, efu wi dede makandra nanga Kristus, wi e bribi taki wi sa libi makandra nanga En tu. ₉Bika wi sabi taki fu di Kristus opo baka na dede, A no o dede moro. Dede no abi makti moro na En tapu. ₁₀Di Kristus dede, A dede wan leisi nomo fu broko a makti fu sondu, èn noiti A sa abi fu dede moro. Ma now di A e libi, A e libi gi Gado. ₁₁Na so un mus si en tu, taki un dede gi sondu, ma un e libi gi Gado fu di un de wan nanga Kristus Yesus. ₁₂Un abi wan skin di o dede, ma un no mus meki sondu rigeri leki basi na ini a skin disi, fu du san a lostu. ₁₃No gi no wan pisi fu yu skin na a sondu fu du den ogri sani fu en. Ma poti yusrefi fu wroko gi Gado leki sma di ben dede, ma di e libi now. Poti ala pisi fu yu skin fu du wroko san bun ini Gado ai. ₁₄Dan sondu no o basi un moro. Bika un no de ondro a wèt, fu di Gado sori un En bun-ati.

₁₅San un sa du dan? Wi kan tan sondu fu di wi no de moro ondro a wèt, ma fu di Gado sori wi En bun-ati? Kwet'kweti! ₁₆Un sabi taki te yu e poti yusrefi leki srafu gi wan sma, dan a sma dati na yu basi èn yu mus fu du san a taki. Efu yu de wan srafu fu sondu, dan yu o dede. Ma efu yu e du san Gado wani, dan yu o de wan bun sma ini En ai. ₁₇Ma mi e taki Gado tangi! Bika fos'fosi un ben de srafu fu sondu, ma now un gi yesi nanga un heri ati na a leri di un kisi. ₁₈Now un kon fri fu sondu, èn un tron srafu fu Gado fu du san bun ini Gado ai. ₁₉Mi e taki a sani disi libisma fasi fu un kan ferstan san mi e taki. Fos'fosi un ben poti unsrefi leki srafu fu libi wan doti libi, èn un ben e broko a wan wèt baka a trawan. Ma now un mus poti ala pisi fu un skin fu du san bun ini Gado ai. Disi o meki un kon santa. ₂₀Di un ben de srafu fu a sondu ete, un no ben man du san bun ini Gado ai. ₂₁Ma sortu wini un ben abi? Now un e syen fu den sani san un ben e du, bika a kba fu den sani dati na dede. ₂₂Ma now un kon fri fu sondu èn un tron srafu fu Gado. A wini san un abi na taki un kon santa, èn a kba fu a sani disi na a libi fu têgo. ₂₃Bika a paiman fu sondu na dede. Ma a presenti san Gado gi wi, na a libi fu têgo na ini Kristus Yesus, wi Masra.