Kolosé 1

₁Sangka Paulus, rasulé Kristus Yésus, awit sangka karepé Gusti Allah, lan sangka sedulur kita Timotius, ₂marang para wong sutyi lan sing pertyaya ing Kristus, ing Kolosé.

Kawelasan lan katentreman sangka Gusti Allah, Bapak kita, anaa ing kowé kabèh.

₃Saben-saben ndongakké kowé, kita tansah pada maturkesuwun marang Gusti Allah, Bapaké Gusti kita Yésus Kristus, ₄awit kita wis pada krungu bab pertyayamu ing Kristus Yésus, mengkono uga bab katrésnanmu marang para sutyi kabèh, ₅awit sangka pengarep-arep marang apa sing wis dityawiské marang kowé ing swarga. Kanggo pengarep-arep mau ing sak durungé kowé krungu sangka tembungé kabeneran, ya kuwi Injil, ₆sing wis pada kok tampa. Injil mau ngetokké woh lan mekar mrambat sak jagat, malah ya tekan ing tengahmu wiwit ing dina enggonmu pada krungu lan mengertèni tenan marang kabenerané Gusti Allah. ₇Kuwi mau kabèh wis kok weruh sangka Epafras kantyaku ngladèni sing tak trésnani, sing kanggo kowé dadi abdiné Kristus sing setia. ₈Ya wong kuwi sing ngabari kita bab katrésnanmu ing njeruhné Roh.

₉Awit sangka kuwi, wiwit kita olèh kabar mau, tanpa mandek enggon kita ndongakké kowé. Sing tak jaluk supaya kowé dikèki sak kabèhé kawityaksanan lan kaweruh kasukman kanggo weruh bab karepé Gusti. ₁₀Nganti uripmu ing ngarepé Gusti bisa kaya sing sak mestiné lan ndadèkké senengé ati-Né kanggo kabèh perkara, lan sak njeruhné nindakké sak kabèhé penggawé betyik sing bisa ngetokké woh, lan menèh kaweruhmu bab Gusti Allah saya mundak. ₁₁Uga kowé pada dikuwatké karo kekuwatan pangwasané kamulyané Gusti, supaya enggonmu nanggung samubarang kabèh karo temen lan sabar. ₁₂Terus pada memujia maturkesuwun karo bungah marang Bapak, sing wis ndadèkké kowé pantes didumi apa sing wis ditentokké kanggo para sutyi ing pepadang. ₁₃Panjenengané wis ngluwari kita sangka pangwasané pepeteng, diboyong menyang kratoné Putrané sing ditrésnani. ₁₄Ing Panjenengané enggon kita pada nduwèni tebusan, ya kuwi pangapurané dosa.

₁₅Panjenengané kuwi gambaré Gusti Allah sing ora kétok, sing mbarep, sing luwih utama tenimbang samubarang kabèh sing digawé, ₁₆Dadiné samubarang kabèh kuwi, awit Panjenengané, ya ing swarga, ya ing bumi, sing kétok mripat, lan sing ora kétok mripat, dadia rupa dampar, dadia kraton, uga para pemrintah lan para pangwasa; samubarang kabèh digawé Panjenengané lan kanggo Panjenengané. ₁₇Panjenengané kuwi ana sak durungé samubarang kabèh ana, lan samubarang kabèh kuwi ing Panjenengané; ₁₈Panjenengané kuwi ngadek dadi sirahé badané, ya kuwi pasamuan. Panjenengané dadi mbarepé, sing ndisiki tangi sangka antarané wong mati, mulané luwih utama ing samubarang kabèh. ₁₉Awit sak kabèhé kasampurnané Gusti Allah dililani manggon ing Panjenengané, ₂₀lan ngrukunké samubarang kabèh ing bumi lan ing swarga karo Panjenengané; ya kuwi sakwisé nganakké rukunan karo getihé Kristus sing dipentèng. ₂₁Mengkono uga kowé kabèh sing mauné urip adoh sangka Gusti Allah, sak njeruhné ati lan pikiranmu mungsuhi Panjenengané, kaya sing kétok sangka penggawéanmu sing ala, ₂₂saiki wis dirukunké ing uripé kedagingané Kristus karo patiné, supaya kowé pada ketemu sutyi tanpa tyiri lan resik enggonmu diadepaké ing ngarepé Gusti. ₂₃Awit sangka kuwi, kowé kudu pada mantep ing pertyaya, tetep kuwat ora gontyang, lan aja nganti nylèwèng sangka pengarep-arepé Injil sing kowé wis pada krungu lan wis digelarké ing sak lumahé bumi sak kurepé langit, lan aku iki, Paulus, sing wis dadi abdi-Né.

₂₄Saiki aku bungah dililani ngalami sangsara awit sangka kowé lan sangsarané awakku nggenepi kekurangané sangsarané Kristus kanggo Panjenengané, ya kuwi pasamuan. ₂₅Enggonku wis dadi peladèné pasamuan kuwi tyotyok penggawéan sing dikèkké karo Gusti Allah marang aku, ya kuwi nglantarké tembungé Gusti sing jangkep marang kowé, ₂₆ya kuwi wewadi sing disimpen sak njeruhné pirang-pirang abad lan turun-temurun, nanging sing saiki wis dibukakké marang para sutyi duwèké. ₂₇Kuwi pada dikèki weruh sak pira ajiné lan mulyané perkara mau ing antarané para bangsa liyané, ya kuwi: Kristus ing sak tengahmu, lan ya Kristus kuwi sing dadi pengarep-arep marang kamulyan. ₂₈Ya Panjenengané kuwi sing kita wartakké yèn kita pada mituturi lan mulangi saben wong bab sak rupané kaweruh kanggo nuntun saben wong marang kasampurnan ing Kristus, ₂₉kuwi sing tak upaya lan tak labuhi karo ngetokké kekuwatan, tyotyok karo kwasané sing nyambutgawé karo kuwat ing aku.