Upayané Salomo
1Kadung wis rong puluh taun, sak rampungé enggoné nggawé griyané GUSTI lan palèsé déwé, 2Salomo terus nguwati kuta-kuta sing dipasrahké karo Huram marang piyambaké lan ngongkon marang wong Israèl supaya pada manggon ing kono. 3Salomo terus ngluruk menyang ing Hamat-Soba, terus dikalahké. 4Sakwisé mengkono ratu nguwati Tadmor ing ara-ara samun lan sakkèhé kuta simpenan, sing didekké ing Hamat. 5Uga Bèt-Horon puntuk lan Bèt-Horon legokan dikuwati didadèkké kuta pager watu sing diubengi karo témbok, karo gapura lan slorok kantyingé lawang, 6lan uga Baalat lan ing ngendi waé kuta simpenan duwèké Salomo, sak okèhé kuta panggonané suradadu kréta lan kuta-kuta panggonané suradadu jaran lan apa waé sing dikarepké karo Salomo supaya didekké ing Yérusalèm, ing gunung Libanon, utawa ing sak okèhé negara sing dikwasani. 7Ing ngendi waé turahé tunggalé wong Hèt, wong Amori, wong Pèris, wong Hèwi lan wong Yébus, sing ora tunggalané Israèl, 8ya kuwi turunané para bangsa sing ijik pada manggon ing negara kono, sing ora dientèkké karo wong Israèl kuwi pada diklumpukké karo Salomo, didadèkké wong kerja peksa; kaya mengkono kuwi nganti saiki. 9Nanging wong Israèl ora ana sing dikèki penggawéané batur, kuwi pada dadi suradadu, dadi penggedéné suradadu jaran lan dadi komendané suradadu kréta lan suradadu jaran.
10Iki para penggedé sing nduwur déwé, abdiné Salomo: 250 wong tyatyahé sing pada mréntah rayat.
11Salomo terus ngelih, anaké wadon Parao, sangka kutané Daved menyang ing omahé sing digawé, awit tembungé: “Bojoku aja nganti ana sing manggon ing palèsé Daved, ratuné Israèl, awit ing panggonan sing wis dileboni karo petiné GUSTI kuwi sutyi.”
12Salomo terus masrahaké kurban-kurban obongan marang GUSTI ing mesbèhé GUSTI sing wis diedekaké ing ngarepé sebrangé Griya Sutyi, 13tyotyok karo apa sing miturut préntahé Moses ditetepaké dadi kurban saben dina, kurban ing dina sabat, ing sasi anyar, lan setaun kaping telu ing dina riyaya, ya kuwi: ing dina Riyaya Roti tanpa ragi, ing dina Riyaya Pungkasané pitung minggu lan ing dina Riyaya Tarup Godong, 14lan miturut pernatané Daved, bapaké, golongan-golongané para imam pada dikèki kuwajipané déwé-déwé, nanging para wong Lèwi pada dikèki kuwajipané ngidungké pamuji lan ngladèni marang para imam, kuwi saben dina miturut sing ditetepaké ing dina kuwi, lan uga para tukang njaga gapura kanggo golongan-golongané kanggo saben gapura. Awit mengkono préntahé Daved, abdiné Gusti Allah. 15Wong-wong pada ora nyimpang sangka préntahé ratu ing bab para imam lan para wong Lèwi lan ing bab apa waé, uga ing bab barang-barang. 16Ing kono penggawéané Salomo wis rampung, wiwit dina pemasangané dasaré griyané GUSTI nganti ing dina rampungé griya kuwi. Kaya mengkono terus wis rampung Griya-Sutyi GUSTI.
17Salomo terus lunga menyang ing Esion-Geber lan menyang ing Elot, ing pinggir segara, ing negara Edom. 18Huram kongkonan para abdiné ngirimi prau-prau marang piyambaké lan abdi-abdiné sing ngerti bab segara. Kuwi pada bebarengan karo para abdiné Salomo menyang negara Ofir; ing kono pada njupuk emas 450 talénta, sing terus dipasrahké marang Salomo.
