14 december - Sefanja 3:9-13

₉Dan Mi o gi den folku soifri mofobuba fu taki,

fu den kari soso a nen fu MASRA.

Den o tnapu sei nanga sei fu dini En.

₁₀Fu te abra den liba fu Etiopia

den wan di e anbegi Mi,

den wan di ben panya go na alasei,

sa tyari ofrandi gi Mi.

₁₁Ma a dei dati un no o abi fu firi syen

fu ala den sani di un du,

di no ben bun ini Mi ai.

Bika Mi o puru na un mindri

ala sma di e prisiri

fu di den e denki bigi fu densrefi.

Bigin fu a dei dati

un no sa abi bigifasi moro

tapu Mi santa bergi.

₁₂Mi o sorgu taki wan pikin èn swaki folku tan na baka ini a foto,

di e suku yepi na MASRA.

₁₃Den sma fu Israel di tan na baka

no sa du moro san no bun,

den no sa taki sani di no tru

èn den no sa bedrigi trawan nanga den mofo moro.

Bika den sa didon leki skapu na ini wan wei,

sondro taki wan sani trobi den.