Hebar log 3
Jiesoe aur Mosas
1Bhaai logan, Parmeswar toelogke apane khaatien alag karies hai aur bolaais hai swarag me rahe ke. Ohie se toelog aapan dhiaan okar pathaawal Waala par lagaaw. Oe to hamlogke sab se barka agwa Jiesoe hai. Okar biese me hamlog gawaahie deila. 2Djaise Mosas aapan kaam Parmeswar ke djaatie khaatien poera karies raha, oisane Jiesoe poera karies hai djaun kaam Parmeswar okar oeppar saupies raha. 3Ek ghar ke aadar na howe hai, bakie banaawe waala ke. Aisane Jiesoe ke Mosas se auro aadar mielal. 4Sab ghar iensaan banaawe hai, bakie saara sansaar ke banaawe Waala Parmeswar hai. 5Mosas aapan kaam Parmeswar ke djaatie khaatien bharosaadaar kamkarta ghat poera karies raha. Okar kaam raha oesabse bataawe ke kie baad me ka hoiga. 6Bakie Kriest Parmeswar ke Beta hai, aur aapan djaatie ke Barkwa. Oe bhie aapan kaam oe djaatie khaatien poera karies hai. Djab hamlog okar oeppar bharosa karab, hiemmat ant talak pakarle rahabe aur kholke bolab kie hamlogke aasa hai sada ke lieje Parmeswar ke lage rahe ke, tab hamlog okar djaatie baatie.
Hardam batjaaike rahiehe
7Aise dekha hai kie Jiesoe Mosas se auro barka hai. Ohie se Pawietr Aatma bole hai:
„Djab toelog aadj Parmeswar ke aawaadj soeniehe,
8,9tab aapan man kathor na kariehe djaise toelogke baap-daada log maidaan me karat raha. Oesab hamaar atjambho kaam dekhke tabbo tjaalies baries talak hamme adjmaawat raha.
10Ohie khaat ie koel se hamaar diel toet gail aur ham bollie kie:
‘Oesab hardam bhatkat rahe hai aur na maange hai hamaar rasta par tjale.’
11Tab ham goessaaike kasam khaaike bollie kie: ‘Oesabke hamaar sjaantie kabhie na mieliega.’ ”
12Bhaai log soen, toelog hardam batjaaike rahiehe kie toelog me se koi ke diel kharaab aur be-bieswaas na rahiega aur djienda Parmeswar se na doer hoi djaaiga. 13Ohie se djab talak mauka rahiega toelogke tjaahie rodj apane apane me soedhaare ke, djeme ekko bhaai-bahien na bahakaawal djaai aur paap me boer djaaike thetharai kare. 14Djab hamlog ant talak Kriest me saamiel rahabe djaise pahiele, tab hamlog okar saathie baatie. 15Pawietr Aatma bolies hai kie:
„Djab toelog aadj Parmeswar ke aawaadj soeniehe, tab aapan man kathor na kariehe djaise toelogke baap-daada log karat raha.”
16Ke okar aawaadj soenke thetharai karat raha? Israel ke djaatie log karies, tjaahe Mosas oesabke Egypte des me se legail raha. 17Aur Parmeswar ke diel tjaalies baries talak ke se toetal? Oelogse djaun paap-boeraai karat raha aur mar-marke maidaan me paral raha. 18Oe kekar biese me kasam khaaike bolies kie:
„Oesabke hamaar sjaantie kabhie na mieliega?”
Oe ie sab baat bolies oelogke biese me djaun na maangat raha okar baat soene. 19Aise hamlog dekhiela kie oesabke okar sjaantie na mielal raha oelogke be-bieswaas ke dwaara.
© 2010, Wycliffe Bible Translators, Inc. All rights reserved.
