Mateus 27

₁Di dei opo, ala den prenspari domri nanga den fesiman fu a folku teki a besroiti fu kiri Yesus. ₂Dan den tai En tyari go gi granman Pilatus.

₃Yudas, di ben seri Yesus, si tak' den ben wani kiri En, dan a kisi konsensi fonfon. So a tyari den dritenti solfrumoni go baka gi den prenspari domri nanga den fesiman fu a folku. ₄A taigi den taki: “Mi sondu, bika mi seri wan man di no du noti.”

Ma den piki en taki: “Dati na yu problema. Un kba nanga a tori.”

₅Ne Yudas fringi a moni go ini a Santa Presi, dan a gwe go anga ensrefi. ₆Den prenspari domri piki a moni, dan den taki: “Un no kan poti a moni disi ini a kisi pe sma e poti moni gi a mamakerki, bika na moni di pai fu kiri wan sma.” ₇Dan den teki a besroiti fu bai wan pisi gron di ben de fu a man di ben meki prapi. A gron dati den bo teki leki berpe gi doroseisma. ₈Fu dat'ede den e kari a gron dati Brudu Gron te leki a dei fu tide.

₉Na so a sani san a profeiti Yeremia ben taki kon tru. A ben taki: “Den teki den dritenti solfrumoni di den sma fu Israel ben agri fu pai gi en, ₁₀dan den bai a gron fu wan man di e meki prapi. Na dati Masra ben taigi mi fu du.”

₁₁So den man tyari Yesus go na granman Pilatus. Dan Pilatus aksi En taki: “Na Yu na a Kownu fu den Dyu?”

Yesus piki en taki: “Na leki fa yu taki.”

₁₂Ma di den prenspari domri nanga den fesiman fu a folku ben kragi En, Yesus no piki noti. ₁₃Pilatus aksi Yesus taki: “Yu no e yere ala den sani san den e taki fu Yu?” ₁₄Ma Yesus no piki en tapu no wan sani. A sani dat' meki Pilatus ferwondru srefsrefi.

₁₅A ben de a gwenti te den ben hori a Paskafesa tak' a granman ben lusu wan straf'man di den Dyusma ben wani. ₁₆A ten dati wan man ben de na straf'oso di furu sma ben sabi. A ben nen Barabas. ₁₇Dan fu di furu Dyusma ben drape, Pilatus aksi den taki: “Suma un wani tak' mi mus lusu gi unu? Barabas noso Yesus, di den e kari a Mesias.” ₁₈Pilatus ben sabi heri bun tak' den ben tyari Yesus kon gi en fu di den ben dyarusu na En tapu.

₁₉Di Pilatus ben sidon tapu a krutusturu, en frow seni taigi en taki: “No leisi strafu gi a man disi di no du noti. Bika a neti di psa mi nyan furu pina fu En ede ini wan dren.”

₂₀Ma den prenspari domri nanga den fesiman fu a folku sutu faya gi a bigi grupu sma meki den aksi Pilatus fu lusu Barabas, èn fu kiri Yesus.

₂₁Pilatus aksi den sma baka taki: “Sortu wan fu den tu man un wani tak' mi mus lusu?”

Den sma taki: “Barabas.”

₂₂Dan Pilatus aksi den taki: “Dan san mi mus du nanga Yesus, di den e kari a Mesias?”

Ne ala sma bari taki: “Spikri En na wan kroisi!”

₂₃Pilatus aksi den baka taki: “Ma sortu ogri a man disi du?”

Ma den sma bigin bari moro tranga taki: “Spikri En na wan kroisi!”

₂₄Dan Pilatus si tak' noti no e yepi moro, ma tak' moro nanga moro den sma e meki opruru. Dat' meki a teki watra, dan a wasi en anu na ala den sma fesi. A taigi den taki: “Mi no abi noti fu du nanga a dede fu a man disi. San o psa na unu problema. Mi kba nanga a tori.”

₂₅A heri folku piki en taki: “Meki a frantwortu fu En dede kon tapu wi nanga den bakapikin fu wi!”

₂₆Baka dati Pilatus lusu Barabas, dan a meki den wipi Yesus èn tyari En go spikri na wan kroisi.

₂₇Den srudati fu Pilatus tyari Yesus go ini a krutu-oso, dan den kari ala den tra srudati kon di ben drape. ₂₈Den puru En krosi, dan den weri wan redi mantel gi En. ₂₉Den brei wan banti fu makataki poti tapu En ede, dan den gi En wan tiki fu A hori ini En let'anu. Dan den fadon tapu den kindi na En fesi, èn den meki spotu nanga En taki: “Odi, Kownu fu den Dyu!” ₃₀Baka dati den spiti na En tapu, dan den teki a tiki na En anu, naki En tapu En ede. ₃₁Di den kba meki spotu nanga En, den puru a mantel, dan den weri En eigi krosi gi En baka. Dan den tyari En gwe fu go spikri na wan kroisi.

₃₂Di den ben de na pasi, den miti nanga wan man fu a foto Sirena di ben nen Simon. Dan den dwengi en fu a tyari a kroisi gi Yesus. ₃₃Di den doro na a presi san den e kari Golgota (dati wani taki: Dede-ede Presi), ₃₄den gi Yesus win di ben moksi nanga wan bita sani. Ma di A tesi en, A no ben wani dringi en. ₃₅Baka di den spikri En na a kroisi, den hari a lot fu prati En krosi. ₃₆Di den kba, den saka sidon drape fu hori wakti gi En. ₃₇Tap'sei fu En ede den ben skrifi fu sanede den kiri En. Den skrifi taki: “Disi na Yesus, a Kownu fu den Dyu.”

₃₈Den srudati spikri tu fufuruman makandra nanga Yesus, wan na En let'anu sei, èn a trawan na En kruktu-anu sei. ₃₉Den sma di ben e waka psa, afrontu Yesus. Den seki den ede èn den taki: ₄₀“A no Yu bo broko a Santa Presi dan Yu meki en baka ini dri dei? We, efu na Yu na a Manpikin fu Gado, dan yepi Yusrefi! Saka kmopo fu a kroisi dan!”

₄₁Den prenspari domri nanga den sabiman fu Gado wèt makandra nanga den fesiman fu a folku ben meki spotu nanga En tu. Den taki: ₄₂“A ben yepi trawan, ma A no man yepi Ensrefi! Efu na En na a Kownu fu Israel, meki A kmopo fu a kroisi now. Dan wi sa bribi En! ₄₃A poti En fertrow tapu Gado. We, efu Gado lobi En so, meki A yepi En now, bika A ben taki tak' En na a Manpikin fu Gado!” ₄₄Tapu a srefi fasi den fufuruman di ben spikri makandra nanga En, ben kosi En tu.

₄₅Twarfu yuru brekten, a heri kondre kon dungru te leki dri yuru bakadina. ₄₆Dan a yuru dati Yesus bari taki: “Eli, Eli, lama sabaktani?” Dati wani taki: Mi Gado, Mi Gado, fu sanede Yu gwe libi Mi?

₄₇Di wantu sma di ben tnapu drape yere a sani disi, den taki: “Na Elia A e kari.” ₄₈Wantron wan fu den lon go teki wan sponsu, dan a nati en nanga swa win. A fasi a sponsu na wan tiki, dan a langa en gi Yesus fu A dringi.

₄₉Ma den tra sma taki: “Wakti, meki un luku efu Elia o kon yepi En.”

₅₀Yesus bari ete wan leisi nanga tranga sten, dan En bro koti. ₅₁A srefi momenti dati a garden ini a Santa Presi priti langalanga na mindri fu loktu kon te na gron. A gron seki èn den ston priti. ₅₂Grebi opo tu, èn furu sma fu Gado di ben dede kba, kon na libi baka. ₅₃Den kmopo ini den grebi, èn baka di Yesus kon na libi baka den go ini a santa foto Yerusalem pe den sori densrefi na furu sma.

₅₄Den srudati di ben hori wakti na Yesus, nanga a kapten fu den, firi fa a gron seki. Èn di den si den sani di psa, den bigin frede srefsrefi. Dan den taki: “Trutru, a man disi ben de a Manpikin fu Gado.”

₅₅Furu uma fu Galilea, di ben waka nanga Yesus fu sorgu gi En, ben drape tu. Den ben tnapu farawe e luku. ₅₆Wantu fu den uma dati ben de Maria fu a foto Magdala, nanga Maria a m'ma fu Yakobus nanga Yosef, nanga a frow fu Sebedeus.

₅₇Di neti ben de fu tapu, wan guduman kon di ben nen Yosef. A ben de fu a foto Arimatea èn a ben de wan man di ben teki leri fu Yesus tu. ₅₈A go na Pilatus fu aksi en a dedeskin fu Yesus. Dan Pilatus seni taigi den srudati tak' den kan gi en. ₅₉So Yosef teki a dedeskin fu Yesus, èn a domru en ini wan krin linnen krosi. ₆₀Dan a poti a dedeskin ini a nyun grebi fu en di a ben meki den diki ini a bergiskin. Baka dati a lolo wan bigi ston na a mofo fu a grebi fu tapu en, dan a gwe. ₆₁Maria fu Magdala nanga a tra Maria, ben sidon a pisten dati na abrasei fu a grebi.

₆₂A tra dei fu en, den prenspari domri nanga den Fariseiman go makandra na Pilatus. A ben de wan sabadei. ₆₃Dan den taigi en taki: “Masra, wi memre tak' di a bedrigiman disi ben de na libi ete, A ben taki tak' baka dri dei A bo kon na libi baka. ₆₄Dat' meki wi e aksi yu fu meki srudati hori wakti na a grebi dri dei langa. Bika den man fu En kan kon fufuru a dedeskin, dan den go ferteri den sma tak' A kon na libi baka. A lei dati o bigi moro a fosi wan.”

₆₅Pilatus taigi den taki: “Un kan teki srudati, ma unu srefi luku fa un o seti a wakti drape.”

₆₆So den man go poti wan marki na a ston fu sma no kan puru en èn den poti srudati fu hori wakti.