1Libanon, opo den bigi doro fu yu
meki a faya bron den sedrebon.
2Yu sipresbon, yu mus krei
bika a sedrebon fadon.
Den bigi bon fu Basan mus krei
bika den kapu a busi opo.
3Yere fa den skapuman e krei
fu di den moi wei fu den no de moro.
Yere fa den yongu lew e bari
fu di a bigi busi tapu san a Yordan ben e meki bigi,
no de moro.
4Na so MASRA, mi Gado taki: “Sorgu gi den skapu fu Mi di den o srakti. 5Den sma di bai den e srakti den sondro wan firi. Den sma di e seri den e taki: ‘Mi e taki MASRA tangi fu di mi kon gudu.’ Den skapuman no e sari den.” 6Na so MASRA taki: Mi no sa sari den sma fu grontapu moro. Luku, Mi e gi den sma abra na makandra nanga ini anu fu den kownu. Den o meki a kondre tron wan sabana ma Mi no o ferlusu noti puru ini den anu. 7Fu dat'ede mi ben e sorgu gi skapu di den o srakti. Den skapu di ben de fu den man di e seri skapu fu srakti. Dan mi teki tu tiki. A wan mi kari: Switi fasi, a trawan mi kari: Tyari kon na wan. Na so mi sorgu gi den skapu. 8Ini wan mun mi puru dri skapuman na pasi. Mi no ben abi pasensi moro nanga den èn den no ben lobi mi srefsrefi tu. 9Fu dat'ede mi taki: “Mi no sa sorgu moro langa gi unu. San o dede, kan dede. San o puru na pasi, kan puru na pasi. Den wan san tan abra, kan nyan densrefi.” 10Ne mi teki a tiki di mi ben kari: Switifasi, dan mi naki en broko. Na so mi broko a ferbontu di mi ben meki nanga ala folku. 11Na so mi broko a ferbontu a ten dati. Dan so den man di ben e luku san mi e du, den man di ben e seri den skapu, kon si taki disi ben de wan boskopu fu MASRA. 12Dan mi taigi den taki: “Efu san mi du ben bun ini un ai, dan un gi mi a moni di mi mus kisi. Ma efu a no bun ini un ai dan un kan libi en.” Ne den wegi dritenti solfrumoni gi mi. 13Ma MASRA taigi mi taki: “Tyari go pe den e faya solfru fu a kon safu. Na disi na a moni di den feni taki fiti mi.” So mi teki den dritenti solfru moni dan mi tyari en go fringi ini a oso fu MASRA, pe den e faya a solfru fu a kon safu. 14Baka dati mi teki a tra tiki fu mi di mi ben e kari: Tyari kon na wan, dan mi broko en. Tapu a fasi dati mi broko a banti mindri Yuda nanga Israel, di den ben abi leki brada.
15Dan MASRA taigi mi taki: “Weri den krosi ete wan leisi leki efu yu na wan skapuman di no sabi not' noti fu a wroko. 16Bika arki, mi o poti wan skapuman ini a kondre. A no o broko en ede nanga a skapu di e go lasi. A no o go suku den wan di lasi pasi. A no o dresi den skapu tu di kisi mankeri noso sorgu gi den bun wan di de ete. Kwet' kweti! A o nyan a meti fu den moro fatu skapu. A o hari den futu fu den srefi puru.
17Ma a skapuman di no warti srefsrefi
èn di e gwe libi den skapu,
mus luku bun.
Deigri sa kapu en anu
èn dyuku en leti ai puru.
A anu sa malengri
èn a no sa man si moro nanga en ai.”
