2 Lelakoné Kraton 35

₁Yosia ngriyayakké Paskah kanggo GUSTI ing Yérusalèm. Wedusé gèmbèl Paskah dibelèh ing tanggal patbelas ing sasi kaping pisan. ₂Ratu nentokké kuwajipané para imam lan nguwatké atiné kanggo enggoné pada nindakké penggawéané ing griyané GUSTI. ₃Ratu ngomong marang para wong Lèwi, sing pada ngekèki piwulang marang wong Israèl lan para wong sing disutyèkké kanggo GUSTI: “Peti sutyi kuwi sèlèhna ing griya sing digawé karo Salomo, anaké Daved, ratuné Israèl. Ora usah kok usung menèh. Saiki kowé pada ngladènana marang GUSTI, Gusti Allahmu lan Israèl, umaté! ₄Pada tata-tataa miturut kulawargamu kaya sing wis ditulis karo Daved, ratuné Israèl lan Salomo, anaké. ₅Kowé pada ngadeka ing lataré griya sutyi miturut golongané brayaté para sedulurmu liyané, ya kuwi golongané wong lumrah, saben golongané brayaté wong Lèwi kanggo para sedulurmu kuwi sak golongan. ₆Terus pada mbelèha wedusé gèmbèl Paskah; sampéyan pada nyutyèkké awakmu lan pada nganakna tyetyawisan kanggo para sedulurmu, miturut apa sing diomongké karo GUSTI lantaran Moses.”

₇Yosia nyumbang marang golongané wong lumrah rupa wedus 30.000, ya kuwi wedus gèmbèl lan wedus sing ijik nom, kabèh kanggo kurban Paskah kanggo sak kabèhé wong ing kono. Kejaba kuwi ratu uga nyumbang sapi 3.000. Kabèh kuwi sangka barang duwèké ratu. ₈Para penggedéné suradadu ya pada ngekèki sumbangan karo kebungahan marang rayat, para imam lan para wong Lèwi. Sakwisé mengkono imam gedé Hilkia, Sakaria lan Yehièl, para penggedéné griyané Gusti Allah, pada ngekèki marang para imam wedus 2.600 kanggo kurban Paskah lan kejaba kuwi uga sapi 300. ₉Konanya lan seduluré loro, Semaya lan Nétanéèl lan Hasabia, Yeiel lan Yosabad, para penggedéné wong Lèwi, nyumbang marang para wong Lèwi wedus 5.000 kanggo kurban Paskah lan kejaba kuwi sapi 500. ₁₀Bareng upatyarané pangabekti wis dityawiské, para imam terus pada ngadek ing ngarepé lan uga para wong Lèwi miturut golongané miturut préntahé ratu. ₁₁Wedus gèmbèl Paskah terus dibelèh lan para imam nyiramké getihé ing tangané para wong Lèwi lan para wong Lèwi pada ngelèti wedus mau. ₁₂Nanging kurbané obongan didèwèkké, bakal dipasrahké marang golongané wong lumrah miturut golongané brayaté; kuwi dipasrahké marang GUSTI kaya sing wis ketulis ing kitab Moses. Mengkono uga sapi-sapiné. ₁₃Sakwisé mengkono wong-wong terus pada manggang wedusé gèmbèl Paskah ing geni, tyotyok karo pernatané, nanging pisungsung-pisungsung sutyi pada diolah ing kwali, ing kendil utawa ing wajan; kuwi terus gelis-gelis diedum marang golongané wong lumrah kabèh. ₁₄Sakwisé kuwi terus pada ngolahké awaké déwé lan para imam, awit para imam, ya kuwi para tyedak turunané Harun, pada répot pasrah kurban obongan lan sak kabèhé gajihé nganti mbengi. Mulané para wong Lèwi pada ngolahké awaké déwé lan para imam, ya kuwi para tyedak turunané Harun. ₁₅Para tukang ngidung, ya kuwi turunané Asaf, pada ing panggonané déwé, tyotyok préntahé Daved, Asaf, Héman lan Yedutun, wong tukang ndelok abdiné ratu mau; uga para penjaga-gapura pada ing saben gapura. Kuwi ora usah pada ninggal kuwajipané, awit para seduluré, ya kuwi para wong Lèwi, sing nyawiské. ₁₆Kaya mengkono enggoné pada nyawiské upatyara pangabekti marang GUSTI ing dina kuwi, kanggo ngriyayakké Paskah lan masrahaké kurban obongan ing mesbèhé GUSTI, tyotyok karo préntahé Yosia. ₁₇Ing waktu kuwi wong Israèl sing pada ing kono, ngriyayakké Paskah lan dina mangan Roti tanpa ragi, suwéné pitung dina. ₁₈Paskah sing kaya mengkono kuwi ora tau diriyayakaké menèh ing Israèl wiwit jamané nabi Samuèl. Ing antarané para ratuné wong Israèl ora ana siji waé sing tau ngriyayakké Paskah kaya sing diriyayakaké karo Yosia karo para imam lan para wong Lèwi lan karo sak kabèhé wong Yéhuda lan Israèl sing pada bisa nekani lan karo para wong sing pada manggon ing Yérusalèm. ₁₉Paskah mau diriyayakaké ing taun sing kaping wolulas pepréntahané Yosia.

₂₀Sak terusé lelakon kuwi mau kabèh, waktu ratu wis rampung enggoné ndandani griyané GUSTI, Neko, ratuné negara Egipte, ngluruk perang menyang kuta Karkemis ing pinggir kali Efrat. Yosia teka ngadepi. ₂₁Neko ngirimké kongkonan marang Yosia, dikongkon ngabaraké tembungé sing mengkéné: “Sampéyan nduwé urusan apa karo kula, ratu ing Yéhuda? Waktu iki kula ora ngluruk sampéyan, nanging nglawan marang ratu sing ijik kula merangi. Gusti Allah ngongkon marang kula supaya gelis-gelis tandang. Mulané kula njaluk ngendek karep sampéyan nglawan marang Gusti Allah sing nunggal karo kula, supaya sampéyan aja nganti dientèkké karo Panjenengané!” ₂₂Nanging Yosia ora gelem lunga sangka ngarepé Neko, malah nylamur mlaku arep nglawan perang marang piyambaké, dadiné ora gelem nggatèkké marang tembungé Neko, sing dadi pepélingé Gusti Allah; Yosia terus nglawan perang ing legokan Megido. ₂₃Para suradadu tukang manah pada ngetyulké panahé marang Yosia, ratu terus préntah marang para balané: “Aku singkirna sangka kéné, awit aku ketaton banget!” ₂₄Para balané pada mindah piyambaké sangka kréta tumpakané menyang kréta liyané lan terus digawa mulih menyang ing Yérusalèm. Ratu terus ninggal ndonya lan dikubur ing kuburané para leluhuré. Wong sak tanah Yéhuda lan ing Yérusalèm kabèh pada nindakké petangisan, tumuju marang Yosia. ₂₅Yérémia nggawé kidung pesambat bab Yosia. Lan nganti sepréné sak kabèhé tukang ngidung lanang lan wadon pada ngidungké kidung-kidung pesambat bab Yosia lan kuwi didadèkké sakwijiné pakulinan ing negara Israèl. Kuwi kabèh pada ketulis ing Kidung Pesambat.

₂₆Sak luwihé sejarahé Yosia lan penggawéané sing sutyi sing tyotyok karo sing ketulis ing Torèté GUSTI, ₂₇ya kuwi sejarahé kawit wiwitan nganti tekan ing pungkasan, kuwi kabèh pada ketulis ing kitab bab para ratu ing Israèl lan ing Yéhuda.