1 Lelakoné Kraton 23

₁Bareng Daved wis dadi tuwa lan wis okèh banget umuré, terus ngangkat Salomo dadi ratu ing Israèl. ₂Para penggedéné Israèl lan uga para imam lan para wong Lèwi pada diklumpukké. ₃Para wong Lèwi sing umur telung puluh taun munggah pada diitung, siji-siji, tyatyahé ana 30.000 wong. ₄“Wong iki sing 24.000 wong pada ngawat-awatana penggawéan ing griyané GUSTI; sing 6000 wong dadia sing tukang nata-nata lan rèkter; ₅sing 4000 wong dadia njaga gapura; lan sing 4000 wong gawéané memuji marang GUSTI karo nggunakké piranti-piranti musik sing wis tak gawé kanggo memuji kidungan,” mengkono tembungé Daved. ₆Wong mau uga pada dipisah-pisah karo Daved dadi golongan-golongan miturut para anaké Lèwi, ya kuwi Gèrson, Kéhat lan Mérari.

₇Golongané wong Gèrson ya kuwi Ladan lan Simèi. ₈Para anaké Ladan ya kuwi Yehièl, sakwijiné pemimpin lan Zetam lan Yoèl, kabèhé wong telu. ₉Para anaké Simèi ya kuwi Selomit, Hasiel, lan Haran, kabèhé wong telu; wong iki sing pada dadi leluhuré kulawargané Ladan. ₁₀Para anaké Simèi ya kuwi Yahat, Sina, Yeusy lan Beria; kuwi para anaké Simèi, gunggungé papat. ₁₁Yahat kuwi sing dadi penggedé, nanging Sina kuwi wong sing nomer loro, nanging Yeusy lan Beria anaké ora okèh, mulané mung dadi sak brayaté lan pangkaté mung siji.

₁₂Para anaké Kéhat ya kuwi Amram, Yizhar, Hébron lan Yizhar, kabèhé papat. ₁₃Para anaké Amram ya kuwi Harun lan Moses; Harun dipasrahi ngurus apa sing Mahasutyi, ya piyambaké uga para turunané, nganti ing sak lawas-lawasé, ya kuwi ngobong kurban ing ngarepé GUSTI, ngladèni marang Panjenengané lan ngedum berkah kanggo asmané, nganti ing sak lawas-lawasé. ₁₄Para anaké Moses, abdiné Gusti Allah, dilebokké taleré Lèwi. ₁₅Para anaké Moses ya kuwi Gèrson lan Elièser. ₁₆Gèrson nurunké Sebuel, sakwijiné pemimpin. ₁₇Elièser nurunké Rehabya, sakwijiné pemimpin; Elièser ora nduwé anak liyané, nanging anaké Rehabya kuwi okèhé ngidap-idapi. ₁₈Yizhar nurunké Selomit, sakwijiné pemimpin. ₁₉Anaké Hébron ya kuwi Yeria, sakwijiné pemimpin Amarya, anak sing nomer loro, Yahasiel, anak sing nomer telu lan Yekameam, anak sing nomer papat. ₂₀Para anaké Yizhar ya kuwi Mika, sakwijiné pemimpin lan Yisia, anak sing nomer loro.

₂₁Para anaké Mérari ya kuwi Mahli lan Musi. Para anaké Mahli ya kuwi Eléazar lan Kis. ₂₂Bareng Eléazar ninggal ndonya, ora ninggal anak lanang, nanging mung anak wadon; iki terus pada pèk bojo karo para anaké Kis, seduluré ponakan. ₂₃Para anaké Musi ya kuwi Mahli, Eder lan Yérémot, kabèhé telu.

₂₄Ya kuwi turunané Lèwi miturut brayaté, para leluhuré brayaté, waktu pada didaftar siji-siji tyotyok karo étungané jenengé, urutané, sing umur rong puluh taun munggah, kuwi sing kuwajipané nindakké penggawéan ing bab ngladèni pangabekti ing griyané GUSTI. ₂₅Awit Daved wis ngomong: “GUSTI, Gusti Allahé Israèl, wis mberkahi keslametan marang umaté, lan Panjenengané manggon ing Yérusalèm ing sak lawas-lawasé. ₂₆Dadiné wong Lèwi wis ora usah ngusung griya sutyi menèh lan kabèh piranti sing kanggo nindakké pangabekti ing kono.” ₂₇Miturut préntahé Daved sing kèri, kabèh sing didaftar kuwi para turunané Lèwi sing umur rong puluh taun munggah. ₂₈“Nanging kuwajipané ya kuwi ngréwangi para turunané Harun nindakké peladènan pangabekti ing griyané GUSTI, njaga marang plataran, kamar-kamar lan ing bab njaga resiké sakkèhé barang sing sutyi uga nindakké penggawéan sing gegandèngan karo peladènan pangabekti ing griyané Gusti Allah. ₂₉Uga kuwajipané nyawiské roti kurban lan glepung sing apik déwé kanggo kurban panganan, roti tipis tanpa ragi, apa sing dipanggang ing piranti panggangan, apa sing diublek lan sakkèhé takeran lan ukuran. ₃₀Sak terusé ya kuwajipané memujèkké kidung maturkesuwun lan pamuji kanggo GUSTI ing saben ésuk, lan uga ing saben soré ₃₁uga ing waktu masrahaké sakkèhé kurban obongan marang GUSTI, ing dina sabat, ing sasi anyar lan ing dina gedé, miturut tyatyahé sing tyotyok karo pernatan sing kudu ditindakké kanggo wong-wong mau, kanggo kuwajipané sing tetep ing ngarepé GUSTI. ₃₂Wong-wong mau uga kuwajipané njaga ing Tarup Sutyi lan panggonan sutyi lan ngréwangi para tyedak turunané Harun, ya kuwi para seduluré, ing bab enggoné nindakké pernatan pangabekti ing griyané GUSTI.”