8A sma di e diki wan olo kan fadon go na ini, èn sneki kan beti wan sma di e broko wan skotu. 9A sma di e kapu ston puru na bergi kan kisi mankeri, èn a sma di e priti udu mus luku bun taki a no kisi mankeri. 10A sma di no e srapu wan aksi te a dede, mus poti moro krakti te a e wroko. Ma koni na a moro bun sani di wan sma abi fanowdu, fu meki sani waka bun. 11Efu a sneki beti a man di sabi tiri sneki, fosi a tiri a sneki, dan a man no abi noti na en.
12Den sani di wan koni sma e taki e meki sma e lespeki en, ma den sani di wan don sma e taki e meki a broko en eigi neki. 13Te a e bigin taki, yu e si kba dati na dondon sani a e taki. O moro fara a e go, o moro a e taki babaw. 14Wan don sma e tak'taki furu, ma no wan sma sabi san o psa ini a ten di de na en fesi. Suma o man taigi en dati? 15A tranga wroko di wan don sma e du e meki a e weri ensrefi, ma a pasi fu go na foto srefi a no man feni.
Tu sortu kownu
16Bigi problema o miti a kondre di abi wan kownu di yongu tumsi èn di abi tiriman di e nyan na bigi nyanyantafra fruku mamanten kba. 17Ma a kondre di abi wan kownu di kmoto fu wan heihei famiri, na wan blesi kondre. Den tiriman fu so wan kondre sabi a yoisti ten fu nyan na bigi nyanyantafra, fu kisi krakti èn no fu dringi drungu. 18Efu wan sma lesi, den postu fu en oso o fadon. Efu wan sma e sidon nomo, a daki fu en oso o leki. 19Sma e nyan wan bun preti nyan gi den prisiri, èn win e gi prisiri ini a libi. Ma efu yu no abi moni yu no kan abi no wan fu den tu. 20Yu no mus fluku wan kownu, srefi ini yu prakseri yu no mus du en. Yu no mus fluku wan guduman, srefi ini yu sribikamra yu no mus du dati. Bika den fowru di e frei na loktu sa ferteri en moro fara. Den sa panya lontu sa yu taki.
