1 Temuꞌti 2

₁Tanporon wapiya ekama'po tanporon kon pona rɨ tʉusennasen pe, tʉwɨpʉremasen pe, ekama'ponin pe ɨwesi pa, tenki tawon pe tanporon kon ka'pon amʉ' pɨ'— ₂kin amʉ' pona mɨrɨ awonsi'kɨ tanporo kamo eke ton pona, tʉusewankamai' pʉra uko'man nɨto' kon pe mɨrɨ awonsi'kɨ tʉtʉi pe tanporon nɨ Papa pokon pe e'nɨto' mɨrɨ awonsi'kɨ wakʉ pe e'nɨto' yau. ₃Serɨ serɨ wakʉ, Papa, upika'tɨnin kon pori'manin, ₄tanporo ka'pon amʉ' epika'tɨ i'sero' mɨrɨ awonsi'kɨ i'nairon i'tunin nan pe tenasan pe. ₅Apʉne pʉra tikin nɨ Papa esi mɨrɨ awonsi'kɨ tikin nan iporo e'nɨto' Papa mɨrɨ awonsi'kɨ ka'pon amʉ' ka'sanawon, kʉrɨ rɨ ka'pon esi Kʉrai Sises, ₆tʉmɨrɨ pe iye'tʉsa' rʉ'pʉ tanporon kon ka'pon amʉ' epe' pe—isekamasa' rɨ iweyu pe te'sen a'tai rɨ. ₇Serɨ ku'nin pe rɨ anʉnsa' rʉ'pʉ urɨ main anin pe mɨrɨ awonsi'kɨ itekare ekamai' enno'sa' pe—i'nairon ekama uya serɨ, kasi pe esi pen—mɨrɨ awonsi'kɨ i'nai rɨ apurɨto' ti'saai pe e'to' pe Esuwerʉ amʉ' pen iwano' pe.

₈Mɨ yawɨron kon nɨ warawoti'si amʉ' uya wakʉ temiyatʉ kon anʉmʉ i'se esi ɨpʉreman pɨ', sakoro mɨrɨ pe pʉra e'sei'pɨ' nɨ a'kɨrɨ pʉra. ₉Uri'sami'si amʉ' nɨrɨ epontɨ i'se esi itenu entai pʉra, tapurɨsen ye' pe mɨrɨ awonsi'kɨ wakʉ iteseru ye' pe, ika'pɨ'sa' ipʉrʉ'tɨsa' i'pai pe pʉra mɨrɨ pe pʉra korʉ mɨrɨ pe pʉra mokon mɨrɨ pe pʉra epe'kena' ipon pe pʉra, ₁₀e'tane wakʉ ku'nin pe, uri'sami'si amʉ' Papa apurɨpɨ'nin nan pe te'san e'to' e' pe.

₁₁Uri'sami'si amʉ' usenupato' pe iyesi e'pana esii'ma mɨrɨpan kon e'to' pe iyesi main awɨron kon pe. ₁₂Uri'san e'to' pe enupanin pe mɨrɨ pe pʉra warawo' entai eke pe ta uya pʉra man; e'pana iye'to' pe iyesi. ₁₃Apʉne pʉra Atan koneka'pʉ wapiya, mɨrɨ awonsi'kɨ I' nin si. ₁₄Mɨrɨpan Atan ennakasa' pʉra iyesi; uri'san nin ennaka'pʉ mɨrɨ, mɨrɨpan ena'pʉ tʉmakooi ke. ₁₅E'tane uri'sami'si amʉ' epika'tɨto' oton to' umu'ta winɨ—apurɨto' yau to' esi yau, usi'nʉnkan nɨto' yau, mɨrɨ awonsi'kɨ wakʉ pe tiwano' kon pe, tʉuse'se'tɨto' kon ke.