Lees verschillende vertalingenLees verschillende vertalingen
Vergelijk verschillende vertalingenVergelijk verschillende vertalingen
Maak uw notitiesMaak uw notities
Kopieer en markeer BijbeltekstenKopieer en markeer Bijbelteksten
Uitproberen
Sakaria 9
Israel no abi fu frede den tra kondre
1A boskopu fu Gado. Disi na san MASRA taigi mi.
“A de na ini Hadrak èn a e tan na ini Damaskus. Bika a ai fu MASRA de na tapu ala sma leki fa a de na tapu ala den lo fu Israel. 2Iya, a de na tapu Hamat tu di didon na sei den kondre disi nanga na tapu Tyrus nanga Sidon awinsi fa den disi denki taki den koni. 3Tyrus bow wan tranga hei skotu lontu a foto. Den abi someni solfru leki santi nanga gowtu leki a tokotoko di didon na strati. 4Ma arki, Masra sa teki a foto abra. A sa naki a gudu fu den trowe na ini se. A foto sa bron te na gron. 5Den sma fu Askelon sa frede te den si dati. Den di fu Gasa o beifi. Ekron e lasi ala howpu. Dan a kownu fu Gasa no sa de fu feni moro, èn no wan sma sa de fu feni na ini Askelon. 6A folku san o de na ini Asdod o de wan moksi sani fu ala sortu folku. Mi o broko a bigifasi fu den Filistijnsma. 7Mi o hari a meti di abi brudu ete puru na ini den mofo nanga den tra groskin sani di den e nyan. Ma wantu sma fu a folku o tan na libi gi a Gado fu unu. Den o tron wan famiri na ini Yuda èn den sma fu Ekron sa de leki den Yebusitisma gi wi. 8Mi sa hori wakti gi Mi kondre gi den legre di e go kon. No wan sma sa kon fu pina den bika Misrefi sa hori ai na den tapu.”
9Sion, yu mus bari fu prisiri
Yerusalem, opo yu sten fu prisiri!
Luku yu kownu e kon.
A e du sani nanga leti,
A e tyari wini kon
èn A abi sakafasi.
A sidon tapu wan buriki
tapu wan yongu manburiki.
10Dan Mi sa figi den fetiwagi puru na ini Efraim,
nanga den asi na ini Yerusalem.
Mi sa figi den bo puru tu.
A sa tyari freide kon na mindri den folku.
A sa de kownu fu a oostsei go te na a westsei,
èn fu a Liba go te na a kba fu grontapu.
11Mi sa poti den wan fu unu fri di de na srafu ete ini a peti sondro watra. Mi sa du disi fu di yu nanga Mi abi wan ferbontu di stampu nanga brudu. 12Un srafu di ben abi howpu ete, un drai go baka na a tranga foto. Tide srefi Mi e taigi un taki: Mi sa blesi un tu tron so furu. 13Mi sa span Yuda leki wan bo, Efraim sa de leki a peiri na en tapu. Mi sa opo den sma fu Sion leki wan deigri fu wan dyadya fetiman fu feti den sma fu Grikikondre.
14Dan MASRA sa de fu si na loktu, tapusei fu En folku. A peiri fu En sa frei leki a faya di e koti na loktu. Dan Masra fu MASRA sa bro tapu a tutu. A sa hari kon leki wan tranga winti fu a zuidsei. 15MASRA fu ala sani sa kibri den. Den o swari den feyanti fu den, den sa trapu den ston di a feyanti e fringi kon na den tapu. Den o dringi a brudu fu den feyanti leki win te den kon drungu. Den o dringi te den e lon abra leki wan beki, leki den uku fu wan altari. 16A ten dati MASRA, a Gado fu den, sa ferlusu en folku, leki fa wan skapuman e du nanga den skapu fu en. Bika den de leki den diri ston na tapu wan kroon, di sa brenki na ini a kondre. 17Fu tru, luku o moi a de! A win nanga a karu e meki yonkuman nanga yongu uma e gro kon bun.
