Wan singi fu di Babilon fadon
1Baka dati mi yere wan heri ipi sma na ini heimel e taki:
Haleluya!
Na wi Gado ferlusu wi.
Na En mus kisi glori.
Na En abi makti.
2Bika A e koti krutu nanga leti,
èn A no e meki fowtu.
A strafu a bigi motyo
di ben pori grontapu
nanga den takru lostu fu en,
èn A meki a pai
fu den knekti fu En di a ben kiri.
3Dan a bigi ipi sma bari ete wan leisi:
Haleluya!
A smoko fu a foto o de fu si
fu têgo èn ala ten.
4Dan den tutenti-na-fo (24) fesiman nanga den fo libilibi sani fadon tapu den kindi èn den anbegi Gado di e sidon na tapu a kownusturu. Den taki:
Amen, haleluya!
5Dan wan sten taki kmopo fu a kownusturu taki:
Prijse wi Gado,
un ala di e dini En
nanga unu di e lespeki En,
pikinwan nanga bigiwan!
A trow fu a Lam
6Dan mi yere wan sani san ben gersi a sten fu wan heri ipi sma. A ben gersi a babari fu wan bigi sula nanga a bigi babari fu dondru. A taki:
Haleluya!
Bika Masra wi Gado
di abi Ala Makti,
e rigeri now leki kownu.
7Kon meki wi prisiri
èn nyanprei,
meki wi gi En glori.
Bika a trowdei fu a Lam
doro kba,
èn a trowmisi fu En
meki ensrefi klari.
8Den gi en weti linnen krosi
fu weri
san krin èn san e brenki.
Bika a weti linnen krosi na den bun wroko fu den sma fu Gado.
9Dan a engel taigi mi taki: “Skrifi a sani disi: Blesi de tapu ala den sma di kisi kari fu kon na a trowfesa fu a Lam.” A taigi mi moro fara taki: “Den tru wortu disi kmopo fu Gado.”
10Dan mi fadon tapu mi kindi fesi a engel fu anbegi en. Ma a taigi mi taki: “No du a sani disi! Mi na wan knekti, neleki yu nanga den tra sma di e tan hori na den sani san Yesus taki. Na Gado yu mus anbegi! Bika ala den sani san Yesus taki, na den sani san a Yeye fu Gado ben gi den profeiti fu den taki.”
A Wan di e sidon tapu a weti asi
11Baka dati mi luku, dan mi si tak' heimel opo. Ne mi si wan weti asi. A Wan di sidon na tapu a asi, den e kari: “A Wan di yu kan fertrow, a Wan di no e lei.” Tapu wan leti fasi A e krutu den feyanti fu En èn A e feti nanga den. 12Den ai fu En ben de leki faya, èn tapu en ede A ben weri furu kownu-ati. Wan nen ben skrifi na En tapu san En wawan sabi.
13A ben weri wan krosi san ben dopu na ini brudu, èn En nen na: “A Wortu fu Gado.” 14Den legre san de na heimel ben rei na En baka na tapu weti asi, èn den ben weri krin weti linnen krosi. 15Ini en mofo wan srapu owru e kmopo. Nanga dati A o wini den sma di no sabi Gado, èn A o tiri den nanga wan isri tiki. Neleki fa den e stampu droifi na ini wan baki fu meki win, na so A o stampu den folku na ini a baki fu a faya atibron fu Gado di abi Ala Makti. 16A sani san skrifi na tapu En krosi èn na tapu En bowtu na: “Kownu fu ala kownu, nanga Masra fu ala masra.”
A meti nanga en profeiti lasi a feti
17Dan mi si wan engel tnapu na tapu a son. A bari nanga tranga sten gi ala den tingifowru di e frei bun hei na loktu taki: “Un kon! Un kon na a bigi fesa san Gado e gi unu. 18Un kon nyan a meti fu kownu, legre-edeman nanga srudati. Un kon nyan a meti fu asi nanga den sma di e rei na den tapu, nanga a meti fu ala den tra sma: fri sma nanga srafu, pikinwan nanga bigiwan.”
19Dan mi si a meti san ben kmopo ini a se, nanga den kownu fu grontapu nanga den legre fu den. Den ben kon makandra fu feti nanga a Wan di sidon na tapu a asi, nanga a legre fu En. 20Dan den kisi a meti nanga a wan di ben kari ensrefi a profeiti, di ben wroko gi a fosi meti. Nanga den wondru fu en a ben kori den sma di ben abi a marki fu a meti, èn di ben anbegi a bigi popki san gersi en. Libilibi den fringi den go ini a swampu di abi soso faya èn san e bron nanga kroiti. 21Ma den trawan dede. A owru san e kmopo ini a mofo fu a Wan di sidon na tapu a asi, kiri den. Dan ala den fowru nyan den, furu den bere nanga a meti fu den.
