1Dadi, awit Yésus Kristus wis nandangi sangsara tyara kedagingan, mulané kowé uga kudu nganggo gaman rupa pikiran sing kaya mengkono - awit sapa sing wis ngalami sangsara tyara kedagingan kuwi wis marèni enggoné nglakoni dosa - 2supaya waktu sing ijik ana, aja kok enggo nuruti kepénginané manungsa, nanging nuruta marang karepé Gusti Allah. 3Jalaran wis tyukup suwéné waktu sing kok gunakké kanggo nindakké apa sing disenengi karo bangsa-bangsa sing ora kenal marang Gusti Allah. Kowé wis pada urip nuruti swarané hawa-nepsuné, kepénginan, mendem-mendeman, pésta ombèn-ombènan lan nyembah brahala sing ora ana gunané. 4Awit sangka kuwi wong-wong pada nggumun nanging kowé kok ora mèlu bebarengan karo wong-wong kuwi njegur ing blétokané juglangan kuwi uga, sak nalika kowé terus dipitenah. 5Nanging wong-wong kuwi kudu pada ngomongké jawaban marang Panjenengané sing wis tata-tata ngadili wong urip lan wong mati. 6Awit ya karo kuwi, Injil diwartakké marang wong-wong mati uga, supaya pada kayadéné manungsa kabèh, diadili perkarané tyara kedagingané, nanging kanggo ing roh bisa urip, miturut karepé Gusti Allah.
Uripé wong Kristen
7Lan samubarang kabèh wis tyedak. Awit sangka kuwi bisaa ngwasani awakmu lan sing ati-ati, supaya kowé pada bisa ndedonga. 8Nanging sing perlu déwé: Pada temenana enggonmu trésna-tinrésnan, jalaran katrésnan kuwi nutupi dosa sing okèh banget. 9Pada senenga ngekèki pondokan tanpa grundelan. 10Padaa ladèn-ladènan, miturut pawèh sing wis ditampani karo saben wong, kayadéné juru pangrumat katrésnané Gusti Allah sing betyik. 11Yèn ana wong sing ngomong, kuwi kaya wong sing nglantarké tembungé Gusti Allah; yèn ana wong sing ngladèni, kuwi ditindakké karo kekuwatan pawèhé Gusti Allah, supaya Gusti Allah diluhurké ing samubarang awit sangka Yésus Kristus. Panjenengané kuwi sing nduwé kamulyan lan pangwasa langgeng sak lawas-lawasé! Amin.
Kasangsarané kanggo nyoba
12Para sedulur sing ditrésnani, aja pada nggumun marang urupé geni panyiksa sing nyerang kowé kanggo nyoba, kaya ana bab sing ora lumrah nekani ing kowé. 13Malah pada bungaha, tyotyok karo panduman sing kok tampa sangka sangsarané Kristus, supaya kowé uga dililani bungah lan pada bungah mbésuk yèn Panjenengané ngétoké kamulyan-Né. 14Rahayu kowé, yèn kowé pada dirèmèhké awit sangka jenengé Kristus, awit Rohé kamulyan ya kuwi Rohé Gusti Allah manggon ing kowé. 15Aja ana tunggalmu sing kudu ngalami sangsara awit matèni wong, utawa dadi maling, utawa nindakké sing ala, utawa ngrusuhi urusané wong liyané. 16Nanging yèn ngalami sangsara awit dadi wong kristen, kuwi aja isin, malah ngluhurna Gusti Allah atas asma-Né Kristus. 17Jalaran saiki wis tekan wantyiné pengadilan bakal diwiwiti sangka umaté Gusti Allah. Yèn pengadilan kuwi diwiwiti sangka kita, kepriyé bakal kedadiané wong sing pada ora pertyaya marang Injilé Gusti Allah? 18Lan yèn
wong bener kuwi waé mèh ora dislametké,
terus kepriyé bakal kedadiané wong duraka lan wong dosa kuwi?
19Mulané, para sing ngalami sangsara awit sangka karepé Gusti Allah, kuwi pada pasraha marang Panjenengané sing nyiptaké, ya sing setia tuhu, lan tansah nindakké kabetyikan.
