1 Lelakoné Kraton 24

₁Iki golongan-golongané tyedak turunané imam Harun. Para anaké imam Harun ya kuwi Nadab, Abihu, Eléazar lan Itamar. ₂Nanging imam Nadab lan imam Abihu enggoné ninggal ndonya luwih ndisik tenimbangané bapaké lan ora ninggal anak lanang, mulané sing kanggonan pangkat imam ya kuwi Eléazar lan Itamar. ₃Daved diréwangi karo imam Sadok sangka turunané Eléazar lan imam Akimèlèk sangka turunané Itamar, nggolong-nggolongké para wong kuwi miturut kuwajipané ing sak njeruhné nindakké pernatan pangabekti. ₄Terus pada weruh yèn, ing antarané turunané imam Eléazar penggedéné golongan luwih okèh tenimbangané ing antarané turunané imam Itamar, mulané dipisah mengkéné: kanggo turunané Eléazar pemimpiné brayaté ana nembelas, nanging kanggo turunané Itamar wolu. ₅Sak terusé enggoné ngedum kuwi karo nguntyalké lotré tanpa mbédak-mbédakké, awit turunané imam Eléazar lan turunané imam Itamar ana sing dadi “para penggedé sutyi” lan “para pengarepé Gusti Allah,” kuwi ya turunané Eléazar lan ya turunané Itamar. ₆Nanging Semaya anaké Nétanéèl, juru tulisé, sakwijiné wong Lèwi, kuwi nulisi jeneng-jenengé ing ngarepé ratu, para penggedéné imam Sadok, imam Akimèlèk, anaké Abyatar lan ing ngarepé para pemimpiné brayaté imam-imam lan wong Lèwi. Saben-saben sangka turunané Eléazar dijukuk kulawargané siji, mengkono uga sangka turunané Itamar ya kulawargané siji.

₇Lotréan sing wiwitan tiba marang imam Yoyarib; sing kaping pindo marang imam Yedaya; ₈sing kaping telu marang imam Harim; sing kaping papat marang imam Seorim; ₉sing kaping lima marang imam Malkia; sing kaping nem marang imam Miyamin; ₁₀sing kaping pitu marang imam Hakos; sing kaping wolu marang imam Abia; ₁₁sing kaping sanga marang imam Yésua; sing kaping sepuluh marang imam Sekanya; ₁₂sing kaping sewelas marang imam Elyasib; sing kaping rolas marang imam Yakim; ₁₃Sing kaping telulas marang imam Hupa; sing kaping patbelas marang imam Yesebeab; ₁₄sing kaping limalas marang imam Bilga; sing kaping nembelas marang imam Imèr; ₁₅sing kaping pitulas marang imam Hesir; sing kaping wolulas marang imam Hapises; ₁₆sing kaping songolas marang imam Pétahya; sing kaping rongpuluh marang imam Yéhèskièl; ₁₇sing kaping selikur marang imam Yakin; sing kaping rolikur marang imam Gamul; ₁₈sing kaping telulikur marang Delaya; sing kaping patlikur marang imam Maasia. ₁₉Kuwi sangka wong-wong mau ing sak njeruhné pada nindakké pernatan pangabekti, sakwisé mlebu ing griyané GUSTI, miturut ing pernatan sing dikèkké marang dèwèké kabèh lantaran imam Harun, leluhuré, tyotyok karo apa sing dipréntahké karo GUSTI, Gusti Allahé Israèl.

₂₀Golongan sing ijik kèri sangka turunané Lèwi, sangka para tyedak turunané Amram ya kuwi Subaèl, sangka turunané Subaèl, Yehdeya; ₂₁sangka turunané Rehabya ya kuwi Yisia, sakwijiné pemimpin; ₂₂sangka turunané Yizhar ya kuwi Selomot; sangka turunané Selomot ya kuwi Yahat. ₂₃Para anaké Hébron ya kuwi Yeria, sakwijiné pemimpin Amarya, anaké sing nomer loro, Yahasiel, sing nomer telu, lan Yekaméan, sing nomer papat. ₂₄Anaké Yizhar ya kuwi Mika; sangka para turunané Mika ya kuwi Samir. ₂₅Seduluré Mika ya kuwi Yisia; sangka para anaké Yisia ya kuwi Sakaria. ₂₆Turunané Mérari ya kuwi Mahli lan Musi, uga para anaké Yaazia, anaké. ₂₇Turunané Mérari sangka Yaazia, anaké, ya kuwi Syoham, Sakur lan Hibri. ₂₈Sangka Mahli ya kuwi Eléazar; kuwi ora nduwé anak. ₂₉Sangka Kis ya kuwi Yerakméél. ₃₀Para anaké Musi ya kuwi Mahli, Eder lan Yerimot. Kuwi turunané Lèwi miturut brayaté. ₃₁Kuwi ya pada nguntyalké lotré pada kaya para seduluré tunggal taleré, tyedak turunané Harun, ing ngarepé Daved, imam Sadok, imam Akimèlèk lan ing ngarepé para pemimpiné kulawargané, para imam lan wong Lèwi. Ing bab iki pemimpiné kulawargané kuwi pada karo seduluré sing tyilik déwé.