1Uga menèh kowé nggawéa mesbèh kayu akasia, dawané lima éluh lan ambané lima éluh, dadi mesbèh kuwi pesagi bener, nanging duwuré telung éluh. 2Sunguné gawénen ing pojokané papat; kuwi gawénen dadi siji karo mesbèhé, mesbèh kuwi kudu kok lapis karo tembaga. 3Lan kowé uga nggawéa wadah-wadah kanggo mbuwangi awuné, uga porek lan bokor kanggo nyirami, tyukit lan anglo; sakkèhé piranti kuwi kudu digawé sangka tembaga. 4Lan menèh kowé nggawéa ayakan tembaga kaya jala, ayakan kuwi ing pojoké papat pisan wènèhana gelangan tembaga patang iji, 5terus tumpangna ing sak ngisoré pinggiré mesbèh wiwit sangka ngisor nganti ayakan mau duwuré separoné mesbèh. 6Uga menèh mesbèh kuwi ya gawèkna pikulan, pikulan kayu akasia sing dilapis karo tembaga. 7Pikulané slobokna ing gelangé, dadi yèn mesbèhé diusung, pikulan kuwi pada ing bangkèkané mesbèh kiwa tengen. 8Mesbèh kuwi digawé sangka planga ing njeruhné growong, kaya enggonmu wis diduduhké ing gunung, mengkono enggonmu pada nggarap mesbèh kuwi.
9Kowé nggawéa platarané Tarup Sutyi; ing sisih kidul plataran kuwi anaa geberé mori lenan tenunan sing bolahé alus, dawané ing sisih 100 éluh. 10Tyagaké kabèh kudu rong puluh, umpaké tembaga ya rong puluh, tyantèlané tyagak lan sambungané kuwi slaka. 11Mengkono uga ing sisih lor, turut ambané ya kudu geber dawané pada 100 éluh, lan tyagaké rong puluh lan umpaké rong puluh sangka tembaga, nanging tyantèlané lan sambungané kuwi kudu slaka. 12Ing ambané plataran sisih kulon anaa geber sèket éluh, lan tyagaké sepuluh lan umpaké sepuluh. 13Nanging ambané plataran panggonan ngarep sing sisih wétan kudu sèket éluh, 14ya kuwi geberé limalas éluh kanggo ing sisihé gapura sing siji karo tyagaké telu lan umpaké telu, 15lan kanggo ing sisihé gapura sijiné geberé ya limalas éluh, tyagaké telu lan umpaké ya telu. 16Nanging ing gapurané plataran anaa geberé sing dawané rong puluh éluh, sing digawé bakal mori wungu tuwa, lan wungu nom, abang lan mori lenan alus tenunan sing werna-werna lan tyagaké papat lan umpaké papat. 17Sakkèhé tyagak ing sak ubengé plataran mau pada pasangen sambungané karo slaka, lan tyantèlan ya slaka, nanging umpaké tembaga. 18Dawané plataran kudu 100 éluh, ambané sèket éluh lan duwuré limang éluh, rupa mori lenan tenunan alus, lan umpaké tembaga.
19Nanging sakkèhé piranti kanggo ngedekké Tarup Sutyi, mengkono uga sakkèhé patoké uga patoké plataran, kuwi kudu tembaga kabèh.
20Uga kowé mréntaha marang wong Israèl, supaya pada masrahaké lenga saitun deplokan sing tulèn kanggo dimar, supaya dimaré tansah murup. 21Ing sak njeruhné Tarup Kumpulan ing sak njabané geber sing ngaling-alingi petiné pernatan, ing kono Harun lan anak-anaké sing nata dimar mau ing ngarepé GUSTI wiwit mbengi nganti ésuk. Kuwi pernatan sing kudu ditandangi turun-temurun kanggo wong Israèl.
