1Yotam waktu dadi ratu umuré selawé taun, nanging enggoné dadi ratu ing Yérusalèm suwéné nembelas taun. Ibuné asma Yerusa, wong wadon anaké Sadok. 2Ratu nandangi apa sing bener ing ngarepé GUSTI, persis kaya sing ditandangi karo Uzia, bapaké, mung waé piyambaké ora mlebu ing griyané GUSTI. Nanging rayat ijik terus waé enggoné nindakké bab sing nggawé rusak. 3Ratu nggawé Gapura Duwur ing griyané GUSTI lan nganakké pembangunan okèh ing témbok Ofèl. 4Piyambaké uga nggawé kuta-kuta ing pegunungan ing Yéhuda lan bèntèng-bèntèng watu lan panggung-panggung ing alas-alas. 5Ratu perang nglawan ratuné turunané Amon, terus dikalahké nganti ing taun kuwi uga turunané Amon ngekèki marang piyambaké duwit 100 talénta slaka, gandum 10.000 kor lan jewawut 10.000 kor. Uga ing taun sing kaping pindo lan sing kaping telu turunané Amon pasrah pajek semono marang piyambaké. 6Yotam dadi kuwat, awit uripé madep marang GUSTI, Gusti Allahé. 7Sak luwihé sejarahé Yotam, sak okèhé perangé lan mlakuné, kuwi kabèh ketulis ing kitab bab para ratu ing Israèl lan Yéhuda. 8Waktu dadi ratu piyambaké umuré selawé taun, nanging enggoné dadi ratu ing Yérusalèm suwéné nembelas taun. 9Yotam terus dililani lan nunggal karo para leluhuré lan terus dikubur ing kutané Daved. Nanging Akas, anaké, terus dadi ratu nggentèni piyambaké.
